އިބްރާހިމް ލަތީފް ރާއްޖޭގައި މަސްވރިކަން ކުރުން މަނާ ބާވަތެއްކަމަށްވާ މިޔަރުގެ މަސްވެރިކަންކުރާ ވީޑިއޯއެއް ސޯޝަލް މީޑިއާގައި އާންމުވެއްޖެއެވެ. މިވީޑިއޯގައި ފެންނަނީ ފުވައްމުލަކުގައި ގެންގުޅޭފަދަ ކުޑަ ދޯންޏެއްގައި ބާނާފައިވާ މިޔަރުތަކެއް ކެނޑުމަށްފަހު އެއްބައި މޫދަށް އެއްލާލާތަނެވެ. ތިން މީހަކު ފެންނަ މިވީޑިއޯގައި މިޔަރުގެ އުރަހަ ނަގަނީ ކަމަށް ބެލެވެއެވެ. މިވީޑިއޯ ޓްވިޓާގައި އާންމުކޮށްފައިވާ މުހައްމަދު އަމާން ބުނެފައިވަނީ މިވީޑިއޯ ނަގާފައިވަނީ ފުވައްމުލަކު ރަސްގެފަންނު ކައިރިން ކަމަށެވެ. އަދި މިވީޑިއޯގެ ކްރެޑިޓް ދީފައިވަނީ ފުވައްމުލަކު ފޮޓޯ ގްރާފަރެއްކަމަށްވާ މުހައްމަދު ރީމާޒު ގެންގުޅޭ އިންޓަގްރާމް އެކައުންޓަށެވެ.
ފުވައްމުލަކުގައި މިޔަރުގެ މަސްވެރިކަންކުރާ ކަމަށް ގިނަ ތުހުމަތުތަކެއް މީގެކުރިންވެސް ވަނީ ކުރެވިފައެވެ. އެގޮތުން، މިދިޔައަހަރު ޖެނުއަރީ މަހުވެސް މިޔަރެއް ހިފައިގެން އުޅޭ މަންޒަރުތަކެއް ވަނީ އާންމުވެފައެވެ. އެކަމާއި ގުޅިގެން މިކަލް ނޫހުން ކުރި މަސައްކަތުން އެއީ ބަޔަކު ބާނާފައިވާ މިޔަރެއް ކަމަށް މައުލޫމާތު ލިބުނެވެ. އަދި މިޔަރު ބާނައި އެއްގަމަށްވެސް އަރުވާކަމުގެ މައުލޫމާތު ލިބުނެވެ. ނަން ހާމަނުކުރާ ގޮތަށް މިކަލް ނޫހަށް އޭރު މައުލޫމާތު ދިންފަރާތަކުން ބުނެފައިވަނީ، މަހަށް ގޮސް ނަނުގައި ގަންނަ މިޔަރު ކަނޑަށް ދޫކޮށްލުމެއް ނެތި ބޭނޭ މިޔަރު ދޯންޏަށް ނަގައި އެމިޔަރު ކޮށައި ކުދިކުދި ކުރުމަށްފަހު، ރަށަށް ލަފާކަަމަށެވެ. މިހެން ހެދުމުން މިކަން އޮންނަނީ އެމީހުންގެ މެދުގައި ސިއްރުވެފައެވެ. އެކަމަކު އެއީ މިހާރު އެންމެން ދަންނަ ބޮޑު ސިއްރަކަށް މިވަނީ ވެފައެވެ. ބައެއް މީހުން ސިއްރުން ކުރިޔަސް ފާޅުގައި މިކަންކުރާ މީހުން ވެސް މަދުމަދުން ފެންނަކަމަށް މިކަލް ނޫހަށް އޭރުވަނީ މައުލޫމާތު ލިބިފައެވެ.
މިވީޑިއޯއާއި ގުޅިގެން ފުވައްމުލަކުގެ ބައެއް ފަރާތްތަކުން ދަނީ މިކަމާއި ދެކޮޅަށް ސޯޝަލް މީޑިއާގައި ޝުއޫރު ފާޅުކުރަމުންނެވެ. ފުވައްމުލަކު ސިޓީ ކައުންސިލާއި ޕޮލިހުން މިމައްސަލަ ބައްލަވައިދިނުމަށް އެއްބަޔަކު އެދެމުންދާއިރު، މިޔަރުގެ އުދަގޫ ބޮޑުވެ މިޔަރު ބޭނުމަށް ހުއްދަ ދިނުމަށް ގޮވާލާ މަދު ބަޔަކުވެސް ރާއްޖެއިން ފެންނަމުންދެއެވެ. އެފަރާތްތަކުން ބުނަމުންދަނީ މިޔަރުގެ މަސްވެރިކަން ކުރުން ރާއްޖޭގައި މަނާކޮށްފައި އޮތުމުން އޭގެ ނޭދެވޭ އަސަރު މަސްވެރިކަމަށް ކުރަމުން އަންނަކަމަށެވެ. އެގޮތުން މަސް އައިންތަކުން ބާނާ މަސްތައް މިޔަރު ކައިފައި ހުންނަކަމަށް މަސްވެރިން ބުނެއެވެ.
2010 ވަނަ އަހަރުން ފެށިގެން ރާޢްޖޭގައި މިޔަރުގެ ބާވަތްތައް ހިފުމާއި ބޭނުންމަކީ މުޅިން މަނާކަމަކެވެ. އެހެންނަމަވެސް މިޔަރު އުރަހަ ނަގާ އޭގެ ވިޔަފާރި ބައެއް މީހުން އަންނަނީ ކުރަމުންނެވެ. މިދިޔަ އަހަރުގެ ކުރީ ކޮޅު އޮޅުވާލައިގެން ރާއްޖެއިން ބޭރުކުރަން އުޅުނު 429 ކިލޯ މިޔަރު އުރަހަ ކަސްޓަމްސްއިން ވަނީ އަތުލައިގެންފައެވެ. 21 ފޮއްޓެއްގައި ބަންދުކޮށްގެން މިތަކެތި ރާއްޖެއިން ބޭރަށް ގެންދަން މަސައްކަތްކޮށްފައިވަނީ ލޮނުމަހުގެ ޝިޕްމަންޓެއްގެ ގޮތުގައެވެ. އަދި އޭގެ ފަހުން މިދިޔަ އަހަރުގެ މެދުތެެރޭގައި މިޔަރުގެ މަސްވެރިކަން ކުރަމުންދިޔަ ދޯންޏެއް އދ. މާންދޫ ކައިރިންވެސް ވަނީ އަތުލައިގެންފައެވެ. މި ދޯނީގައިވެސް މިޔަރާއި މިޔަރުގެ އުރަހައާއި ލޮނު އަޅާފައިވާ މިޔަރު މަސް ހުރިކަމަށް ފުލުހުން ވަނީ ބުނެފައެވެ.
ޚިޔާލުތައް