އިބްރާހިމް ލަތީފް ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރާއި މަރާލާފައިވާ މީހުންނާއި، ގެއްލިފައިވާ މީހުންގެ މައްސަލަތައް ތަހުގީގުކުރާ ކޮމިޝަންގެ މެމްބަރު މިސްބާހު އައްބާސް ތާލިބާނުންގެ ހަގުރާމައިގެ ތަމްރީނުތައް ހެދިތޯ ބަލެމަށް ކަމާގުޅޭ ފަރާތްތަކަށް ލިޔެގެން ސާފުކުރުމަށް ރައްޔިތުންގެ މަޖިލީހުގެ ރައީސް އެމަޖިލީހުގެ އަމީން އާންމުގެ ފަރާތުން އެދިއްޖެއެވެ.
ރައްޔިތުންގެ މަޖިލީހުގެ ރައީސް ކުރީގެ ރައީސް މުހައްމަދު ނަޝީދު މިގޮތަށް އެދިވަޑައިގެންފައިވަނީ ރައްޔިތުންގެ މަޖިލީހުގެ ޖަލްސާގައި އިދިކޮޅު ޕީޕީއެމްގެ ނާއިބު ރައީސް، ނައިފަރު ދާއިރާގެ މެންބަރު ރައްިޔުތުންގެ މަޖިލީހުގައި މިއަދު ދެއްކެވި ވާހަކައަކާއި ގުޅިގެނެވެ. “މަރު ކޮމިޝަނުން ތަހުގީގުކުރާ މައްސަލަތަކުގައި ޒުވާނުންތަކަކަށް އިނގިލި ދިއްކުރަމުން އަންނައިރު މަރު ކޮމިޝަންގެ މެމްބަރު މިސްބާހާއި ކައުންޓާ ޓެރަރިޒަމް ކޮމިޓީގައި ވެސް ހިމެނިވަޑައިގަންނަވާ ނަޒީރު ތާލިބާނުންގެ ތަމްރީނު ހެދިތޯ ބަލައި، އެބޭފުޅުންގެ ފަސްބައި ބަލާލަންޖެހޭ” މިއަދުގެ ޖަލްސާގައި ޝިޔާމް ވިދާޅުވިއެވެ.
ޝިޔާމުގެ ވާހަކައާއި ގުޅިގެން މަޖިލީހުގެ ރައީސް އެ ދެބޭފުޅުންނަކީ ތިޔަ ވިދާޅުވާ ބާވަތުގެ ތަމްރީނެއްގައި ނުވަތަ ތި ވިދާޅުވާ ބާވަތުގެ ވިސްނުމަށް ލެނބިވަޑައިގެން ތިއްބެވި ދެ ބޭފުޅުންތޯ ސާފުކުރުމަކީ މި މަޖިލީހުން ކުރަންޖެހޭނެކަމަށެވެ. އަދި އެކަން ސާފުކުރުމަށް ކަމާއި ގުޅޭ ފަރާތްތަކަށް ލިޔުމަށް މަޖިލީހުގެ އަމީން އާންމުގެ އަރިހުން ރައްޔިތުންގެ މަޖިލީހުގެ ރައީސް އެދިވަޑައިގަތެވެ.
ސްޓޭޓް މިނިސްޓާ ނަޒީރަކީ އަދާލަތު ޕާޓީ ތަމްސީލުކުރާ މެންބަރެކެވެ. އަދި މިސްބާހަކީ ކުރިން ނޫސްވެރިކަމުގެ ދާއިރާގައި މަސައްކަތްކުރެއްވި ފަރާތެކެވެ.
ޚިޔާލުތައް