މުހައްމަދު ޝިހާބް މިއަދު، 2 ސެޕްޓެމްބަރު 2021 އިން ފެށިގެން އެއްވެސް އުޒުރަކާއި ނުލައި ކޮވިޑް-19 ވެކްސިން ނުޖާހާ މީހުންނަށް އާއްމު ޚިދުމަތްތައް ހޯދުމުގައި އިތުރު ހުރަސްތަކަކާއި ކުރިމަތިލާން ޖެހޭނެއެވެ. އެގޮތުން ވެކްސިންގެ އެއްވެސް ޑޯޒެއް ފުރިހަމަ ނުކުރާ މީހުންނަށް އާއްމު ޚިދުމަތް ދިނުމުގައި ހަރަކާތްތެރިވެ އުޅުން ވެސް މަނާވެގެން ދާނެއެވެ.
އެޗްޕީއޭއީން ކަނޑައަޅައި، ދުރާލާ އިއުލާން ކޮށްފައިވާ ގޮތުގައި ވެކްސިން ނުޖާހާ ފަރާތްތަކަށް:
– ސައިހޮޓާ ކެފޭ ރެސްޓޯރެންޓްތަކަށް ވަދެ ޚިދުމަތް ހޯދުން މަނާ ކުރުމާއި،
– އޮފީސް ތަކަށް ހާޒިރުވެ މަސައްކަތް ކުރުން މަނާކުރުމާއި،
– ސްކޫލް ތަކަށް ވަނުން މަނާކުރުމާއި،
– ޕަބްލިކް ޓްރާސްޕޯޓްގެ ޚިދުމަތް ހޯދުން މަނާކުރުމާއި
– ބޯކޮށާތަން، ސެލޫން ތަކަށް ވަދެ ޚީދުމަތް ހޯދުން މަނާކުރުން ހިމެނެއެވެ.
އަދި މިއަދުގެ ފަހުން ވެކްސިން ނުޖަހާ މީހުން ރަށްރަށަށް ދަތުރުކޮށް ކަރަންޓީން ނިންމާ ޕީސީއާރު ޓެސްޓްގެ ނަތީޖާ ހޯދުމަށް އަގުދައްކަން ޖެހުން ވެސް ހިމެނެއެވެ. ނަމަވެސް އެގޮތުން ޕީސީއަރު ޓެސްޓަށް ދައްކަން ޖެހޭ ވަރެއް އަދި އާއްމުކޮށް ފައެއް ނުވެއެވެ.
މިކަމާއި ގުޅިގެން “ސަން އޮންލައިނަށް” މައުލޫމާތު ދިން ސަރުކާރުގެ އޮފިޝަލަކު ހާމަކުރައްވާފައިވާ ކަމަށް އެނޫހުން ހާމަކޮށްފައިވަނީ:
“މި އުސޫލަށް އަމަލު ކުރަން ފަށާނީ އަންނަ މަހުން [މާދަމާ] ފެށިގެން. ވެކްސިން ނުޖަހާ މީހުންނަށް އެ ދުވަހުން ފެށިގެން މާލޭގެ އިތުރުން ރަށްރަށުގަ ހިންގާ ކެފޭ ރެސްޓޯރެންޓް ތަކަށް ވަދެގެން ހިދުމަތް ހޯދުންވެސް މަނާ ވާނެ. އަދި ޑޮމެސްޓިކް ފްލައިޓް ދަތުރުތަކާއި ޖިމްތަކާ ސެލޫން ފަދަ ތަންތަނުން ހިދުމަތް ދިނުން މަނާ ވާނެ. ހަމައެހެންމެ އޮފީސްތަކަށް ގޮސް ވަޒީފާ އަދާކުރުން ވެސް މަނާވާނެ،” އޮފިޝަލް ވިދާޅުވި ކަމަށް އެނޫހުގައި ޝާއިއުކޮށްފައިވެއެވެ.
ފުވައްމުލައް ސިޓީގައި ވެކްސިންގެ ދެޑޯޒް ފުރިހަމަ ނުވާ 12 އަހަރުން މަތީގެ 2742 މީހުން ތިބިކަމަށް ހެލްތު މިނިސްޓްރީގެ ނަމްބަރުތަކުން ހާމަވެއެވެ. އަދި އެއްވެސް ޑޯޒް އެއް ނުޖަހާ 1000 ހާ މިހުން ތިބި ކަމަށް ދައްކައެވެ. މިހާތަނަށް ވެކްސިން ގެ ދެޑޯޒް ޖެހިފައިވާ ކަމަށް ދައްކަނީ 12 އަހަރުން މަތީގެ %66 އަދި އެއްޑޯޒް ޖެހިފައިވާ ކަމަށް ދައްކަނީ %88 މީހުންނެވެ.
ފުވައްމުލައް ސިޓީގައި ދިރިއުޅޭ އާބާދީކަމަށް ހެލްތު މިނިސްޓްރީއިން ބަލާފައި ވަނީ 10،933 މީހުންނެވެ. މުޅި އާބާދީއިން ވެކްސިންގެ 2 ޑޯޒް ޖެހިފައިވަނީ %50 އެވެ. އަދި އެއްޑޯޒް ޖެހިފައި ވަނީ %66 އެވެ. ނަމަވެސް މިއަދަދުތަކާއި ފުވައްމުލައް ސިޓީ ކައުންސިލުން ހާމަކުރާ އަދަދުތަކާއި ތަފާތުތަކެއް ހުންނަކަން ފާހަގަ ވެއެވެ. ޚާއްސަކޮށް ދިރިއުޅޭ އާބާދީގެ އަދަދު ތަފާތުވެއެވެ.
ޚިޔާލުތައް