ދައުލަތުގެ ބެލުމުގެ ދަށުގައި ހުޅުމާލޭގައި ކުޑަކުދިން ބަލަހައްޓާ “ފިޔަވަތީ” ގައި ތިބި ކުދިންނަށް ރައްޔިތުންގެ މަޖިލީހުގެ ފުވައްމުލަކު މެދުދާއިރާގެ މެންބަރު ހުސޭން މުހައްމަދު ދީދީ އީދު ހަދިޔާގެ ގޮތުގައި އެކުދިންނަށް ޢީދު ހެދުން ހަދިޔާކޮށްފިއެވެ. އެމްޕީ ހުސޭން އާއިއެކު ތިނަދޫ ދެކުނުދާއިރާގެ މެންބަރު އެމްޕީ އަބްދުﷲ ސަނީފު ވެސް އެކުދިންނަށް އީދު ހެދުން ދެއްވިއެވެ.
އީދު ހެދުން ހަދިޔާކުރުން އޮތީ 8 މެއި 2021 ވީ ހޮނިހިރު ދުވަހު ފިޔަވަތީގައި ބޭއްވި ކުޑަ ރަސްމިއްޔާތެއްގައެވެ. އެމަރުކަޒުގެ ކުދިންނަށް ހަދިޔާކުރެއްވި އީދު ހެދުމާއި ހަވާލުވެ ވަޑައިގެންނެވީ ފިޔަވަތީގެ ސީއީއޯ ޒީނާ ގާސިމެވެ.
ފިޔަވަތީގައި ދެ ޖިންސުން ޖުމްލަ 107 ކުދިން ތިބެ އެވެ. އަދި މި ދެ މެމްބަރުން ގުޅިގެން ވަނީ އެއިން ކޮންމެ ކުއްޖަކަށް އީދު ހެދުމަކާއި ބޫޓެއް ހަދިޔާކޮށްފައެވެ. މިރަސްމިއްޔާތަށް ފަހު އެމްޕީ ހުސައިން އާއިއެމްޕީ ސަނީފު ވަނީ ފިޔަވަތީގައި ކުދިންނަށް ހިދުމަތް ދޭ ތަންތަނާއި ކުޅޭ އެރިއާ އާއި ކިޔަވާތަނާއި ކުދިންނަށް ގާއިމުކުރެވިފައިވާ އެހެނިހެން ވަސީލަތްތައް ވެސް ބައްލަވާފައެވެ. އަދި ފިޔަވަތީގެ ހާލަތާއި ބެހޭ ގޮތުން މައުލޫމާތު ސާފުކޮށްފައި ވެއެވެ.
ދައުލަތުގެ ބެލުމުގެދަށުގައި ތިބި އެހީއަށް ބޭނުންވާ ކުދިންނަށް އެހީތެރިކަން ފޯރުކޮށް ދިނުމުގެ އިޖުތިމާއީ ޒިންމާއަކީ ފުދުންތެރި ކޮންމެ މީހެއްގެ ކޮނޑުގައި އެޅިފައި އޮންނަ ޒިންމާއެއް ކަމަށް އެމްޕީ ހުސޭން ވިދާޅުވިއެވެ. ތަނަވަސް އަދި ފުދުންތެެރި މީހުން، ދައުލަތުގެ ބެލުމުގެ ދަށުގައި ތިބި އެފަދަ ކުދިންނަށް އެހީވުމަކީ ކޮންމެހެން ކުރަންޖެހޭ ކަމެއް ކަމަށް އޭނާ ދެކެ ވަޑަައިގަންނަވާ ކަމަށް ވެސް މި ރަސްމިއްޔާތުގައި އެމްޕީ ހުސޭން ފާހަގަ ކުރެއްވިއެވެ.
ފިޔަވަތީގެ ކުދިންނަށް އީދު ހެދުން ހަދިޔާ ކުރަން ނިންމީ އެ ކުދިންނަކީ ވެސް އެހެން ކުދިން ފަދައިން އީދުގެ ފުރިހަމަ އުފާވެރިކަން ބޭނުންވާ، އަދި އެހީތެރި ކަމަށް ބޭނުންވާ ކުދިންނަށްވާތީ އެހީތެރިކަން ފޯރުކޮށް ދޭން އޭނާ އާއި އެމްޕީ ހުސައިން އިސް ނެގުމުގެ ގޮތުން ކަމަށް އެމްޕީ ސަނީފު މި ރަސްމިއްޔާތުގައި ހާމަކުރެއްވިއެވެ.
ދައުލަތުގެ ބެލުމުގެ ދަށުން ބަލަހައްޓާ ކުދިން ހުޅުމާލޭ ފިޔަވަތީގެ އިތުރުން ވިލިމާލޭ ކުޑަކުދިންގެ ހިޔާ، ފުވައްމުލައް ސިޓީގެ އިތުރުން އެހެން ބައެއް ރަށްރަށުގައި ވެސް ހަދާފައިވާ އަމާންވެށި ނަމުގައި ހަދާފައިވާ މަރުކަޒުތަކުގައި ތިބެއެވެ. ފުވައްމުލައް ސިޓީގައި އެފަދަ ކުދިން ބައިތިއްބަން ފެށި މިއަހަރު ކުރީ ކޮޅުއެވެ.
މީގެ ކުރިން އެމްޕީ ހުސޭން ވަނީ ކެއާ ސޮސައިޓީގެ ދަރިވަރެއްގެ 1 އަހަރުދުވަހުގެ ކިޔެވުނުގެ ޚަރަދުތައް ވެސް ހަދިޔާކޮށް ފައެވެ.
ޚިޔާލުތައް