މުހައްމަދު ޝިހާބް ކުށުން ދުރުހެލިވުމަށް ހޭލުންތެރި ކުރުމުގެ ގޮތުން ޏ. އަތޮޅު ތައުލީމީ މަރުކަޒުގެ ދަރިވަރުންނަށް މައުލޫމާތު ދިނުމުގެ ސެޝަނެއް ފުވައްމުލައް ސިޓީ ޕޮލިސް ސްޓޭޝަނުން ކުރިއަށް ގެންގޮސްފިއެވެ.
މިއީ ސްކޫލްތަކުގެ ދަރިވަރުން ކުށުން ދުރުހެލިކުރުވައި ހޭލުންތެރި ކުރުވުމަށް ފުލުހުން ކުރަމުންދާ މަސައްކަތްތަކުގެ ތެރެއިން ޏ.އޭއީސީގެ އެދުމަކަށް ފުލުހުން ކުރިޔަށް ގެނދިޔަ ސެޝަނެއްކަމަށް ފުލުހުންގެ ފަރާތުން ހާމަކޮށްފައި ވެއެވެ.
މިދިޔަ ބުދަ ދުވަހު (18 ޖެނުއަރީ 2021) ކުރިޔަށް ގެންދި ޔަ މިސެޝަންގައި އެސްކޫލުގެ ގްރޭޑް 7 އަދި 8 ގެ 90 ދަރިވަރުން ބައިވެރިވެފައި ވެއެވެ.
ޏ.އޭއީސީގެ ދަރިވަރުން އުނގެނުމުގެ ހަރަކާތެއްގައި، ފޮޓޯ: ޏ.އޭއީސީ
މި ސެޝަނުގައި ކުޑަކުދިންނަށް ލިބޭ އަނިޔާތަކާއި އެ އަނިޔާތަކުން ރައްކާތެރިވުމާއި އަދި ކުށުގެ ވެށިން ދުރުހެލިވުމަށް ދަރިވަރުންގެ އުމުރާ ގުޅޭގޮތަށް މައުލޫތު ދީފައިވާކަމަށް ހާމަކުރެއެވެ. އެގޮތުން ސްކޫލު މާހައުލާއި މުޖުތަމިއު އަދި ގޭގެ ތެރެއިން މީހެއްގެ ނުވަތަ ބައެއްގެ ފަރާތުން ލިބޭ ޖިސްމާނީ އަނިޔާއާއި ނަފްސާނީ އަނިޔާއަކީ ކޮބައިކަމާއި އެފަދަ އަނިޔާއެއް ލިބެމުންދާނަމަ އެކަން ސިއްރުނުކޮށް އިތުބާރު ކުރެވޭ މީހަކާ ހިއްސާކުރާނެ ގޮތްތައް ދަރިވަރުންނަށް ހުށަހަޅާދީފައިވެއެވެ. އަދި އެފަދަކަމުން ސަލާމަތްވެ ރައްކާތެރިވުމަށް ކުރެވިދާނެ ކަންކަން ކިޔައިދީފައިވެއެވެ.
މިސެޝަނުގައި އިންޓަނެޓުގެ ޒަރީއާއިން ކުރިމަތިވާ ނޭދެވޭ ކަންކަމުގެ މައުލޫމާތު ވެސް ދީފައިވެއެވެ. އެގޮތުން ސައިބަރ ބުލީންއަކީ ކޮބައިކަމާއި އެފަދަ ކަމެއް ދިމާވެއްޖެނަމަ ބެލެނިވެރިންނާ ގުޅިގެން ހައްލުކުރާނެ ގޮތްތައް ކިޔައިދީފައިވެއެވެ. އަދި ސައިބަރ ބުލީގެ ޝިކާރައަކަށްވެއްޖެނަމަ އެކަމުން ސަލާމަތްވުމަށް އެހެން މީހުންގެ އެހީތެރިކަން ހޯދާނެ ގޮތާއި ސޯޝަލް މީޑިއާގެ ހުރި ފައިދާތަކާއި ގެއްލުންތައް ދަރިވަރުންނަށް ބުނެދީފައިވެއެވެ.
މީގެ އިތުން އިތުރުން، މުޖުތަމިއުގައި އުޅޭއިރު ދަރިވަރުން ސަމާލުކަން ދޭންވީ ކަންކަމާ ގުޅޭގޮތުން ވެސް މައުލޫމާތު ދީފައިވާކަމަށް ހާމަކޮށްފައި ވެއެވެ.
ޚިޔާލުތައް