އިބްރާހިމް ލަތީފް ހެރަތެރަ ކަރަންޓީނު ފެސިލިޓީއިން ފިލި ފަސްމީހުން ހައްޔަރުކޮށްފިއެވެ. އެ ފަސް މީހުން ހައްޔަރުކޮށް، މިހާރު އެމީހުންގެ މައްސަލަ ތަޙްޤީޤު ކުރަމުން ގެންދާ ކަމަށް ފުލުހުންނާއި ހަވާލާދީ ދިވެހި މީޑިއާތަކުން ހާމަކޮށްފިއެވެ.
މި ފަސް މީހުން ފިލި ޚަބަރު ލިބުނުތަނާ މާގިނަ ވަގުތުތަކެއްނުވެ އެކަކު ފުލުހުން ވަނީ ހޯދާފައެވެ. އޭގެ ދެތިން ގަޑިއިރު ފަހުން ވަނީ އިތުރު ދެމީހަކު ހޯދާފާފައި ވެއެވެ. އަދި ބާކީ ތިބި މީހުން މިއަދު ހޯދާފައިވާ ކަމަށް ރިޕޯޓުކޮށްފައެވެ. އައްޑޫ ހެރަތެރޭގައި ހިންގާ ކެނަރީފް 4 ސްޓަރ ރިޒޯޓުގެ ކަރަންޓީނު ފެސިލިޓީއިން ފިލި ފަސް މީހުންގެ ތެރެއިން 3 މީހުންނަކީ ފުވައްމުލަަކަށް ނިސްބަތްވާ މީހުންކަމަށް މިކަލް ނޫހަށް ވަނީ މައުލޫމާތު ލިބިފައެވެ.
އައްޑޫ ލައިވްއަށް މައުލޫމާތު ދެއްވަމުން އައްޑޫ ސިޓީގެ މޭޔަރު ސޯބެ ކުރިންް ވިދާޅުވެފައި ވަނީ ހެރެތެރެއިން ފިލި މީހުންނަކީ ޖަލުން ދޫކޮށްލި މީހުންގެ ތެރެއިން ތިން މީހުން ކަމަށެވެ. އަދި އެމީހުން ފިލައިގެން ގޮސްފައިވަނީ ހުޅުމީދޫއަށް ކަމަށް ބެލެވޭކަމަށެވެ. ކެނަރީފް ރިޒޯޓް ކަރަންޓީނު ފެސިލިޓީގައި 92 މީހަކު ކަރަންޓީނު ކުރެވިފައިވާ ކަމަށް ސޯބެ ވިދާޅުވިއެވެ.
ފުވައްމުލަކު ހޮސްޕިޓަލުގެ މެނޭޖަރު އަހުމަދު ސައީދު ފާހަގަ ކުރެއްވި ގޮތުގައި މިއީ ދިވެހިންގެ ހުރި އަޚުލާގީ ބޮޑު މައްސަލައެކެވެ. އެގޮތުން އަހުމަދު ސައީދު ފާހަގަކުރެއްވި އިތުރު ދެ މައްސަލައަކީ މާލެ، އައިޖީއެމްއެޗް އަށް ވިހަން ގެންދިޔަ މާބަނޑު އަންހެނަކާއި އެމްޓީސީސީ ފެރީ ޓާމިނަލުގައި މަސައްކަތްކުރާ މީހަކު ކޮވިޑް-19އަށް ފައްސިވުމުގެ މައްސަލައެވެ. މިފަދަ ކަމުން އާއްމުން މިކަމާއި މެދު ދެކޭގޮތް ވަޒަން ކުރެވޭ ކަމަށެވެ.
މިއަދު ކަރަންޓީނުން ފިލި މީހުންނަށް އިޝާރަތް ކުރައްވަމުން އަހުމަދު ސައީދު ވިދާޅުވީ މިއިން ކޮންމެ މީހަކު ގޮސް ވަންނާނީ މުސްކުޅި ކާފައާއި މާމަމެން ނުވަތަ އަނބި ދަރީންގެ ގާތަށެވެ. މީގެ ސަބަބުން ކޮވިޑްބަލީގެ ހާލަތު ގޯހުން ގޯހަށް ބަދަލުވެ އިޓަލީއާއި އެމެރިކާ ފަދަ ގައުމުތަކަށް ވީހެން ރާއްޖެއަށް ވެއްޖެނަމަ ދިވެހި ގައުމު ހަފުސްވެ ދިވެހިން ވަރަށް ނިކަމެތި ހާލަތަކަށް ވެއްޓޭނެކަމީ ޔަގީން ކަމެއްކަމަށެވެ.
ޚިޔާލުތައް