އިބްރާހިމް ލަތީފް މިހަފުތާގައި ނޫސްތަކުގެ ފަލަ ސުރުޚީއަށް އެރި އެންމެ މުހިންމު އެއް ސިޔާސީ ޚަބަރަކީ ވަޒީރުންގެ މަޖިލީހުގެ އެންމެ މުހިންމު އެއް ވުޒާރާ ހިންގެވުމުގެ މަސްއޫލިއްޔަތު ހަވާލުކޮށްފައިވާ އެމްޑީޕީ ތަމްސީލު ކުރައްވާ އިގްތިސާދީ ވަޒީރު ފައްޔާޒު އިސްމާއީލްގެ އިތުބާރު ނެތްކަމުގެ ވޯޓެއްނެގުމަށް އެމްޑީޕީގެ ރައީސް އުޅުއްވާ ކަމުގެ ޚަބަރެވެ. މިއީކީ ސޯޝަލް މީޑިއާތަކާއި ސައިހޮޓާތަކާއި ހޮޅުއަށީތަކުގައި ސިޔާސީ ވާހަކަ ދައްކާ ފަރާތްތަކަށް ސިހުން ގެނުވި ޚަބަރެއްނޫނެވެ. އެބައިމީހުން ސިފަކުރާ ގޮތުގައި މިއީ އެތެރޭގެ ސިޔާސީ ކޯޅުން އާންމުންނާއި ހަމައަށް ތިލަވުމެވެ. ރައީސް އިބްރާހިމް މުހައްމަދުގެ ކެބިނެޓް އެކުލަވާލެނު ހިސާބުން ފެށިގެން ފާއިތުވީ ދޮޅު އަހަރުތެރޭ މިކޯޅުމުގެ ވާހަކަތަކަކީ ދެކެވެމުންދިޔަ ވާހަކަ ތަކެވެ. ނަމަވެސް، މިކަން އެޕާޓީއިން ދޮގުކުރެެވެ. ނަމަވެސް، އަމިއްލަ ޕާޓީގެ އެންމެ މުހިންމު އެއް ވަޒީރަކުގެ އިތުބާރު ނެތްކަމުގެ ވޯޓު ނަގާއިރު މިކަމުގެ ފަހަތުގައި ބޮޑެތި ސުވާލުތަކެއް ވަނީ އުފެދިފައެވެ.
ފާއިތުވީ ދޮޅު އަހަރުތެރޭ ދެވުޒާރާއެއްގެ ވަޒީރުކަމަށް މިވަނީ ބަދަލުގެނެވިފައެވެ. އެދެ ވުޒާރާ އާއި މިފަހަރު ތަފާތެވެ. އެދެބަދަލަކީ އިތުބާރު ނެތްކަމުގެ ވޮޓެއްނޫނެވެ. އަދި ކިއެއްތަ އެއީ ވެރިކަން ކުރަމުންދާ އެމްޑީޕީގެ ވަޒީރުންތަކެއްވެސް ނޫނެވެ. މިފަހަރުގެ އިތުބާރު ނެތްކަމުގެ ވޯޓު ނެގުމަށް އިސްކޮށް ހަރަކާތްތެރިވަނީ އެމްޑީޕީގެ އިސްބައެއް ބޭފުޅުންނެވެ. އެގޮތުން، އެމްޑީޕީގެ ރައީސް މުހައްމަދު ނަޝީދުގެ ނަން ފާހަގަކުރަމުންދާއިރު މިފަހަރުގެ ވަޒީރުގެ ދިފާއުގައި ވެސް މަސައްކަތްކުރަމުންދަނީ އެމްޑީޕީ މެންބަރުންނެވެ. އެގޮތުން، އެމްޑީޕީގެ ސޯޝަލް މީޑިއާ އެކްޓީވިސްޓެއް ކަމަށްވާ އިސިސް ފުވައްމުލައް އޭނާގެ ފޭސްބުކް ސްޓެޓަސްގައި ލިޔެފައިވަނީ “މިނިސްޓަރު ފައްޔާޒު އިސްމާއީލްގެ އިތުބާރު ގެއްލި މަގާމުން ދުރުކުރަން ޖެހޭ ކަމެއް އަދި ފެންނަންނެތް، އެފަދަ ސަބަބުތަކެއް މަޖިލިސް އަށް ފާހަގަކުރެވިފައިވާނަމަ ރައްޔިތުންނާއި ހިއްސާކޮށް ދެއްވުން އެދެން”. މިނިސްޓަރު ފައްޔާޒަށް ތާއީދު ކުރައްވަމުން އިސިސް ލިޔެފައިވައިވަނީ ފައްޔާޒަކީ ގައުމު އާރާސްތުކުރުމުގައި ރައްޔިތުންގެ އިތުބާރު ހޯދާފައިވާ މިނިސްޓަރެއްކަމަށެވެ.
އިސިސްގެ އިތުރުން ފްރޭންކް އަންޑާވޫޑްގެ ނަމުގައި ނަން އޮޅުވާލައިގެން ސޯޝަލް މީޑިއާގައި ހަރަކާތްތެރިވާ ފުވައްމުލަކުގެ ސިޔާސީކަންތައްތައް ދިރާސާކޮށް ކޮމެންޓުކުރަމުންދާ ފަރާތުން އެފަރާތުގެ ފޭސްބުކް ސްޓެޓަސްގައި ލިޔެފައިވަނީ އެފަރާތުން މަސައްކަތްކުރަމުންދަނީ ހިއުމަން ޓްރެފިކިންދާ ދެކޮޅަށް ކަމަށާއި އެފަރާތުން ތެދުވެހުރީ ފައްޔާޒާއިއެއްކޮށްކަމަށެވެ. އަދި އެފަރާތުން ތުހުމަތުކުރާ ގޮތުގައި ފައްޔާޒުގެ އިތުބާރު ނެތްކަމުގެ ވޯޓަކީ ގަވާއިދާއި ޚިލާފަށް ބިދޭސީން އެތެރެކުރާ ފަރާތްތަކުން އެމްޑީޕީގެ ކެންޕޭނަށް ކުރި ޚަރަދުގެ ނުފޫޒުން އެމްޑީޕީގެ ރައީސްއާއި ގުޅިގެން ކުރަމުންދާ ކަމެއްކަމަށެވެ.
އެމްޑީޕީގެ އާންމު މެންބަރުންގެ އިތުރުން މަޖިލިސް މެންބަރުންވެސް ދަނީ މިނިސްޓަރު ފައްޔާޒުގެ ހިމާޔަތުގައި ވާހަކަ ދައްކަމުންނެވެ، އެގޮތުން މިހާތަނަށް 12 މެންބަރަކު ފައްޔާޒުގެ ހިމާޔަތުގައި ވާހަކަދެއްކެވިކަމަށް ސަން އޮންލައިނުން ރިޕޯޓުކުރެއެވެ. ފައްޔާޒުގެ ހިމާޔަތުގައި ވޯޓު ދެއްވާނެ މެންބަރުން އިތުރަށް ތިއްބެވިކަމަށްވެސް ސިޔާސީ ދާއިރާ ދިރާސާ ކުރާ ފަރާތްތަކުން ބުނަމުންދެއެވެ. ފުވައްމުލަކު ތިން މެންބަރުންގެ ތެރެއިން އެއްވެސް މެންބަރަކު މިހާތަނަށް މިކަމާއި ގުޅިގެން ވާހަކަ ދައްކާފައެއްނުވެއެވެ.
މިހާތަނަށް ފައްޔާޒުގެ ދިފާއުގައި ވާހަކަ ދެއްކެވި މެމްބަރުން:
- ގަމު ދާއިރާގެ މެމްބަރު މުހައްމަދު ވިސާމް
- ހުޅުމާލެ ދާއިރާ މެމްބަރު އަލީ ނިޔާޒު
- ދާންދޫ ދާއިރާގެ މެމްބަރު ޔައުގޫބު އަބްދުﷲ
- އިހަވަންދޫ ދާއިރާގެ މެމްބަރު މުހައްމަދު ޝިފާއު
- މާފަންނު ހުޅަނގު ދާއިރާގެ މެމްބަރު މުހައްމަދު ފަލާހު
- ކިނބިދޫ ދާއިރާ މެމްބަރު މުހައްމަދު ނާޝިޒު
- އައްޑޫ މީދޫ ދާއިރާގެ މެމްބަރު ރޮޒައިނާ އާދަމް
- މައްޗަންގޮޅި ދެކުނު ދާއިރާގެ މެމްބަރު އަހްމަދު ހައިތަމް
- އަލިފުށީ ދާއިރާ މެމްބަރު މުހައްމަދު ރަޝިދު ހުސައިން
- ކުރެއްދޫ ދާއިރާ މެމްބަރު އަބްދުލްޢަނީ
- އުނގޫފާރު ދާއިރާ މެމްބަރު އިސްމާއިލް އަހްމަދު
- ތިނަދޫ އުތުރު ދާއިރާ މެމްބަރު އަބްދުލް މުޢުނީ
(މަތީގައިވާ މެންބަރުންގެ ނަންތައް ގެނެސްދީފައި ވަނީ ސަން އޮންލައިނުން ގެނެސްދީފައިވާ ގޮތަށް)
މިނިސްޓަރު ފައްޔާޒު މަގާމުން ދުރުކުރުމަށް މިހާތަނަށް 20 ސޮއި ހޯދާފައިވާ ކަަމަށް ދިޔަރެސް ނޫހުން ރިޕޯޓުކުރެއެވެ. ވަޒީރެއްގެ އިތުބާރު ނެތްކަމުގެ މައްސަލަ ވެއްދުމަށް ބޭނުންވަނީ 14 ސޮއެވެ. ނަމަވެސް، އެފަދަ މައްސަލައެއް ފާސްކުރުމަށް 43 ވޯޓު ބޭނުންވެއެވެ. އެއީ 87 މެންބަރުންގެ މަޖިލީހުގެ އަޣުލަބިއްޔަތެވެ. މަޖިލީހުގެ 65 މެންބަރުންނަކީ އެމްޑީޕީ މެންބަރުން ކަމަށްވާއިރު މިހާތަނަށް ފައްޔާޒު ގެ އިތުބާރު ނެތްކަމަށް ސޮއިކުރި މެންބަރުންނާއި ފައްޔާޒަށް އިތުބާރު އޮތްކަމަށް ހާމަކުރި މެންބަރުން އުނިކުރި ނަމަވެސް އަދިވެސް ވަކިކޮޅެއް އިޚްތިޔާރުކުރިން ނޭގޭ 33 އެމްޑީޕީގެ މެންބަރަކު އެބަތިއްބެވިއެވެ. އެހެންކަމުން މިމައްސަލަ މަޖިލީހަށް ވައްދައިފިނަމަ ފޯރި ގަދަވާނެކަމަށް ބެލެވެއެވެ.
މިނިސްޓަރު ފައްޔާޒުގެ އިތުބާރު ނެތްކަމުގެ މައްސަލަ މަޖިލީހަށް ވައްދަން އުޅޭވާހަކަ ދެކެވެނިކޮށް އަނެއްކާވެސް އާވަހަކައެއްމިވަނީ ފެންމަތިވެފައެވެ. އެއީ އެމްޑީޕީގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައެއްގެ ވާހަކައެކެވެ. ސަރުކާރާއި ދެކޮޅު ވާހަކަ ގެނެސްދޭ ދިޔަރެސް އޮންލައިނުން މިވަނީ މިޚަބަރު ގެނެސްދީފައެވެ. ދިޔަރެސް އިން އެފަރާތަށް ލިބުނު މައުލޫމާތެއް ކަމަށް ބުނެ ރިޕޯޓުކޮށްފައިވަނީ ރައީސް ނަޝީދު މަގާމުން ދުރުކުރުމުގެ މަސައްކަތުގައި އިސްކޮށް އުޅުއްވަނީ އެކޮނޮމިކް މިނިސްޓަރު ފައްޔާޒު އިސްމާއިލް އާއި ފިނޭންސް މިނިސްޓަރު އިބްރާހިމް އަމީރު އަދި ފޮރެން މިނިސްޓަރު އަބްދުﷲ ޝާހިދު ކަމަށެވެ. އެ ތިން ބޭފުޅުން ދަނީ، އެމްޑީޕީގެ މަޖިލީސް މެމްބަރުންނާއި، އިދިކޮޅު ބައެއް މެމްބަރުން އަދި މިނިވަން މެމްބަރުންނާއި މިކަމާއި ގުޅޭ ގޮތުން މަޝްވަރާ ކުރަމުންކަމަށްވެސް އެނޫހުން ވަނީ ރިޕޯޓުކޮށްފައެވެ.
ނަމަވެސް މިނިސްޓަރު ފައްޔާޒު ސަން އޮންލައިނަށް ވިދާޅުވެފައިވަނީ އެފަދަ އެމަނިކުފާނުގެ އިތުބާރު ނެތްކަމުގެ މައްސަލައާއި ގުޅިގެން އެއްވެސް ކަމެއް ނުކުރައްވާ ކަމަށެވެ. “މި މައްސަލައަށް ތާއީދު ކުރައްވަނީ އަދި ނުކުރައްވަނީވެސް ކޮން ބައެއްތޯ ނުބައްލަވާ ކަމަށެވެ. އަދި މި މައްސަލަ ފެއިލްކޮށްލުމަށް ވެސް އަދި ކާމިޔާބު ކުރުމަށް ވެސް މަސައްކަތް ނުކުރައްވާނެ ކަމަށް އޭނާ ވިދާޅުވި” ކަމަށް ސަން އޮންލައިނުން ރިޕޯޓުކުރެއެވެ.
މިސަރުކާރުގެ އެންމެ ނުފޫޒުގަދަ މިނިސްޓަރު ކަަމަށްވާ ފޮރިން މިނިސްޓަރާއި ފައްޔާޒު އިސްމާއީލް ގެ ޓީމާއި ރައީސް ނަޝީދު ގެ ޓީމުގެ ކޯޅުމުގެ ވާހަކަ ސޯޝަލް މީޑިއާއާއި ސައިހޮޓާ ތަކާއި ހޮޅުއަށީތަކުގައި ވަނީ މީގެ ކުރިން ދެކެވިފައެވެ. ރައީސް ނަޝީދުގެ އިތުބާނެތްކަމުގެ މައްސަލައިގެ ވާހަކަ އާއި މިނިސްޓަރު ފައްޔާޒުގެ އިތުބާރު ނެތްކަމުގެ ވާހަކަދެކެވެން ފެށުމާއިއެކު އެވާހަކަތަކަށް އިތުރު ބުރަދަނެއް ލިބެއެވެ. މިދަނީ ހަމަ ހަގީގަތުގައިވެސް އެބުނާ ކޯޅުމުގެ ފެށުންނޫންބާވައެވެ. ބާރު ގަދައީ ކޮންބައެއް ހެއްޔެވެ. ނޫނީ އަނެއްކާވެސް މިމައްސަލަ މިވަގުތަށް އޮބިގެން ހިގައިދާނެ ހެއްޔެވެ. މިއީ ހައްތާވެސް ޖަވާބު ނުލިބޭ ސުވާލުތަކެވެ. ކުރިއަށް އޮތް ދުވަސްތަކުގައި ކޮންމެވެސްކަހަލަ ޖަވާބެއް ލިބިދާނެއެވެ.
ޚިޔާލުތައް