މުހައްމަދު ޝިހާބް މުޅިން އަލަށް އިމާރާތްކުރާ ފުވައްމުލައް ސިޓީގެ ކީރިތި ޤުރުއާނާއި ބެހޭ މަރުކަޒު ބިނާކުރުމުގެ އެއްބަސްވުމުގައި މާރިޝް ކޮމްޕެނީ ޕްރައިވެޓް ލިމިޓެޑާއެކު މިއަދު ސޮއިކޮށްފިއެވެ.
މިއީ 7.2 މިލިއަން ރުފިޔާ ޚަރަދުކޮށްގެން އިމާރާތް ކުރާ ރީތި ޖާގަ ފުރިހަމަ އިމާރާތެކެވެ. މި އިމާރާތުގައި 4 ކްލާސްރޫމް އާއި އިދާރީ އޮފީހަކާއި ނަމާދު ކުރާ ޖާގައިގެ އިތުރުން އިސްލާމިކް ލައިބްރަރީ އަކާއި 300 މީހުންގެ ޖާގައިގެ ހޯލެއް ހިމެނޭކަމަށް ފުވައްމުލައް ސިޓީ ކައުންސިލުން ހާމަކުރައްވައެވެ.
އަމިއްލަ ކުންފުންޏެއް ކަމަށްވާ މާރިޝް ކޮމްޕެނީ ޕްރައިވެޓާއި މިއިމާރާތް ނިންމުމަށް ހަވާލުކުރެވިފައި ވަނީ 300 ދުވަހުގެ ތެރޭގައެވެ. ކީރިތި ޤުރުއާނާއި ބެހޭ އާ މި އިމާރާތް އެޅުމަށް ހަމަޖެހިފައި ވަނީ ކުރީގެ ފައުންޑޭޝަން ސްކޫލް ހުރި ބިމުގައެވެ.
ފުވައްމުލައް ސިޓީގެ ކީރިތި ޤުރުއާނާއި ބެހޭ މަރުކަޒުގެ އިމާރާތް އެއްކޮށް ނިމުމުން މިހާރު އެމަރުކަޒަށް ދިމާވެފައިވާ ޖާގައިގެ ދަތިކަން ހައްލުވެގެން ދާނެކަމަށް ވެއެވެ. އަދި މަރުކަޒުން މިހާރު ލިބޭ ޚިދުމަތްތައް އިތުރަށް ފުރިހަމަ ވެގެންދާނެ ކަމަށް ސިޓީ ކައުންސިލުން ހާމަކުރައްވައެވެ. ފުވައްމުލައް ސިޓީގެ ކީރިތި ޤުރުއާނާއި ބެހޭ މަރުކަޒުގައި މިހާރުވެސް ޤާރީ ކޯހާއި، އިމާމް ކޯސް އަދި ޤުރުއާން މުދައްރިސްކަމުގެ ކޯސްތައް ހިންގަމުން އާދެއެވެ.
އަލަށް އިމާރާތް ކުރާ ފުވައްމުލައް ސިޓީ ގުރުއާނާއި ބެހޭ މަރުކަޒުގެ އެއްބަސްވުމުގައި ސޮއިކުރުން 5 ފެބްރުއަރީ 2020
ޚިޔާލުތައް