މުހައްމަދު ޝިހާބް ކޮވިޑް-19ގެ ބޫސްޓާ ޑޯޒް ޖެހުމަށް ފުވައްމުލަކު ހޮސްޕިޓަލުން ތައްޔާރުވެއްޖެއެވެ. ބޫސްޓާ ޑޯޒް ޖެހުން ފަށަނީ އަންނަ ބުދަ ދުވަހުން (20 އޮކްޓޯބަރު 2021) ފެށިގެން ރަސްމީ ދުވަސްތަކުގައި ކަމަށް ފުވައްމުލަކު ޕަބްލިކް ހެލްތު އޮފޝަަލަކު މައުލޫމާތު ދެއްވިއެވެ.
ބޫސްޓާ ޑޯޒް ޖެހުމަށް ހަމަޖެހިފައިވާ މެންދުރު 1:30 އިން ހަވީރު 4:00 އަށެވެ. މިކަމާއި ގުޅޭ މައުލޫމާތު ފުވައްމުލަައް ސިޓީ ޕަބްލިކް ހެލްތު ޔުނިޓުން މިއަދު ހާމަކޮށްފައި ވެއެވެ.
ބޫސްޓާ ޑޯޒް ނުވަތަ ބޫސްޓާ އިންޖެކްޝަން އަކީ ބަލިން ރައްކާތެރިވުމަށް ޖަހަން ޖެހޭ ވެކްސިންގެ ޑޯޒްތައް ފުރިހަމަ ކުރުމަށް ފަހު އަނެއްކާވެސް ރައްކާތެރިކަން އިތުރު ކުރުމުގެ ގޮތުން ޖަހާ ވެކްސިންގެ ޑޯޒެވެ. އެގޮތުން ބޫސްޓާ ޑޯޒް ޖަހަނީ ބައްޔަށް ހުށަހެޅުމުގެ ފުރުސަތު ބޮޑު މީހުންނަށެވެ. ނުވަތަ ބަލީގެ ނުރައްކާ ބޮޑުމީހުންނަށެވެ.
ބޫސްޓާ ޑޯޒްގެ ގޮތުގައި ޖެހުމަށް ހަމަޖެހިފައި ވަނީ ފައިޒާ ވެކްސިނެވެ.
ބޫސްޓާ ވެކްސިން ޑޯޒް ދިނުމަށް ފަށަނީ.
ހޮސްޕިޓަލުން ހާމަކުރައްވާ ގޮތުގައި މިވަގުތު ބޫސްޓާ ޑޯޒް ޖެހުމަށް ކަނޑައަޅާފައި ވަނީ ބައްޔަށް ހުށަަހެޅުމުގެ ނާޒުކު މީހުންނެވެ. އެގޮތުން:
60 އަަހަރުން މަތީގެ މީހުންނާއި، ފްރޮންޓްލައިންގައި މަސައްކަތް ކުރާ ސިއްހީ ޚިދުމަތްތެރިންނާއި، ހަށިގަނޑުގެ ދިފާއީ ނިޒާމު ބަލިކަށި މީހުންނެވެ.
ހަށިގަނޑުގެ ދިފާއީ ނިޒާމު ބަލިކަށި މީހުންގެތެރޭގައި ގުނަވަން ބަދަލުކޮށްފައި ތިބޭ މީހުންނާއި، އަދި ދިފާއީ ނިޒާމުގެ ބާރުދަށްކުރާ ބޭސް ބޭނުންކުރާ މީހުންނާއި، ޑައިލިސިސް ހަދާ މީހުންނާއި، ބަރުދަން ލުއި މީހުންނާއި ކެންސަރުބަލީގެ ފަރުވާ ހޯދާ މީހުންނާއި ފުއްޕާމޭގެ ބައްޔެއްގެ ސަބަބުން އޮކްސިޖަން ތެރަޕީ ނަގާ މީހުންނާއި، ހިތުގެ ބަލި އަދި ފުރަމޭގެ ބަލިތަކަށް ފަރުވާ ކުރާ މީހުންނާއި ހަކުރު ބަލީގެ ސަބަބުން ގުނަވަނަކަށް ގެއްލުންވެފައިވާ މީހުނާއި އުމުރުން ދުވަސްވުމުގެ ސަބަބުން ނުވަތަ ބައްޔެއްގެ ސަބަބުން އެނދުމަތިވެފައިވާ މީހުންނަށް ކަމަށް ފުވައްމުލަކު ހޮސްޕިޓަލުން ހާމަކުރައްވައެވެ.
ޚިޔާލުތައް