އިބްރާހިމް ލަތީފް ފުވައްމުލަކު ސިޓީގައި ކުރިއަށްދާ މާލެގަން ފުޓްސަލް ޗެލެންޖްގައި ރޭ ކުޅެވުނު ދެސެމީ ފައިނަލުން މޮޅުވެ ދަޑިމަގާއި ހޯދަޑު މިމުބާރާތުގެ ފައިނަލަށް ދަތުރުކޮށްފިއެވެ. އެފްސީ ދަޑިމަގު ފައިނަލަށް ދަތުރުކުރީ ރޭ ކުޅެވުނު ސެމީ ފައިނަލުގެ ފުރަތަމަ މެޗުގައި ދިގުވާޑު އެފްސީ އާއި ވާދަކޮށް 1-1 ލަޑުން އެއްވަރު ވުމުން ޕެނަލްޓީ ޖަހައިގެން ކުރިހޯދައިގެނެވެ. ފޯރިގަދަ މިމެޗުގައި ދެޓީމުން ފެނިގެންގޮސްފައިވަނީ ވާދަވެރި ކުޅުމެކެވެ. މިމެޗުގެ މޮޅުކުޅުންތެރިއަކަށް ހޮވިފައިވަނީ އެފްސީ ދިގުވާޑުގެ އަބްދުﷲ ގުރައިޝެވެ.
ރޭގެ ސެމީ ފައިނަލުގެ ދެވަނަ މެޗުގައި ވާދަކުރީ ހޯދަޑު ސްޕޯޓްސް އާއި ކުރުބާ އެފްސީއެވެ. ވާދަވެރި މިމެޗުގުގެ ފުރަތަމަ ހާފުގައި ގިނަވަގުތު ބޯޅަހިފަހައްޓައިގެން ކުޅުނީ ހޯދަޑު ސްޕޯޓްސްއިންނެވެ. ނަތީޖާއެއްގެ ގޮތުން ފުރަތަމަ ހާފު ނިމުމުގެ ކުރިން 3 ލަޑު ޖަހާ ހޯދަޑު ސްޕޯޓްސް ފައިނަލާއި ފިޔަވަޅަކަށް ގާތަށް ޖެހިލިއެވެ. ދެވަނަ ހާފަށް ކުރުބާ އެފްސީ ނިކުތްއިރު 3 ލަޑުން ފަހަތުގައި އޮތުމުގެ ސަބަބުން އިތުރު ހިތްވަރަކާއިއެކުގައެވެ. ވަރުގަދަ ހޯދަޑު ސްޕޯޓްސްއަށް ދޫނުކޮށް ކުރުބާ އެފްސީ އިން ކުރި ހިތްވަރުން އެޓީމަށް އުއްމީދު ލިބުނީ ކައިރި ކައިރީގައި ޖެހި ދެލަޑާއިއެކު ނަތީޖާ ފަރަގު ލަޑަކަށް ހަނިކުރުމުންނެވެ. ކުރުބާ އެފްސީއިން ކައިރި ކައިރީގައި ދެލަޑު ޖަހާ ނަތީޖާ ފަރަގު ކުޑަކުރި ނަމަވެސް ކުރުބާ އެފްސީ އަށް މި ސްކޯ މާގިނަ އިރަކަށް ނުހިފެހެއްޓުނެވެ. ހަމަޖެހިލައިގެން ކުޅެމުންދިޔަ ހޯދަޑު ސްޕޯޓްސް އިން ކުރުބާ އެފްސީގެ ދެވަނަ ލަޑާއި އެކު މަގިނައިރެއްނުވެ އިތުރު ލަޑެއްޖަހާ މެޗުގެ ނަތީޖާ 4-2 އަށް ބަދަލުކުރިއެވެ. އެ ނަތީޖާއާއިއެކު ރޭގެ ސެމީ ފައިނަލްގެ ފަހު މެޗު ނިމިގެން ދިޔައީ ހޯދަޑު ސްޕޯޓްސް ކާމިޔާބުކޮށްގެނެވެ. މިމެޗުގެ މޮޅު ކުޅުންތެރިއަކަށް ހޮވިފައިވަނީ ހޯދަޑު ސްޕޯޓްސްގެ އިނާން އަހުމަދެވެ.
ފައިނަލް މެޗުގައި ހޯދަޑު ސްޕޯޓްސް ވާދަކުރާނީ ރޭގެ ސެމީ ފައިނަލްގެ ފުރަތަމަ މެޗުން މޮޅުވި އެފްސީ ދަޑިމަގާއިއެވެ. މިމެޗު އޮންނާނީ މާދަމާރޭ 8.30 ގައެވެ.
ޚިޔާލުތައް