އިބްރާހިމް ލަތީފް ފުވައްމުލަކު އެތެރޭ މަގުތައް މިއަހަރު ނޮވެންބަރު މަހުގެ ކުރިން ނިންމާ ރައްޔިތުންނަށް ހަވާލުކުރެވޭނެ ކަމަށް އެމަސައްކަތް ކުރިއަށް ގެންދާ އެމްޓީސީީސީގެ ސީއީއޯ އާދަމް އާޒިމް ވިދާޅުވެއެޖެއެވެ. އާޒިމް މިހެން ވިދާޅުވެފައިވަނީ ސޯޝަލް މީޑިއާގައި މީހަކުކުރި ޕޯސްޓަކަށް ޖަވާބުދެމުންނެވެ.
ނޮވެންބަރު 2022ގެ ކުރިން ފުވައްމުލަކުގެ ރީތި މަގުތައް ﷲގެ ހެޔޮ ރަހުމަތުން ރައްޔިތުންނަށް ލިބޭނެ” އާޒިމް ފޭސްބުކް މެދުވެރިކޮށް ވިދާޅުވިއެވެ. ނަމަވެސް، އެމްޓީސީސީގެ ސީއީއޯ އާދަމް އާޒަމް ފާއިތުވީ 2020 ވަނަ އަހަރު ނޮވެންބަރު މަސްތެރޭ ފުވައްމުލަކަށް ކުރެއްވި ދަތުރުފުޅެއްގައި ވިދާޅުވެފައިވަނީ އެމަގުގެ މަސައްކަތް 2021 ވަނަ އަހަރު ނޮވެންބަރު މަސް ނިމެންވާއިރަށް ނިންމާނެކަމަށެވެ. އޭގެ ފަހުން މިދިަޔަ ނޮވެންބަރު މަސްތެރޭ ރާއްޖެ ޓީވީގައި ވާހަކަފުޅު ދައްކަވަމުން އާޒިމް ވިދާޅުވީ 2022 ވަނަ އަހަރުގެ ފުރަތަމަ 3 މަސްތެރޭގައި ފުވައްމުލަކު މަގުތަކުގައި ތާރުއެޅުމުގެ މަސައްކަތް ފެށިގެންދާނެކަމަށެވެ.
މަގުހެދުމުގެ މަސައްކަތް ލަސްވެގެންދިޔައީ އެމަސައްކަތަތަށް ބޭނުންވާ ސާމާނުތަކެއް އިމްޕޯޓް ކުރަންޖެހުމާއި ކޮވިޑާއި ގުޅިގެން ލޮޖިސްޓިކް ދަތިތައް ހުރެގެން އެސާމާނުތައް ލިބުން ލަސްވުމުން ކަމަށްވެސް އާޒިމްވަނީ ވިދާޅުވެފައެވެ.
ފުވައްމުލައް ސިޓީގެ އެތެރޭގެ 31 މަގެއް ހެދުމުގެ މަސައްކަތް އެމްޓީސީސީއާ ހަވާލުކޮށްފައި ވަނީ 2019 ވަނަ އަހަރުގެ ޖުލައި މަހުގެ 04 ވަނަ ދުވަހެވެ. އަދި އަމަލީ މަސައްކަތް ފަށާފައިވަނީ ޖުލައި 20، 2020 ގައެވެ.
މަގު ހެދުމުގެ މަސައްކަތުގައި ހިމެނެނީ ސަބް ބޭސް ލޭޔާ ހެދުމާއި، ތާރު އެޅުމާއި، މަގުތަައް ކުރެހުމާއި، މަގުބައްތި ހަރުކުރުމާއި ފެންހިންދާ ނިޒާމުގެ ކަންކަމެވެ. މި މަސައްކަތަށް 279.4 މިލިއަން ރުފިޔާ ޚަރަދު ކުރެއެވެ.
ޚިޔާލުތައް