މުހައްމަދު ޝިހާބް ކުރިޔަށް އޮތް ލޯކަލް ކައުންސިލް އިންތިޚާބުގައި އަންހެނުންނަށް ޚާއްސަ ދާއިރާއްތައް އިލެކްޝަންސް ކަމިޝަނުން ކަނޑައެޅި ގޮތުން އެހެންމީހުންގެ އަސާސި ހައްގުތައް ހަނިވެގެން ދާކަމަށް ގިނަބަޔަކު ބުނަން ފަށައިފިއެވެ. އިލެކްޝަންސް ކަމިޝަނުން އަންހެނުންނަށް ޚާއްސަ ދާއިރާތައް އިއުލާންކުރީ އެ ކަމިޝަނުން ކަނޑައެޅި ދާއިރާތަކާއި މެދު އާއްމުންގެ ޝަކުވާއަށް ހުޅުވާލައި އެ ޝަކުވާތަކަށް ޖަވާބު ދޭން ކަނޑައަޅާފައިވާ 7 ދުވަސް ހަމަނުވަނީ ހެވެ.
ލޯކަލް ކައުންސިލް އިންތިޚާބަށާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިޚާބަށް ދާއިރާތައް ކަނޑައެޅި ގޮތާއި ގުޅިގެން ގިނަ ޝަކުވާތަކެއް ރައްޔިތުން އުފުލާފައިވެއެވެ. ނަމަވެސް އިލެކްޝަނުން އެ ޝަކުވާތައް އަޑުއަހައި އެއަށް އިހުތިރާމުކޮށްފައި ނުވާކަން މި ނިންމުމުން ހާމަވެގެން ދެއެވެ.
ލޯކަލް ކައުންސިލް އިންތިޚާބަށް ސިޓީ ކައުންސިލްތަކާއި އެހެން ކައުންސިލްތަކުގެ ދާއިރާތައް ކަނޑައަޅާފައިވާ ގޮތް ތަފާތެވެ. އަންހެންނުންނަށް ޚާއްސަ ދާއިިރާތަކެއް ސިޓީ ތަކުން ކަނޑައެޅުމުން އެދާއިރާތަކުގެ ފިރިހެނުންނަށް ފުރުސަތު ގެއްލެއެވެ. ސިޓީ ކައުންސިލްތަކުގައި އިންތިޚާބީ ދާއިރާތައް ކަނޑައަޅައި %33 ގޮނޑި އަންހެނުންނަށް ޚާއްސަކޮށްގެން ވެސް ހަމަހަމަ ފުރުސަތު ދެވޭނެ ގޮތައްތައް ހޯދޭނެއެވެ. ނަމަވެސް އިލެކްޝަންސް ކަމިޝަނުގެ ގަވާއިދަކުން އިންތިޚާބީ ދާއިރާތައް ކަނޑައެޅި ގޮތުން ފިރިހެނުންގެ ހައްގުތައް ގެއްލޭއިރު އަންހެނުންނަށް ޚާއްސަކުރެވިފައިވާ ދާއިރާ ނޫން ދާއިރާތަކުން އަންހެނުންގެ ހައްގުތައް ވެސް ހަނިކުރެވިގެން ދެއެވެ.
ރަށު ކައުންސިލް ތަކާއި އަތޮޅު ކައުންސިލް ތަކަށް އަންހެނުންގެ %33 ޚާއްސަ ކުރެވިފައި ވިޔަސް އެހެން މީހުންގެ ހައްގުތައް އުނިވެ އަދި ހަނިވެގެނެއް ނުދެއެވެ.
މިކަމާއި ގުޅިގެން ބައްފަރާތްތަކުން މައްސަލަ ސުޕްރީމް ކޯޓަށް ހުށަހަޅާނެ ކަމަށް ބުނެފައެވެ. އިލެޝަނުން ދާއިރާތައް ބަހާފައިވާ ގޮތުގައ ޝަކުވާ ހައކޯޓަށް ހުށަހަޅަން އަދިވެސް ފުރުސަތު އެބަ އޮތެވެ.
ލޯކަލް ކައުންސިލް އިންތިޚާބާއި އަންހެނުންގެ ތައްރައްގީއަށް މަސައްކަތް ކުރާ ކޮމެޓީގެ އިންތިޚާބަށް ދާއިރާތައް ބެހި ގޮތުގެ ޝަކުވާ ހުށަހަޅާ ނިމޭތާ 7 ދުވަހުގެ ތެރޭގައި އިލެކްޝަންސް ކަމިޝަނުން އެފަރާތްތަކަށް ޖަވާބު ދޭން ޖެހެއެވެ. އަދި އެޖާވާބު ލިބޭތާ 7 ދުވަހުގެ ތެރޭގައި ހިތްހަމަނުޖެހޭ މައްސަލަ ހައިކޯޓަށް ހުށަހެޅުމުގެ ފުރުސަތު ކަމާއި ގުޅޭ ގަވާއިދުން ދީފައިވެއެވެ.
އިލެކްޝަންސް ކަމިޝަނުން އަންހެނުންނަށް ޚާއްސަ ދާއިރާތައް ގުރުއަތުން ކަނޑައަޅާފައި ވަނީ:
ފުވައްމުލައް ސިޓީއިން ލޯކަލް ކައުންސިލް އިންތިޚާބަށް ކަނޑައަޅާފައިވާ 6 އިންތިޚާބީ ދާއިރާގެ ތެރެއިން އަންހެނުންނަށް 2 ދާއިރާއެއް ވަނީ ޚާއްސަ ކުރެވިފައެވެ. އެއީ:
ފުވައްމުލައް ސިޓީ ދާއިރާ 1 އަންހެނުންނަށް (ދަޑިމަގު އަވަށާއި ދިގުވާނޑު އަވަށުން ބައެއް)
ފުވައްމުލައް ސިޓީ ދާއިރާ 14 އަންހެނުންނަށް (ފުނާޑުއ އަވަށާއި މިސްކިތްމަގު އަވަށުން ބައެއް) އެވެ.
އައްޑޫ ސިޓީން އަންހެނުންނަށް ޚާއްސަ ކުރެވުނު ދާއިރާ ތަކަކީ:
އައްޑޫ ސިޓީއިން ލޯކަލް ކައުންސިލް އިންތިޚާބަށް ކަނޑައަޅާފައިވާ 12 އިންތިޚާބީ ދާއިރާގެ ތެރެއިން އަންހެނުންނަށް 4 ދާއިރާއެއް ޚާއްސަ ކުރެވިފައި ވެއެވެ. އެއީ:
އައްޑޫ ސިޓީ ދާއިރާ 2
އައްޑޫ ސިޓީ ދާއިރާ 6
އައްޑޫ ސިޓީ ދާއިރާ 8
އައްޑޫ ސިޓީ ދާއިރާ 12 އެވެ.
މާލެ ސިޓީން އަންހެނުންނަށް ޚާއްސަ ކުރެވުނު ދާއިރާ ތަކަކީ:
މާލެ ސިޓީއިން ލޯކަލް ކައުންސިލް އިންތިޚާބަށް ކަނޑައަޅާފައިވާ 18 އިންތިޚާބީ ދާއިރާގެ ތެރެއިން އަންހެނުންނަށް 6 ދާއިރާއެއް ޚާއްސަ ކުރެވިފައި ވެއެވެ. އެއީ:
މާލެ ސިޓީ ދާއިރާ 2
މާލެ ސިޓީ ދާއިރާ 4
މާލެ ސިޓީ ދާއިރާ 9
މާލެ ސިޓީ ދާއިރާ 12
މާލެ ސިޓީ ދާއިރާ 14
މާލެ ސިޓީ ދާއިރާ 18 އެވެ.
ޚިޔާލުތައް