މުހައްމަދު ޝިހާބް ކުރީގެ ރައީސް ޔާމީނުގެ ޖަލުހުކުމް ދަމަހައްޓަން ހައިކޯޓުގައި އިސްތިއުނާފު މައްސަލަބެލި ފަނޑިޔާރުންގެ އަޣުލަބިއްޔަތުން ނިންމައިފިއެވެ. އެއާއެކު މަނީ ލޯންޑަރިންގެ ކުށުގެ އަދަބެއްގެ ގޮތުން ކުރީގެ ރައީސް ޔާމީނުން 5 އަހަރު ޖަލުގައި ހޭދަކުރަން ޖެހުމާއި 5 މިލިޔަން ރުފިޔާން ޖުރީމައިނާ ދައކަން ޖެހޭނެއެވެ.
ރައީސް ޔާމީނުގެ ފަރަތުން ހައިކޯޓުގައި އިސްތިއުނާފުކުރި މައްސަބެލީ 3 ފަނޑިޔާރުންގެ ބެންޗަކުންނެވެ. މި މައްސަލައިގައި ދެފަރާތުން ވެސް ވަކާލާތުކުރުމުގައި އިސްކޮށް ތިއްބެވީ ފުވައްމުލަކަށް ނިސްބަތްވާ ވަކީލުންނެވެ.
އެގޮތުން ދައުލަތުގެ ވަކީލާ އާއިޝަތު މުޙައްމަދު އާއި ދިފާޢީ ވަކީލު ކުރީގެ އިންތިޚާބީ ނާއިބު ރައީސް މަހައްމަދު ޖަމީލު އަހުމަދު ފެނިގެންދިޔައީ މިމައްސަލާގައި ދެފަރާތުގެ އިސްވަކީލުންގެ ގޮތުގައެވެ.
ރައީސް ޔާމީނުގެ ދިފާއީ އިސް ވަކީލު ޑރ.މުހައްމަދު ޖަމީލު އަހުމަދު
މައްސަލައިގެ އަޑުއެހުންތައް ލައިވް ނުކުރި ކަމުގައިވިޔަސް އިއްޔެ ބޭއްވި ހުކުމް ކުރުމުގެ މަޖުލިސް ލައިވްކޮށް ދައްކާފައި ވެއެވެ. ވުމާއެކު މައްސަލއިގެ ގިނަ ކަންތައްތަކެއް އާއްމުންނަށް ވަނީ ތިލަވެ އެނގިގެން ގޮސްފައެވެ.
ޕީޕީއެމްގ،ެ ވެރިކަމުގައި (2015-2017) ހިންގި އެމްއެމްޕީއާރުސީގެ ބޮޑު ޚިޔާނާތުގެ ތެރެއިން ހިންގި މަނީލޯންޑަރިންގެ ކަންތަކެއްގައި ރައީސް ޔާމީނުގެ އެކައުންޓަށް އެސްއޯއެފް އިން ދެ ޗެކަކުން އެއްލަކަ ޑޮލަރު ޖަމާކުރި މައްސަލަ ފެންމަތިވެ އެކަން އޭސީސީއިން އިން ރައީސް ޔާމީނުގެ ސަމާލުކަމަށް ގެނައެވެ. އަދި އެފައިސާ ބޭނުންނުކޮށް ދައުލަތަށް އަނބުރާ ދިނުމަށް އޭސީސީއިން އެދުމުން ޔާމީނު އެކަމަށް އެންމެ ފުރަތަމަ ދެކޮޅުހެއްދެވިއެވެ. އަދި އޭސިސީއިން އެފައިސާގެ މައްސަލަ ތަހުގީގުކުރާކަން ހާމަކޮށް ފައިވަނިކޮށް ޔާމީނު ވަނީ އެފައިސާ އެމްއައިބީގެ އިންވެސްޓްމަންޓް އެކައުންޓަކަށް ޖަމާކުރައްވައި އެފައިސާއިން ފައިދާ ހޯއްދަވަން ފައްޓަވާފައެވެ.
ދައުލަތުގެ ސީނިއަރ ޕޮސެކިއުޓަރ އާއިޝަތު މުހައްމަދު.
ފަހުން ޔާމީން އެއްބަސްވީ އެކްސްރޯ އެކައުންޓެއްގައި އެފައިސާ ބަހެއްޓުމަށެވެ. އެހެންގޮތަކަށް ބުނަނީނަމަ މަނީލޯންޑަރިންއަށް ޝައްކުއުފެދިފައިވާ ފައިސާ ބޭނުންކޮށްފައިވާ ވިޔަފާރީ މުއާމަލާތް ރޫޅާލައި އެފައިސާ އިން މަލީ ފައިދާ ހޯދުން ހުއްޓާލުމަށެވެ. އެގޮތުން ޔާމީނު އެފައިސާ މަނީލޯންޑަރ ކުރުމުގެ ގޮތުން ބޭނުންކުރެއްވީ ކަމުގައި ގާނޫނީގޮތުން ބެލުމުގެ ފުރުސަތު ބަންދުވެގެންދާނެތީއެވެ. ނަމަވެސް ޔާމީނު އަމަލުކުރެއްވީ އެއްބަސްވުމާއި އެއްގޮތަކަށް ނޫނެވެ. އެފައިސާ ހުރިގޮތަށް ބަހައްޓާވާފައި އެހެންގޮތަކުން ފައިސާހޯއްދަވައި އެކްސްކްރޯ އެކައުންޓަށް ޖަމާކުރެއްވީއެވެ.
ރައީސް ޔާމީނުގެ ވެރިކަން ނިމި މަނީލޯންޑަރިންގެ ދައުވާ ކުރެވި ކުރިމިނަލް ކޯޓުން ރައީސް ޔާމީނުގެ މައްޗަށްކުށް ސާބިތުވެ 5 މިލިޔަން ޑޮލަރުން ޖޫރިމަނާ ކުރެވި، 5 އަހަރުގެ ޖަލުހުކުމެއް އިއްވި މައްސަލަ ހައިކޯޓުގައި އިސްތިއުނާފު ކުރުމުން އެމައްސަލަ ވެސް އިއްޔެ ނިމިގެން އެދިޔައި ޔާމީނުއާއި ދެކޮޅަށެވެ.
ހައިކޯޓުގެ ފަނޑިޔާރުންގެ މަޖުލިސް
އިއްޔެ 5 ގަޑިއިރަށް ދިގުދެމިގެން ދިޔަ ހުކުމް އިއްވުމުގެ މަރުހާލާގައި އިސްފަނޑިޔާރާއި އިތުރު އެއްފަނޑިޔާރުގެ ރައުޔު މުޅިންހެން އެއްގޮތް ވެގެން ދިޔައެވެ. ނަމަވެސް 3 ވަނަ ފަނޑިޔާރުގެ ރައުޔުތައް ގިނަ ކަންކަމުން ވަރަށް ބޮޑުތަނުން ތަފާތު ވެފައިިއެވެ. 3 ވަނަ ފަނޑިޔާރުގެ ރައުޔުގައި ބޮޑަށް ފާހަގަ ކުރެވުނީ ދަށުކޯޓުގެ މައްސަލައިގެ މަރުހަލާގައި ޔާމީނަށް ލިބެންވާ ހައްގުތައް ފުރިހަމައަށް ނުލިބޭ ކަމަށެވެ. އަދި ގާނުނޫ މާނަކުރުމުގައި އަނެއް ދެ ފަނޑިޔާރުންނާއި މުޅިން އިދިކޮޅަށް ރައުޔުތައް ގެނެސްފައިވާ ގިނަ ކަންތަކެއް ވެސް ހުއްޓެވެ.
އިއްޔެގެ ހުކުމް އިއްވުމުގެ ޝަރީއަތުގައި މުޅިވަގުތުގެ 2/3 ގައި ވާހަކަ ދެއްކެވީ 3 ވަނަ ފަނޑިޔާރެވެ. އޭނާގެ ވާހަކާގައި ދިފާއީ ވަކީލުންގެ ފަރާތުން ހުށަހެޅުއްވި 75 ނުކުތާ ވަކިވަކިން ތަކުރާރުކޮށް ކިޔުއްވިއެވެ. ނަމަވެސް އަނެއް ދެފަނޑިޔާރުން އެޕޮއިންޓްތައް ގެންނެވީ ތަކުރާރުނުކޮށް ޚުލާސާކޮށެވެ.
ރައީސް ޔާމީނު ހަިއކޯޓުގެ އިސްތިއުނާފު ޝަރީއަތުގައި. 21 ޖެނުއަރީ 2021
މަތީމަރުހާލާގެ ކޯޓުތަކުގެ ހުކުމް ތަކަކީ އަޣުލަބިއްޔަތުން ނިމޭ ހުކުމްތަތަކެއް ކަމަށްވުމުން، އިއްޔެގެ ހުކުމް ވެސް ނިމިގެން ދިޔައީ ދެ ފަނޑިޔާރުން ބުރަވި ގޮތަށެވެ.
މިމައްސަލަ ރައީސް ޔާމީނުގެ ފަރާތުން ސުޕްރީމް ކޯޓުގައި އިސްތިއުނާފު ކުރާނެ ކަމަށް ވަކީލުން ވަނީބުނެފައެވެ. އެގޮތުން ދަށުކޯޓުގެ ހުކުމުގައިވާ ޖޫރިމައިނާގެ ފައިސާ ނުދައްކައި މަޑުކޮށްލެވޭނެ ފުރުސަތެއް ހުޅުވިގެންދާނެއެވެ.
ޔާމީނުގެ އިތުރު ޝަރީއަތެއް ވެސް ދަށުކޯޓުގައި މިހާރު ކުރިޔަށްދެއެވެ. އެ ޝަރީއަތުގައި ވެސް ދިފާއީ އިސް ވަކީލަކީ ޔާމީނުގެ ބާރާއި ނުފޫޒުން “ނުހައްގުން” ނާއިބު ރައީސްގެ މަގާމު ގެއްލުވާލި ޑރ.މުހައްމަދު ޖަމީލު އަހުމަދެވެ.
ސިޔާސީ ގޮތުން ދެ ބައިވެފައިވާ މީހުންގެ ތެރެއިން އެއްބަޔަކަށް މިހުކުމް ކަމުނުދާނެއެވެ. އަދި އަނެއްބަޔަކަށް އެހުކުމް ރަނގަޅުވާނެއެވެ. އެއި ދުނިޔޭގެ އާދައެވެ.
މައްސަލައިގެ ލައިވް ވިޑިއޯ ލިންކް 2
ޚިޔާލުތައް