ގދ.ގައްދޫ އިން ފުވައްމުލައް ސިޓީއަށް ލޯންޗު ފެރީ ދަތުރު ފަށަނީ

ގދ. ގައްދޫއިން ފުވައްމުލައް ސިޓީއަށް ލޯންޗު ފެރީ ދަތުރުތައް ފެށުމަށް އަމިއްލަ ފަރާތަކުން ތައްޔާރުވެއްޖެއެވެ. އަންނަ ހޮނިހިރު ދުވަހުން ފެށިގެން މިދަތުރުތައް ފެށުމަށް ތާވަލްކޮށްފައިވާ ކަމަށް ދަތުރުތައް އިންތިޒާމުކުރާ ފިޔޯރީ ޝަމީމު މިކަލް ނޫހަށް މައުލޫމާތު ދެއްވިއެވެ.

މިދަތުރުތައް ކުރުމަށް ހަމަޖެހިފައި ވަނީ ހޮނިހިރު ދުވަހު ހަވީރު 4:00 އިން ގދ. ގައްދޫއިން ފުރައިގެން ފިޔޯރީ އަދި ވާދޫގައި ޖެއްސުމަށްފަހު ފުވައްމުލަކަށް ދާގޮތަށެވެ. މިދަތުރުތަކުގައި ބޭނުންކުރާނީ 22 މީހުންގެ ޖާގައިގެ ލޯންޗެކެވެ.

ދަތުރުގައި ފުވައްމުލައް ސިޓީން ހުވަދުއަށް ދިއުމަށް ފުރުމަށް ހަމަޖެހިފައި ވަނީ ހޯމަ ދުވަހު މެންދުރުފަހު 2:00 ގައެވެ.

މިގޮތަށް ދަތުރުތައް ރާވާފައި ވަނީ ހުވަދު އަތޮޅުގެ އެތެރޭގެ ފެރީން ދަތުރުކުރާ މީހުންނަށް މިލޯންޗުގައި ފުވައްމުލަކަށް ދަތުރުކުރެވޭ ގޮތަށް ބަލަިއގެން ކަމަށް ޝަމީމު ހާކުރެއްވިއެވެ.

ނަމަވެސް ކުރިޔަށް އޮތްތަނުގައި ދަތުރުވެރިން އެދޭގޮތްތަކަށް ބޮޑަށް އިސްކަންދީގެން ދަތުރު ޝެޑިއުލަށް ބަދަލު ގެނައުމަށް ވިސްނާފައިވާ ކަމަށް ހާމަކުރެއްވިއެވެ.

އެގޮތުން ބުރާސްފަތި ދުވަހު ހުވަދޫ ކޮޅުން ފުރާފައި ހޮނިހިރު ދުވަހު ފުވައްމުލައް ސިޓީން ފުރާގޮތަށް ދަތުރުތައް ބަދަލުކުރުމުގެ ވިސްނުމެއް ވެސް ގެންގުޅޭ ކަމަށް ޝަމީމު ހާމަކުރެއްވިއެވެ.

ޝަމީމު ފެރީ ލޯންޗު ދަތުރުތަކުގެ އަގުތައް

ގދ.ގައްދޫއިން ފުވައްމުލަކަށް – 400 ރުފިޔާ

ގދ.ފިޔޯރީއިން ފުވައްމުލަކަށް – 350 ރުފިޔާ

ގދ.ވާދޫއިން ފުވައްމުލަކަށް – 350 ރުފިޔާ

މިދަތުރުގެ ތެރޭގައި ގދ. ތިނަދޫއިން ވެސް ފުވައްމުލަކަށް ދެވޭ ގޮތަށް ވެއެވެ.

ގދ.ތިނަދޫއިން ފުވައްމުލަކަށް – 400 ރުފިޔާ

މިދަތުރުތަކުގެ ޓިކެޓް ހޯއްދެވުމަށް 7428090 އަށް ގުޅުއްވުން ހަމަޖެހިގެން ދާނެކަމަށްވެއެވެ.

މީގެ ދުވަސްކޮޅެއް ކުރިން ހުވަދު އަތޮޅު ފަރެސް މާތޮޑާއާއި ފުވައްމުލަކާއި ދެމެދު ލޯންޗު ފެރީ ދަތުރުތައް އެމްޕީއެލް އިން ވަނީ ފަށާފައެވެ. މިދަތުރުތަކަށް އާއްމުންގެ ވަރަށ ްބޮޑު ތަރުހީބެއް ލިބެމުން އާދެއެވެ. ބައެއް ފަހަރު ބާރުބޮޑުވެ ޓިކެޓް ނުލިބިގެން މަޑު ކުރަން ވެސް ޖެހެއެވެ.

އެމްޕީއެލްގެ ދަތުރުތަކުގެ ޓިކެޓް އޮންލައިންކޮށް ބުކު ކުރެވޭ ވެބް ޕޯޓަލް އެއް ވެސް ވަނީ ހުޅުވާފައެވެ.

އަލަށް މިފަށާ ދަތުރު ތަކާއެކު ހުވަދޫ އަތޮޅު ދެކުނު ބުރީގެ ގިނަ ރަށްރަށާއި ފުވައްމުލަކާއި ދެމެދު ލޯންޗު ދަތުރުތަކުން ގުޅާލެވިގެން ދާނެއެވެ.