ކ.ތިލަފުށިން ސިނާއީ ބޭނުމަށް ބިން ކުއްޔަށް ދިނުމަށް ކޮށްފައިވާ އިއުލާންތައް އެޗްޑީސީއިން ބާތިލްކޮށްފިއެވެ.
މި އިއުލާނުގައި ބުނެފައި ވަނީ ކ.ތިލަފުށީގައި ބިމުގެ ޖާގަ އޮތް ވަރަށް ބަލައި ތިލަފުށީ މާސްޓާ ޕްލޭނާއި އެ ކުންފުނީގެ އުސޫލުތަކުގައިވާ ގޮތުގެ މަތިން، ތިލަފުށިން ބިން ކުއްޔަށް ދޫކުރުމަށް އެކުންފުނިން 2014 ވަނަ އަހަރުގެ ޖުލައި މަހުގެ 3 ވަނަ ދުވަހު ކޮށްފައިވާ އިއުލާނާއި 14 ވަނަ ދުވަހު ކޮށްފައިވާ އިއުލާން ބާތިލްކޮށްފައިވާ ކަމަށެވެ.
ތިލަފުށީގެ ބިން ހިއްކުމުގެ މަޝްރޫއުއާއި ތިލަފުށީގެ މާސްޓާ ޕްލޭނަށް ގެނެވިފައިވާ ބަދަލުގެ ސަބަބުން ތިލަފުށީގެ ލޭންޑް-ޔޫސް ޕްލޭނަށް ބަދަލު ގެނައުމުގެ މަސައްކަތް އެކުންފުނިން ކުރަމުން ދާކަމަށް ވެސް ވަނީ ހާމަކޮށްފައެވެ. އެހެންކަމުން، ކުރިން ނެރެފައިވާ އިއުލާންތަކާ ގުޅިގެން، އެ ކުންފުންޏަށް ހުށައެޅިފައިވާ ޕްރޮޕޯސްލަތަކާއި، އެކުންފުނިން އެފަރާތްތަކަށް ފޮނުވާފައިވާ އޮފާތައް ބާތިލްކޮށްފައިވާ ކަމަށް ވެސް ވަނީ ފާހަގަކޮށްފައެވެ.
މި ކަމާ ގުޅޭގޮތުން އިތުރު މައުލޫމާތު ސާފުކުރަން ބޭނުންވާ ބޭފުޅުން އެ ކުންފުނީގެ ހޮޓްލައިން ނަންބަރު، 1516 އަށް ގުޅުއްވައި މައުލޫމާތު ސާފު ކުރުމަށް އެކުންފުނިން ވަނީ އެދިވަޑައިގެންފައެވެ.
މީގެ އިތުރުން އެ ކުންފުނީގެ ހިންގުން ރަނގަޅު ކުރުމަށް ހާމަކަން ބޮޑު އަދި ދެފުށް ފެންނަ ގޮތަކަށް ކުންފުނީގެ ކަންކަން ބައްޓަން ކުރުމުގައި އެންމެހާ ކަސްޓަމަރުން، ރައްޔިތުންނާއި ވިޔަފާރިތަކުން އެ ކުންފުންޏަށް ދޭ އެއްބާރުލުމަށް ވަނީ ޝުކުރު އަދާކޮށްފައެވެ.
ޚިޔާލުތައް