މި އަހަރުގެ ދެވަނަ ބިއްސާވެއްޔާއިއެކު ފުވައްމުލައް ސިޓީ ގިނަބަޔެއްގެ އުފާވެރިކަން އިތުރުވީ ފުވައްމުލަކުގެ ތުނޑީގެ ދޮންވެލިގަނޑު މިފަހުން ދުވަހަކު ވެސް ބޮޑު ނުވާވަރަށް ބޮޑުވެފައި އޮތުމުންނެވެ. އެއާއެކު ގިނަ ބަޔަކު ތުނޑިއަށް ޖަމާވެ ހިތްހަމަޖެހުމާއި މަޖާ ނަގަމުން އާދެއެވެ.
މިފަހަރުގެ ބިއްސާވެލީގެ ރީތިކަން އިތުރުވެގެން ދާ ޚާއްސަ އެއްސަބަބަކީ ވެސް ބޮޑު ހުދު ދޮންވެލިގަނޑެވެ. ފުވައްމުލަކު ތުނޑީގެ ބޮޑު ދޮންވެލިގަނޑުގެ ފުޅާ މިންބެލި އާއްމު މީހަކު ހާމަކުރި ގޮތުގައި 300 ފޫޓާއި ގާތްކުރާ މިނަކަށް ދޮންވެލިގަނޑުގެ ފުޅާމިން އެބަހުއްޓެވެ.
މިއަދު ހެނދުނު ތުނޑިއަށް ލީ ވެލި-ބިއްސާވެއްޔާއެކު ރަށުގެ ހުރިހާ އުމުރެއްގެ މީހުންވެސް ކުޅެ މަޖާކުރުމަށް ތުނޑިއަށް ޖަމާވަމުން ދެއެވެ. މިގޮތަށް ލާ ބިއްސާވެލި ގިނަފަހަރާ އެހާ ގިނަ ދުވަހަކަށް ދެމިގެނެއް ނުދެއެވެ. ދެތިން ދުވަހުގެ ތެރޭގައި ދޮންވެލިގަނޑަށް ބަދަލުއައިސް ބިއްސާވެލި ހިނދިގެން ދެއެވެ. ވުމާއެކު ބިއްސާވެލީގެ ހިތްހަމަޖެހުން ލިބިގަތުމަށް ގިނަ ބަޔަކު ބިއްސާވެލީގެ ޚަބަރާއެކު އެދިމާލަށް ދިއުމަށް ތައްޔާރުވާން ފަށައެވެ.
މިއަހަރުގެ ފުރަތަމަ ބިއްސާވެލި ލާފައިވަނީ ފާއިތުވި އޯގަސްޓް މަހުގެ 12 ވަނަ ދުވަހުއެވެ.
އޯގަސްޓް މަހުގެ ބިއްސާވެލި ލީ ގިނަ އަހަރުތަކަށް ބިއްސާވެއްޔެގެ ހިލަމެއް ވެސް ނުވެ ދިއުމަށްފަހު އެވެ. ބިއްސާވެއްޔަކީ ކުރީގެ ދުވަސްތަކުގައި ގިނައިން ފުވައްމުލަކު ތުނޑީން ފެނުނު މަންޒަރެއްކަމަށް ވެއެވެ.
ބިއްސާވެލި ލަނީ ތުނޑީގެ ބޮޑު ދޮންވެލިގަނޑުގެ މެދުން އަޑިވެ މޫދު ލޮނު އެހިސާބުން ތިލަމުންނެވެ. ފުވައްމުލަކު މީހުން ބިއްސާވެލި ސިފަކުރަނީ މޫދުލޮނުގެ ސުވިމިން ޕޫލެއްގެ ގޮތުގައެވެ. ބިއްސާވެލީގެ ލޮނުގަނޑު އެކި ހިސާބުގައި ފުންމިން ތަފާތުވެފައި ވުމުން ހުރިހާ އުމުރެއްގެ މީހުންނަށް ވެސް ފެތުމަށް ބިއްސާވެލި ބޭނުންކުރެވެއެވެ. އަދި މޫދާ ޚިލާފަށް ރާޅުގެ އަސަރު ނެތުމުން ވަރަށް ހިތްގައިމުކޮށް ފަތާލެވެއެވެ.
ގިނަ ދުވަސްތަކަކަށް ފަހު ތުނޑިއަށް ބިއްސާވެޔެއް ލައިފި
ޚިޔާލުތައް