އިބްރާހިމް ލަތީފް ކުރިއަށް އޮތް ލޯކަލް ކައުންސިލް އިންތިހާބުގައި ފުވައްމުލައް ސިޓީ ކައުންސިލަށް ވާދަކުރާ އެމްޑީޕީ ކެންޑިޑޭޓުންގެ އުއްމީދަކީ ރައްޔިތުންގެ އުއްމީދުތައް ހާސިލްކޮށްދިނުން ކަމަށް ފުވައްމުލައް ކެންޑިޑޭޓުންގެ ފަރާތުން އިސްމާއިލް ރަފީގު ވިދާޅުވެއްޖެއެވެ.
އިސްމާއިލް ރަފީގު މިހެން ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބުގެ އެމްޑީޕީގެ ކެމްޕެއިން ރަސްމީކޮށް ލޯންޗްކުރަން ބޭއްވި އޮންލައިން ޖަލްސާގައި ފުވައްމުލަކުގައި ހުރެގެން ފުވައްމުލަކު ބަހުރުވައިން ވާހަކަ ދައްކަވަމުންނެވެ.
ކައުންސިލް އިންތިހާބުގައި ފުވައްމުލައް ސިޓީ މޭޔަރު ކަމަށް ވާދަކުރައްވާ އިސްމާއިލް ރަފީގު ވިދާޅުވީ 19 ވަނަ މަޖިލިސް އިން ގާނޫނަށް މުހިންމު ގިނަ އިސްލާހުތަކެއް ގެނެސް ލާމަރުކަޒީ ނިޒާމް އިތުރަށް ބާރުވެރިކޮށްފައިވާ ކަމަށާއި ގެނެވިފައިވާ އިސްލާހުތަކުގެ ބަދަލު ހެޔޮ ގޮތުގައި ހިފުމަށްޓަކައި ކައުންސިލަށް އިންތިހާބު ކުރަން ވާނީ ލާމަރުކަޒީ ފިކުރު ގަބޫލުކޮށް އޭގެ މަންފާ ރައްޔިތުންނަށް ހޯދައިދޭނެ ބައެއް ކަމަށެވެ. އަދި އެބަޔަކީ އެމްޑީޕީގެ ފަރާތުން ވާދަކުރާ ކެންޑީޑޭޓުން ކަމަށެވެ.
މި ޖަލްސާގައި އިތުރަށް ވާހަކަ ދައްކަވަމުން އިސްމާއިލް ވަނީ ސަރުކާރުން ވެފައިވާ ވައުދުތައް ހަނދާން ނުނެތޭ ކަމަށާއި އެވައުދުތައް ފުއްދުމަށް ކުރަންޖެހޭ ކަންކަން ސިޓީ ކައުންސިލުން ބަލައި ކުރުވާނެ ކަމުގެ ޔަގީންކަން ދެއްވާފައެވެ. އަދި ފުވައްމުލަކުގެ އިގްތިސާދާއި ވިޔަފާރީގެ ދާއިރާ އަށް މިހާރަށް ވުރެން ފުޅާކޮށް ބަދަލުތަކެއް ގެންނަވާނެ ކަމަށް ބުނެ ތަފްސީލު ހާމަކޮށް ކޮށްދެއްވިއެވެ.
މިގޮތުން އޭނާ އާއި އެކުގައި ފުވައްމުލައް ސިޓީ ކައުންސިލަށް ވާދަކުރާ ކެންޑިޑޭޓުންގެ އަމާޒަކީ ފުވައްމުލަކުގައި އިގްތިސާދީ ހަރަކާތްތައް އިތުރު ކުރުމުގެ ގޮތުން ފަތުރުވެރިކަން ކުރިއެރުވުމަށްޓަކައި ރަށް އިތުރަށް ޕްރޮމޯޓުކުރުމާއި، ރަށުގެ ދަތުރުފަތުރުގެ ނިޒާމް މިހާރަށް ވުރެ ފުޅާކޮށް އަދި މަސްވެރިން ބާނާ މަސް ކިރޭނެ އިންތިޒާމު ހަމަޖެއްސުމާއި ދަނޑުވެރިކަމަށް ދިމާވެފައިވާ ގޮންޖެހުންތައް ހައްލުކުރުމަށް މަސައްކަތް ކޮށް ދަނޑުވެރިކަމުގެ އުފެއްދުންތައް އިތުރު ކުރުމަށް ދަނޑުވެރިންނަށް އެއްބާރުލުން ދިނުން ހިމެނެއެވެ. އަދި ފުވައްމުލަކު ރައްޔިތުންނަށް ރަށުގައި ތިބެގެން ވަޒީފާ އަދާކުރެވޭނެ ތަފާތު ފުރުސަތު ހޯދައިދޭން މަސައްކަތް ކުރާނެ ކަމަށެވެ.
ކައުންސިލް އިންތިހާގުގެ ވޯޓަކީ ރައްޔިތުން އެމީހުންގެ މުސްތަގުބަލާއި ދޭތެރޭ ދެކޭ ގޮތް ނިންމަން ލިބޭ އެންމެ މުހިންމު ފުރުސަތުކަމަށް ވިދާޅުވެ އިސްމާއިލް އެދުނީ އޭނާގެ ވާހަކަތަކާއި މެދު ވިސްނާލުމަށްފަހު ފުވައްމުލައް ރައްޔިތުން އެދޭ ތަރައްގީ އާއި ކުރިއެރުން ހާސިލްކުރުމަށްޓަކައި ލޯކަލް ކައުންސިލް އިންތިހާބާއި އަންހެނުންގެ ތަރައްގީ އަށް މަސައްކަތް ކުރާ ކޮމެޓީގެ އިންތިހާބުގައި އެމްޑީޕީގެ ކެންޑިޑޭޓުންނަށް ވޯޓު ދިނުމަށެވެ.
ޚިޔާލުތައް