އިބްރާހިމް ލަތީފް ވީޑިއޯ މަންޒަރު ހިއްސާކުރުމަށް މަޝްހޫރު ސީނުކަރައިގެ ޓިކްޓޮކް އެމެރިކާގައި ބޭން ކުރާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. ޓްރަމްޕް މިހެން ވިދާޅުވެފައިމިވަނީ ޓިކްޓޮކަކީ ސީނުކަރައިން ޖާސޫސުކުރުމަށް ބޭނުންކުރާ ވަސީލަތެއްކަމަށް އެމެރިކާގެ އޮފިޝަލުން ތުހުމަތުވެސް ކޮށްފައިވަނިކޮށެވެ.
އެމެރިކާގެ އޮފިޝަލުންނާއި ގާނޫނުހަދާ ފަރާތްތަކުން ދާދިފަހުން ވަނީ ޓިކްޓޮކަކީ ސީނުކަރައިން ޖާސޫސުކުރުމަށް ބޭނުންކުރާކަމަށް ބުނެފައެވެ. ނަމަވެސް، ޓިކްޓޮކް ކުންފުނިން މިކަން ދޮގުކުރެއެވެ. އެމެރިކާއިން ޓިކްޓޮކް ބޭން ކުރާނެ ވާހަކަ އެމެރިކާގެ ރައީސް ދެއްކެވުމުގެ ކުރިން ޓިކްޓޮކްގެ އެމެރިކާ އޮޕަރޭޝަން ޓިކްޓޮކްގެ މައިކުންފުނި ބައިޓް ޑާންސްއިން ދޫކޮށްލުމަށް ހުށަހަޅަންއުޅޭކަމަށް މީޑިއާތަކުން ރިޕޯޓްކޮށްފައިވެއެވެ.
ރިޕޯޓަރުންނާއި ބައްދަލުކުރައްވަމުން ޓްރަމްޕް ވިދާޅުވެފައިވަނީ އެމެރިކާއިން ޓިކްޓޮކް ބޭންކުރާނެކަމަށެވެ. އިގްތިސާދީ ކުއްލިހާލަތު ނުވަތަ އެގްޒެކްޓިވް އޯޑަރެއް ބޭނުންކޮށްގެން ވަރަށް އަވަހަށް ޓިކްޓޮކް ބޭން ކުރާނެކަމަށްވެސް ޓްރަމްޕް ވިދާޅުވިއެވެ.
ޒުވާނުން މަގްބޫލުކަން ލިބިފައިވާ ޓިކްޓޮކުގެ އެއްބިލިއަން ޔޫޒާ ރަޖިސްޓާކޮށްފައިވާ ކަަމަށް ރިޕޯޓްތައް ބުނެއެވެ. އެމެރިކާގެ މިތުހުމަތުތައް ދޮގުކޮށް ޓިކްޓޮކުގެ ސީއީއޯ ކެވިން މޭޔާ ވިދާޅުވަނީ އެފަރާތުގެ އެއްވެސް ޚިދުމަތެއް ސިޔާސީ މަންފާއަށް ބޭނުންނުކުރާކަމަށެވެ. އަދި ސިޔާސީ އިޝްތިހާރުތައްވެސް އެޕްލެޓްފޯމުގައި ބޭނުންނުކުރާކަމަށެވެ.
ޚިޔާޅުފާޅުކުރުމުގެ މިނިވަންކަމަށް އެންމެ ބޮޑަށް ވަކާލާތުކުރާ އެމެރިކާއިން ޓިކްޓޮކް ބޭން ކުރުމަށް ނިންމިއިރު ސީނުކަރައިގެ ވާދަވެރި އިންޑިއާއިންވަނީ ސީނުކަރައިގެ އެތަށް އެޕްލިކޭޝަނެއް އިންޑިއާގައި ބޭންކޮށްފައެވެ. އޭގެތެރޭގައި ޓިކްޓޮކްވެސް ހިމެނެއެވެ.
ޚިޔާލުތައް