މުހައްމަދު ޝިހާބް ފުވައްމުލަކުގެ މަޝްހޫރު ދީނީ އިލްމުވެރިޔާ އައްޝައިޚު މުހައްމަދު ރަޝީދު އިބްރާހިމް އިބްރާހިމް އިތުރަށް ކިޔަވާވިދާޅުވަމުން ގެންދެވި ޕީއެޗްޑީ ޕްރޮގްރާމްގެ ވައިވާ (VIVA VOCE) ކާމިޔާބުކަމާއެކު ނިންމަވާލައްވައިފިއެވެ. ތީސިސްގެ މައުޝޫއަކީ “ރާއްޖޭގައި އާއިލީ މައްސަލަތަކާއި އޭގެ ހައްލު، އިސްލާމީ ޝަރީއަތުގެ އަލީގައި” އެވެ.
ޝައިޚު ރަޝީދު ޕީއެޗްޑީ ހެއްދެވީ ދިވެހިރާއްޖޭގެ އިސްލާމިކް ޔުނިވަރސިޓީ (އައިޔޫއެމް) އިންނެވެ. އަރަބި ބަހުން ހެއްދެވި ތީސިސްގެ ދިރާސާ ކުރިޔަށްގެންދެވީ ފިގުހު އަދި އުސޫލް ފިގުހު އިން ކަމަށް އެ ޔުނިވަރސިޓީން ހާމަކުރެއެވެ. ޝައިޚު ރަޝީދުގެ ސުޕަވައިޒަރުންގެ ގޮތުގައި ތިއްބެވީ ރާއްޖެއިން ބޭރުގެ ދެބޭފުޅުން ކަމަށްވާ ޕްރޮފެސަރ ޑރ. އާރިފް އަލީ އާރިފް އާއި ޑރ. ހަސަން އަލް ކޯޑީ އެވެ. އަދި ތީސިސް ވަޒަން ކުރެއްވި ކޮމެޓީގައި ޑރ.އަބްދުﷲ ޖަމީލު އާއި ޑރ. އަބްދުސައްތާރު އަބްދުއް ރަހުމާނުގެ އިތުރުން ބޭރުގެ ދެ އެގްޒަމިނަރުން ކަމަށްވާ ޕްރޮފެސަރ ޑރ.މުހައްމަދު ރަޝީދު ބުއާޒަލް އާއި ޕްރޮފެސަރ ޑރ. މުހައްމަދު ޚައިރުލްޤަބާނީ ހިމެނުނެވެ.
ޝައިޚު މުހައްމަދު ރަޝީދު އިބްރާހިމް ގެ ޕީއެޗްޑީ ތައުކީނުކުރުމުގެ ތެރެއިން – ބައެއް އެގްޒަމިނަރުން
ދިވެހިރާއްޖޭގެ އިސްލާމިކް ޔުނިވަރސިޓީ (އައިޔޫއެމް) ގެ ފުރަތަމަ ޕީއެޗްޑީ ތައުކީނު ކުރުން އޮތީ އިއްޔެ އޮންލައިންކޮށެވެ. ޝައިޚު ރަޝީދު، އުމުރުން 78 އަހަރުގައި ޕީއެޗްޑީ މިހެއްދެވީ އެއިގެ ދަށު ލެވެލްގެ ކިޔެވުންތައް ނިންމާލެއްވުމަށް ފަހު ގިނަ ދުވަސްތަކެއް ވަންދެން މަސައްކަތުގެ މައިދާނުގައި އުޅުއްވުމަށްފަހު އުމުރުން ގިނަދުވަސްތަކެއް ވަފައި ވަނިކޮށެވެ. ޝައިޚު ރަޝީދު ވަނީ ދިވެހިރައްޖޭގެ އުއްތަމަ ފަނޑިޔާރުކަމާއި، އިސްލާމިކް ކަންތައްތަކާއި ބެހޭ ދިވެހިރާއްޖެގެ އެންމެމަތީ އޮފީހުގެ ވެރިޔާކަން ވެސް ގިނަ ދުވަހު ކުރައްވާފައެވެ. އަދި މިހާރުވެސް ދިވެހިރާއްޖޭގެ އިސްލާމް ދީނުގެ ކަންތައްތަކާއި ބެހޭ އެންމެމަތީ މަޖުލީހުގެ ރައީސްކަން ކުރައްވަމުން ގެންދަވައެވެ.
ޝައިޚު ރަޝީއުއާއި އެކު ދިވެހި ސަރުކާރުގައި މިނިސްޓަރު ލެވެލްގައި ގިނަ ދުވަސަތަކެއް ވަންދެން މަސައްކަތް ކުރެވި ޑރ. މުހައްމަދު ޒާހިރު ހުސޭން ވެސް ވަނީ މީގެ އަހަރުތަކެއް ކުރިން ޕީއެޗްޑީ ހާސިލުކުރައްވާފައެވެ. ޑރ. ޒާހިރު ޕީއެޗްޑީ ހެއްދެވީ ދީނީ ގަބޫލުކުރުން ތަކާއި (ތިއޮލޮޖީ) ގުޅޭ ގޮތުންނެވެ.
ޝައިޚު މ.ރަޝީދު އ. ގެ ޕީއެޗްޑީ ތައުކީނުކުރުމުގެ ތެރެއިން – ޑރ. ޒާހިރު ހުސޭން (މެދުގައި)
ޑޮކްޓަރ އޮފް ފިލޯސަފީ (ޕީއެޗްޑީ) ގެ ވައިވާ އަކީ އެންމެ ފަހުގެ މަރުހަލާގެ އިމްތިހާނުގެ ބައެވެ. މިބައިގައި އެދަރިވަރެއްގެ ދިރާސާގެ މަސައްކަތް އެއްކޮށް ނިންމައި އެގްޒަމިނަރުންނަށް ހުށަހަޅުއްވައި ދެއްވާންޖެހެއެވެ. އަދި އެހުށަހެޅުން ވަޒަންކުރުމަށް ފަހު އެގްޒެމިނަރުންގެ ކޮމެޓީން އެހުށަހެޅުމާއި މެދު ގޮތެއް ނިންމާނެއެވެ. އެގޮތުން ނިންމަނީ އެއްވެސް ބަދަލެއްނެތި އެތީސީސް ގަބޫލުކުރުން، ނުވަތަ، ކުދި ބަދަލުތަކާއެކު ގަބޫލުކުރުން، ނުވަތަ ބޮޑެތި ބަދަލުތަކާއެކު ގަބޫލުކުރުން ނޫންނަމަ އެއްވެސް ގޮތަކުން ގަބޫލުނުކޮށް އަލުން ހަދަން ޖެހުމެވެ.
ވުމާއެކު ޝައިޚު ރަޝީދުއަށް ދެން ޖެހިވަޑައިގަންނަވާނީ ބަދަލެއް ގެންނަވަންޖެހޭނަމަ އެބަދަލެއް ގެންނެވުމަށްފަހު ރަސްމީކޮށް އަލުން ޔުނިވަރސިޓީއަށް ތީސީސް ހުށަހެޅުއްވުމަށެވެ. އެއްވެސް ވަރެއްގެ ބަދަލެއް ނެތްނަމަ ދެން އޮންނާނީ ޔުނިވަރސިޓީއިން އިދާރީގޮތުން ޕީއެޗްޑީ ސެޓްފިކެޓް ރަސްމީކޮށް ދިނުމެވެ.
ޑޮކްޓަރ އޮފް ބިޒިނެސް، (ޑީބީ) އާއި ޑޮކްޓަރ އޮފް އެޑިއުކޭޝަން އަކީ ޕީއެޗްޑީއާއި މުޅިން ތަފާތު ދެ ދާއިރާއެއްގެ މަތީ ފަސްތަކެކެވެ. ޑީބީ އާއި ޑޮކްޓަރ އޮފް އެޑިއުކޭޝަން އަކި ޕްރެކްޓިކަލް ދާއިރާގެ ދެ ސަނަދެވެ. އެމީހުންނަކަސް ޕީއެޗްދީ އެކޭ ނުކިޔޭނެއެވެ. ނަމވެސް ނަމުގެ ކުރިޔަށް ޑރ. ލިޔެވޭނެއެވެ. އެއާއިޚިިލާފަށް ޕީއެޗްޑީ އަކީ ކިޔަވާ ދާއިރާއަކުން ތިއަރީ އާއި ފިލޯސަފީގެ ގޮތުން އުނގެނިގެންވާ މިންވަރު ހާމަކުރުމުގެ ގޮތުން ދެވޭ އެންމެ މަތީ އިލްމީ ސަނަދެވެ. އެސަނަދު ހާސިލުވުމުން ނަމުގެ ކުރިޔަށް ޑރ.، ނޫނީ ނަމުގެ ފަހަތަށް ޕީއެޗްޑީ މިދެގޮތުންކުރެ ކޮންމެ ގޮތަކަށްވެސް ލިވޭނެއެވެ.
ޝައިޚް ރަޝީދު ނޫނަސް ފުވައްމުލަކުގެ އެތައްބަޔަކު އެކި ދާއިރާތަކުން ޕީއެޗްޑީ ޙާސިލުކުރައްވާފައި ވެއެވެ. އަދި ޕީއެޗްޑީއަށް ކިޔެވުމުގެ މަރުހަލާގައި ވެސް ގިނަ ބަޔަކު އެބަތިއްބެވެ.
މިހާރު ޕީއެޗްޑީ ހާސިލުކުރައްވައިގެން ތިއްބެވި ފުވައްމުލަކުގެ މަޝްހޫރު ބޭފުޅުންގެ ތެރޭގައި ޑރ. މުހައްމަދު ޖަމީލު އަހުމަދު، ޑރ. އަބްދުލް ހަންނާނު ވަހީދު، ޑރ. ފަޒީލް ނަޖީބު ޑރ. އަބްދުﷲ ރަޝީދު އަހުމަދު ހިމެނިވަޑައިގަންނަވައެވެ.
ފުވައމްުލަކުން ޕީއެޗްޑި ހާސިލުކުައްވާފައިވާ މަޝްހުރު ބޭފުޅުން ( ޑރ. ޒާހިރު އަދި ޑރ. ރަޝީދު މަތީގައި)
މީގެ އިތުރުން ވެސް ފުވައްމުލަކުގެ ބޭފުޅަކު ޕީއެޗްޑީ ހާސިލުކުރައްވައިގެން ހުންނެވިކަން އެނގިލައްވާނަމަ ކޮމެންޓްގައި ލިޔެދެއްވުން އެދެމެވެ.
ޚިޔާލުތައް