އިބްރާހިމް ލަތީފް ރާއްޖޭގައި ވިއްކާ އަސާސީ ބޭސްތައް ވިއްކޭނެ އެންމެ މަތީ އަގު ކަނޑައެޅުން އަންނަ މާރިޗު މަހަށް ފަސްކޮށްފިއެވެ. މިދިޔަ ނޮވެމްބަރު މަހު އާންމުކުރި ގަވާއިދުގެ ދަށުން ރާއްޖޭގައި ވިއްކާ އަސާސީ ބޭސްތައް ވިއްކޭނެ އެންމެ މަތީ އަގު ކަނޑައަޅައި އެކަން ތަންފީޒުކުރުމަށް ހަމަޖެހިފައިވަނީ މިޖެނުއަރީ 1 ވަނަ ދުވަހުއެވެ.
ރާއްޖޭގައި އަސާސީ ބޭސް ވިއްކޭނެ އެންމެ މަތީ އަގު ކަނޑައެޅުމަށްޓަކައި މިދިޔަ އަހަރުގެ ނޮވެމްބަރު މަހު ނެރުނު ގަވާއިދުގައިވާ ގޮތުން އަސާސީ ބޭސް ވިއްކޭނެ އެންމެ މަތީ އަގަކީ އެބޭހެއް ގަންނަން ލިބޭ އަގު ނުވަތަ ކޮސްޓް ޕްރައިސްގެ 100 އިންސައްތައެވެ. އެ ގަވައިއިދު ތަންފީޒު ކުރުމުގެ ގޮތުން، އެންމެ ފުރަތަމަ އަސާސީ ބޭސްތަކުގެ އަގު މި މަހުގެ ފުރަތަމަ ދުވަހުން ފެށިގެން ކޮންޓްރޯލް ކުރުމަށް ފަހު އަންނަ ޖުލައި މަހުން ފެށިގެން ދެން ހުރި ބޭސްތަކުގެ އަގު ވެސް ކޮންޓްރޯލް ކުރަން ލާޒިމްކުރެ އެވެ.
އެކަމަކު އެ ގަވާއިދަށް މިއަދު ގެނައި އިސްލާހުގައިވާ ގޮތުން، އަސާސީ ބޭސްތައް ކޮންޓްރޯލް އަގުގައި ވިއްކަން ޖެހެނީ އަންނަ މާޗް މަހުން ފެށިގެންނެވެ. އަސާސީ ބޭސްތަކުގެ ލިސްޓާއި އޭގެ އަގު އެ ދުވަހުން ފެށިގެން ސަރުކާރުން އާންމު ކުރަން ޖެހޭއިރު، ބޭސްތައް ވިއްކާ އަގުތައް ފާމަސީތަކުގައި ފެންނަ ގޮތަށް ބަހައްޓަން ޖެހޭނެ ކަމަށް އެ އިސްލާހުގައިވެ އެވެ.
ނަމަވެސް ދެން ހުރި ބާވަތުގެ ބޭސްތަކުގެ އަގު ކޮންޓްރޯލްކުރާ ތާރީޚު ފަސްކޮށްފައެއް ނުވެ އެވެ. އެހެންވެ، ކުރިން ވެސް އެ ގަވާއިދުގައި އޮތްގޮތަށް އެހެން ބާވަތްތަކުގެ ބޭސްތަކުގެ އަގު އަންނަ ޖުލައި މަހުން ފެށިގެން ވިއްކޭނީ ކޮންޓްރޯލް އަގަށެވެ.
އަސާސީ ބޭސް ވިއްކޭނެ އެންމެމަތީ އަގު ތަންފީޒުކުރުމަށްފަހު އެ ގަވާއިދާ ހިލާފަށް ބޭސް ވިއްކާ ފުރަތަމަ ފަހަރު އެ ތަނެއް 10،000 ރުފިޔާއިން އަދި ތަކުރާރުކޮށްފި ނަމަ، ދެވަނަ ފަހަރަށް 10،000 ރުފިޔާ އާއި 50،000 ރުފިޔާ އާ ދެމެދުގެ އަދަދަކުން ޖޫރިމަނާ ކުރުމަށްވެސް އެގަވާއިދުގައިވެއެވެ.
ޚިޔާލުތައް