މުހައްމަދު ޝިހާބް ފުވައްމުލައް ސިޓީ ނަރުދަމާގެ މައްސަލަތަކަށް ދާއިމީ އަވަސް ހައްލެއް ނުހޯދިއްޖެނަމަ ކޮވިޑް-19އަށް ވުރެ ބޮޑު ބައްޔަކަށް ރައްޔިތުން ހުށަހެޅިދާނެ ކަމުގެ ބޮޑު ކަމަށް ފުވައްމުލައް ސިޓީ ޑެޕިއުޓީ މޭޔަރ މުހައްމަދު ޟިރާރު ވިދާޅުވެއްޖެއެވެ.
ޑެޕިއުޓީ މޭޔަރ މިހެން ވިދާޅުވީ ފުވައްމުލައް ސިޓީގެ ނަރުދަމާގެ މައްސަލައަށް ހައެއްލެއް ލިބޭނެ ދުވަހެއް ނޭގޭތީ ކަމަށް ބެލެވެއެވެ. ފުވައްމުލަކުގެ ނަރުދަމާ ނިޒާމު ހިންގާ ބެލެހެއްޓުމަށް ހަވާލުވެފައި ވަނީ ފެނަކަ ކޯޕަރޭޝަނާއެވެ. ފެނަކަ ކޯޕަރޭޝަނުން ދާދި ފަހުން ބުނެފައި ވަނީ ފުވައްމުލަކުގެ ނަރުދަމާ ނިޒާމުގެ މައްސަލަތައް ހައްލުކުރުމަށް ސަރުކާރުން ބަޖެޓު ހުށަހަޅާފައި ވީނަމަވެސް ބަޖެތް ލިބިފައިނުވާ ކަމަށެވެ. އެ މަސައްކަތަށް ބޭނުންވާ ފައިސާގެ ތަފުސީލް ޚަރަދުތަށް ސަރުކާރަށް ހުށަހަޅާފައިވާ ކަމަސް ވެއެވެ. ނަމަވެސް އެ މަސައްކަތަކަށް ފައިސާ ހަމަނުޖެހި ގިނަ ދުވަސްތަކެއް އަންނަނީ ހޭދަވަމުންނެވެ. ބޭރުގެ މާހިރުންނާއެކު އެތައް ސާވޭއެއްކޮށް ގެންނަން ޖެހޭ ބަދަލުތައް ވެސް ހުށަހަޅާފައިވާތާ ދުވަސް ތަކެއް ވެއްޖެއެވެ.
އެއިގެ ފަހުން އެމްޑަބްލިޔުއެސްސީ އިން އަނެއްކާވެސް ވަނި ނަރުދަމާ ނިޒާމުގެ ސާވޭއެއް ކޮށްފައެވެ. އެއި ތިމާވެއްޓާއި އެނަޖީ މިނިސްޓްރީ އަދި ޕްލޭނިން މިނިސްޓރީގެ އެދުމަކަށް ކުރެވުނު ސާވޭއެއްކަމަށް ވެއެވެ. ނަމަވެސް އެސާވެގެ މައުލޫމާތު އަދި ހާމަކޮށްފައެއް ނުވެއެވެ.
ފުވައްމުލަކުގެ މަގުތަކުގައި ކޮންމެ ދުވަހަކު ހެން މިހާރުވެސް ނަޖިސް ފެންގަނޑުތައް އޮވެއެވެ. ޖަންކްޝަންތަކުން ލީކުވާ ފެނުގެ ބައެއް ރަށުގެ އެކިއެކި ދިމާތަކުން މަގުމައްޗަށް ޖަމާވެފައި ހުންނަތަން އާއްމުކޮށް ފެނެއެވެ. އެއިން ދޭހަކޮށް ދެނީ ފުވައްމުލަކުގެ ބިމުގެ ފެންގަނޑު ނަޖިހުން ތަޣާއްޔަރުވެފައިވާ ކަމެވެ. ރަށުގެ ގިނަބަޔަކު އަދިވެސް މުޅިންހެން ބޭނުންކުރަނީ ބިމުންނަގާ ވަޅުފެނަށް ވުމުން ނުރައްކާތެރި ބަލިމަޑުކަމެއް ފެތުރުމުގެ ފުރުސަތު ވަނީ ބޮޑުވެފައެވެ.
ފުވައްމުލަކު ނަރުދަމާ ނިޒާމު ފުރިގެން ގެން ބަންޑުންވާތީ މަގުމަތީ ޖަންކްޝަންތައް ހިއްކުމުގެ މަސައްކަތް ކުރަމުންދޭ. ފޮޓޯ؛ ފެނަކަ-ފުވައްމުލައް
ފެނަކަ-ފުވައްމުލައް އިން ޖަންކްޝަންތަކަށް ޖަމާވާ ނަޖިސްތައް ނަގައިގެން ޓްރީޓްމެންޓް ސްޓޭޝަނަށް އުފުލިއަސް ރަށުގެ ފެން ރައްކާތެރިކުރުމަށް ކުރެވެނެ މާބޮޑު ކަމެއް ނެތެވެ. ރަށުގައި ގިނައިން ބޭނުންކުރާ ވަޅުފެން ރައްކާތެރިކުރެވެނީ ރަށުގެ ފެންފަށަލަ ހިމާޔާތްކުރެވޭނެ ގޮތަކަށް ކަންކަން ބައްޓަން ކުރެވިގެނެވެ. ސެޕްޓިކް ޓޭންކް (ނަޖިސް ޖަންކްޝަން) ތަކުން ލީކުވާ ލިކުވުން ހުއްޓުވިގެންނެވެ. މިކަމަށް ހައްލެއް ނުލިބޭނަމަ ނުރައްކާތެރި ބަލިމަޑުކަމަކަށް ދިއުން ގާތެވެ.
ތަޣައްޔަރުވެފައިވާ ވަޅުފެން ނުވަތަ ބިމުން ނަގާފެނުން ޖެހޭ ނުރައްކާތެރި ބަލިތަކުގެ ތެރޭގައި:
ޝިގެއްލާ، ހެޕަޓައިޓްސް އޭ،
ނޯރޯވައިރަސް، ގިއާޑިއާ،
ކެމްޕީލޮބެކްޓާ، ސެމޮނެލާ
ކްރިޕްޓޯސްޕޯރިޑިއަމް އާއި އީ.ކޮލި ހިމެނެއެވެ.
އެކެރިކާގެ ސީޑީސީ (ސެންޓާ ފޯ ޑިޒީޒް ކޮންޓްރޯލް) އިން ހާމަކޮށްފައިވާ ގޮތުގައި ބިމުން ނަގާ ފެން، އިންސާނުންގެ ނަޖިހާއި އެކުވެ ތަޣައްޔަރުވުމުން ޖެހޭ މިބަލިތަކުގެ ސަބަބުން 2009 އިން ފެށިގެން 2017 ވަނަ އަހަރާއި ހަމަޔަށް 96 ބަލިމަޑުކަމެއް ފެތުރިފައިވާ ކަމަށް އެއިދާރާއަށް ރިޕޯޓް ކުރެވިފައި ވެއެވެ. ވުމާއެކު އެފަދަ ބަލި މަޑުކަމެއް ފެތުރުމުގެ ކުރިން ރައްކާތެރިކަމުގެ ފިޔަވަޚު އަލަން ޖެހެއެވެ. ރައްކާތެރިވާން ފިޔަވަޅު އަޅަންޖެހެނީ ހަމައެކަނި ކޮވިޑް-19 އަކަށް ނޫނެވެ. ހުރިހާ ބަލިމަކަމަކުން ރައްކާތެރިވެ ތިބުމަށް ފިޔަވަޅު އަޅަންޖެހެއެވެ.
ފުވައްމުލަކުގެ ނަރުދަމުގެ ލީކުކަތުގެ އުނދަގޫ ބޮޑުވެ ރައްޔިތުން ޝަކުވާތައް އޮއްސަމުން އަންނަތާ އެތައް ދުވަހެއް ވެއްޖެ.
ފުވައްމުލައް ސިޓީގެ ފެނާ ނަރުދަމާ ނިޒާމުގެ އަމަލީ މަސައްކަތް ފެށީ 2016 އޮކްޓުބަރ 10 ވަނަ ދުވަހު ހަވީރު 03:30 ގައި ފުވައްމުލަކު ސިޓީ އެއާޕޯޓްގައި އޭރުގެ މިނިސްޓްރީ އޮފް އެންވަޔަރމެންޓް އެންޑް އެނާރޖީގެ ފަރާތުންނެވެ. އެއިގެ 2 އަހަރު ފަހުން އަމަލީ މަސައްކަތް ނިމިފައިވާކަމަށް ބަލައި ފެނާ ނަރުދަމާ ނިޒާމުގެ ރަސްމީކޮށް ހުޅުވާ ޚިދުމަތް ދޭން ފެށުނު ފަހުން ވެސް އަންނަ އޮކްޓޯބަރު މަހު 9 އަށް 2 އަހަރު ފުރެނީއެވެ. ނަމަވެސް “އަދިވެސް އަމަލީ މަސައްކަތް ކުރުން ނޫން ކަމެއް ކުރެވޭ ވަރު ނުވުމަކީ މިސިޓީގެ ރައްޔަތުންނަށް ކުރާ ޖެއްސެމެއް ތޯ؟” ފުވައްމުލައް ސިޓީގެ ޑެޕިއުޓީ މޭޔަރު ސުވާލު ކުރެއެވެ.
“މަގުތަކުގައި އަދިވެސް އޮތީ ނަޖިސް ފެންގަނޑު ތަައް. މިކަމުގެ ސަބަބުން މިމަޝްރޫއު ހިންގުމުގެ އަސްލު މަގުސަދު މިވަނީ ގެއްލި ގޮސްފައި. ގިނަ ގޭގެއިން އަދިވެސް ނަޖިސް ހިންދަނީ ގޯތި ތެރެއަށް. ނިޒާމު ގުޅާފައި ހުރި ގޭގޭގެ ނަޖިސް ހިންދަނީ މަގުމައްޗަށް. މިކަމަށް ދާއިމީ އަވަސް ހައްލެއް ނުގެނެވިއްޖެ ނަމަ މުޅި ރައްޔަތުން ކޮވިޑް-19 އަށް ވުރެ ބޮޑު ބައްޔަކަށް ހުށައެޅިގެން ދާނެ” ކަމަށް ޑެޕިއުޓީ މޭޔަރ މުހައްމަދު ޟިރާރު ވިދާޅުވެ ކަންބޮޑުވުން ފާޅުކުރައްވައެެވެ.
ޚިޔާލުތައް