މުހައްމަދު ޝިހާބް ކެއަރ ސޮސައިޓީގެ ފަރާތުން މާލޭގައި ހިންގާ ކެއަރ ޑިވެލޮޕްމެންޓް ސެންޓަރުގައި ކިޔަވާ ޚާއްސައެހީއަށް ބޭނުންވާ ދަރިވަރެއްގެ އެއް އަހަރު ދުވަހުގެ ފީ އެމްޕީ ހުސޭން މުހައްމަދު ދީދީ ސްޕޮންސަރ ކުރައްވައިފިއެވެ.
މިކަމާއި ގުޅިގެން އެސެންޓަރުން ހާމަކުރެއްވީ، ރައްޔިތުންގެ މަޖުލީހުގެ ފުވައްމުލަކު މެދު ދާއިރާގެ މެމްބަރު ހުސޭން މުހައްމަދު ދީދީ ވަނީ އެސެންޓަރުގެ ޚާއްސައެހީއަށް ބޭނުންވާ ދަރިވަރެއްގެ އެއް އަހަރު ދުވަހުގެ ފީ ސްޕޮންސަރ ކޮށްދެއްވާފައި ކަމަށެވެ. އެކަމުގެ އެއްބަސްވުމުގައި ސޮއިކުރެއްވީ މިއަދު ހެނދުނު އެސެންޓަރުގައި ބޭއްވި ކުޑަ ރަސްމިއްޔާތެއްގައި ކަމަށެވެ.
ހުސޭން މުހައްމަދު – ފުވައްމުލަކު މެދު ދާއިރާ ގެ މެންބަރު
މިކަމާއި ގުޅިގެން އެމްޕީ ހުސޭން ވިދާޅުވީ އެހީއަށް ބޭނުންވާ ދަރިވަރެއްގެ ފީ ސްޕޮންސަރ ކުރެއްވުން އެއީ އޭނާއަށް ލިބި ވަޑައިގެންނެވި އުފަލެއް ކަމަށެވެ. އަދި އެފަދަ ކުދިންނަށް އެހީތެރިވެ ދެއްވުމަކީ އަބަދުވެސް ޝައުގުވެރިވެ ވަޑައިގަންނަވާ ކަމެއް ކަމަށެވެ.
މީގެ އިތުރުން އެކަމަށް ބާރު އަޅުއްވައި އެމްޕީ ހުސޭން ވިދާޅުވީ ތަނަވަސްކަން ލިބިފައިވާ ފަރާތްތަކުންނާއި ރައްޔިތުންގެ މަޖިލީހުގެ މެންބަރުން ވެސް، އެހީތެރިކަމަށް ބޭނުންވެފައިވާ އެފަދަ ފަރާތްތަކަށް އެހީތެރިވެ ދިނުމަކީ މުޅި މުޖުތަމިއަށް ވެވޭ ބޮޑު އެހީތެރިކަމެއް ކަމަށެވެ. މިއަދުގެ މުޖުތަމިއު ވަނީ އެފަދަ އެހީތަކަށް ބޭނުން ޖެހިފައެވެ.
ޚިޔާލުތައް