މުހައްމަދު ޝިހާބް ނަވާރަވަނަ ބައި (ފަހުބައި)
“ބޮޑުބޭބޭ! ކިހިނެތްތޯ! އަޅުގަނޑު ހީކުރީ ދެ ދުވަހެއްވަރު ފަހުން ކަމަށް އަންނާނީ! ތި ވީގޮތް އަސް ލު މާރަނގަޅު! ވަގުތު ހީވަނީ ވަރަށް ކުރުހެން!”
ވާހަކަ ދައްކަން ދަތި ވެ ފަރުހާންގެ އަޑު ބެދޭ ގޮތް ވުމުން ވާހަކަ ދެއްކުން ހުއްޓައިލިއެވެ. ފަރުހާންގެ އަތުގައި ހިފައިގެން ހުރި ލައިލާގެ ބޮޑުބޭބެ އެހީ ލައިލާއަށް އެއްވެސް ކުރިއެރުމެއް ލިބިއްޖެތޯއެވެ. ފަރުހާން ނޫނެކޭ ބުނެ ބޯ ހޫރައިލިއެވެ.
ފަރުހާން ވާހަކަ ދައްކަން ފެށުމުން ސާރާ ފަރުހާންގެ އުރުން ސޮއްސާލައިގެން ފައިބާ ހުރީ ޚަދީޖާ ގާތުގައެވެ.
“މިހިރީ ލައިލާގެ ދަރިފުޅު، ސާރާ!”
ޚަދީޖާއަށް ނުހުރެވިގެން ސާރާ ތަޢާރަފު ކޮށްދިނެވެ. ލައިލާގެ ބޮޑުބޭބެ އެނބުރިފައި ސިކުންތުކޮޅަކަށް ބަލަން ހުއްޓެވެ. އަދި ދެން ސާރާ އުރާލަމުން ކޮލުގައި ބޮސްދިނެވެ. ގަޔާލާ ބޮނޑިކޮށްލިއެވެ. ގޮނޑީގައި އިށީނދެގެން ތިބި އޭނަގެ ދެ ކުދިންނަށް ސާރާ ދައްކައިލިއެވެ. މި ކުއްޖާގެ މިހިރީ އަހަރެންގެ ކޮއްކޮގެ ދެލޮލޭ ބުނެ ސާރާގެ ދެ ލޮލުގައި ވެސް ބޮސް ދިނެވެ. އޭގެ ފަހުންވެސް އެތައް ފަހަރަކު ސާރާ ގަޔާލާ ބޮނޑިކޮށްލިއެވެ. ހީވަނީ ނިޔާވެފައިވާ އޭނަގެ އަންހެން ކޮއްކޮ ފެނިގެން އުޅޭހެންނެވެ.
ޝަކީބު އުރާލައިގެން ހުރި ސާރާ އޭނަގެ ދަރިންނާ ހަވާލުކުރުމަށްފަހު ފަރުހާންއާ އެކީ ޖެހިލީ އައިސީޔޫގެ ދޮރުމަތީ ހުރި ފުލުހުސް ކުއްޖާ ކައިރިއަށެވެ. އެ ކުއްޖާއާ ވާހަކަތަކެއް ދެއްކުމަށްފަހު ޝަކީބުއަށް ސާރާ ދެކިލުމަށް ވަންނަން އެ ކުއްޖާ ފުރުސަތު ހޯދައިދިނެވެ.
ފަރުހާން ބޭރުގައި މަޑުކުރީއެވެ. ޝަކީބުއަށް ދިން ވަގުތުކޮޅު ހަމަވުމުންވެސް ކޮއްކޮ ދޫކޮށްލާފަ ނިކުންނާކަށް ބޭނުމެއް ނުވިއެވެ. އެހެންނަމަވެސް އޮންނަ އުސޫލާއެއްގޮތަށް ޖެހުނީ ބޭރުގައި މަޑުކުރާށެވެ!
“ކޮއްކޮގެ ގޮހޮރަށް ކެންސަރ ޖެހިފަ ހުރީ! ކީއްވެބާ ކޮއްކޮ ފަރުވާކުރަން ބޭނުންނުވީ! ގައިމު ޚަރަދަކަށް ބަލާކަށް ނުޖެހޭނެ!” ޝަކީބު ވާހަކަ ދެއްކީ އަމިއްލަ ނަފުސާއެވެ. އެހެން މީހުންނަށް ވެސް އެއަޑު އިވުނެވެ. އެ އަޑުގައިވަނީ މޮޅިވެރިކަމެވެ. ކޮއްކޮ ގެއްލި ދާނެތީ ހިތުގައި އުފެދިފައިވާ ބިރެވެ. ވަގުތު ފާއިތުވީ ފަހުން ކޮއްކޮއާ ބައްދަލުވެވުނީތީ އެކަމުގެ ޝަކުވާއެވެ.
ސަބަބު އެނގޭ މަދުމީހުން ތިއްބެވެ. އެ ސަބަބު އެކަކުވެސް ހާމަ ކުރާކަށް ބޭނުމެއްނޫނެވެ. އެއީ ސިއްރެކެވެ. މިވަގުތު މުހިންމީ ލައިލާއަށް ކުރެވޭ ހެޔޮދުޢާއެވެ.
“އަހަރެން ޑޮކުޓަރާ ބައްދަލުކުރިން! ކޮއްކޮގެ ހުރިހާ ގުނަވަނެއްހެން ވަނީ ފެއިލްވެފައި! އެއްވެސް އުންމީދެއްނެތް! މިރޭވެސް! ……. މާދަމާވެސް ކޮއްކޮ އަހަރެމެނާ ވަކިވެދާނެ!”
އެހިސާބުން ޝަކީބަކަށް ހިފަހައްޓައެއް ނުލެވުނެވެ. އަޑު ތުރުތުރުލައިގެން ކުރިއަކަށް ނުގެންދެވުނެވެ. ލޮލުން އޮހިގެންދިޔަ ކަރުނަ އަންގައިދިނީ ބޮޑުބޭބެއެއްގެ ހިތުގައި ކޮއްކޮއަކަށް އުފެދިފައިވާ ކުލުނެވެ. ލޯތްބެވެ.
ފަރުހާން މަޑުމަޑުން ޝަކީބު ގެންގޮސް ގޮނޑީގައި ބޭންދިއެވެ. ވެއިޓިންއޭރިއާގައި އެވަގުތު ތިބި އެހެންމީހުންގެ ލޯތައް ވެސް ވަނީ ޝަކީބަށް އަމާޒުވެފައެވެ. އެތާ އިން ކޮންމެ މީހަކީވެސް ކޮންމެވެސް ގާތްތިމާގެ މީހަކު އައިސީޔޫގައި އޮވެގެން އެތާ މަޑުކޮށްގެން ތިބި މީހުންނެވެ. އެމީހެއްގެ ޢާއިލާއަށް ހެޔޮދުޢާ ބޭނުންވާ މީހެކެވެ.
ސާރާގެ ޓެސްޓްތަކުން ދެއްކީ އާދައިގެ ހުމެއްކަމެވެ. އެހެން ވިޔަސް ފަރުހާން މަންމަ ގެއަށް ގެންގޮސްލީ ހަވީރު ލައިލާ ކައިރިއަށް މަންމައާ ސާރާ ގެންގޮސްދޭނެ ކަމަށް ބުނެ ވަޢުދުވަމުންނެވެ. ފަރުހާން ވެސް އަރާމުކޮށްލަން މަޑުކޮށްލަން މަންމަ ބުންޏެވެ. އެހެންނަމަވެސް މިހާއަވަހަށް ލައިލާ އައިސީޔޫއަށް ވަންނަން ޖެހުނު ސަބަބަކީ ފަރުހާންއޭ ފަރުހާން ހިތަށް އަރަނީއެވެ. ލައިލާގެ ޙާލަތު މިގޮތަށް ގޯސްވީ އެ ފޯނު ކޯލަށް ފަހުކަމަށް ފަރުހާން އެއްވެސް މީހެއްގެ ގާތަކު ނުބުނެއެވެ.
މަންމަޔާ ސާރާ ބަލާ، ހަވީރު އަންނާނެ ކަމަށް ބުނަމުން ފަރުހާން އަނެއްކާވެސް ނައްޓާލީ ހޮސްޕިޓަލަށެވެ. ފަރުހާން ދިޔުމުން ޝަކީބުއާ އޭނަގެ ދެކުދިން ވެސް ހަވީރު ވިޒިޓިން ގަޑިއަށް އަންނާނަމޭ ބުނަމުން ގެއަށް ދިޔައީއެވެ. ފަހަރެއްގައި ވެސް އެއްވެސް ކަމަކަށް ބޭނުންވެގެން އެހީތެރިއަކަށް ގޮވާލާއިރު ލައިލާގެ އެހީތެރިއަކު ނެތުމަކީ ފަރުހާންއަށް ވަރަށް އަސަރުކުރާނޭ ކަމެކެވެ.
ރަށުންފުރި ފުލައިޓު ހުޅުލޭ ރަންވޭގައި ޖެއްސިއިރު އެ ފުލައިޓުގައި ދަތުރުކުރި އެންމެ ހިތް އަވަސްވެފައިވާ ފަރާތަކަށް ލަމްޔާ ވާނެއެވެ. ފުލައިޓުން ފޭބުމަށްފަހު ލަމްޔާ ގުޅީ ޚަދީޖާއަށެވެ. ބޭނުންވާ ބައެއް މަޢުލޫމާތު ހޯދީ ޚަދީޖާގެ ފަރާތުންނެވެ.
މާލޭގައި ހުންނަ ލަމްޔާގެ ތިމާގެ މީހެއްގެ ގެއަށް ފޮށިލުމަށްފަހު ލަމްޔާ ދިޔައީ ޚަދީޖާ ކިޔައިދީފައިވާ އެޑްރެހަށެވެ. އޭރު ގަޑިން އަދި ފަހެއް ނުޖަހައެވެ. ލަމްޔާއަށް ޚަދީޖާމެން ތިބޭގެއަށް ވަދެވުނު އިރު ޚަދީޖާއާއި ސާރާ ގެއިން ނިކުންނަނީއެވެ.
“މަންމާ!” އެދެމައިން ފެނުމުން ލަމްޔާއަށް ހައިރާންކަމެއް ލިބުނެވެ. ތަނަކަށްދާ ވާހަކަ ބުނެފައި ނެތީމައެވެ.
“ދަރިފުޅާ! ދެންމެ އެ ގުޅީ ފަރުހާން! ލައިލާގެ ހާލު ވަރަށް ސީރިއަށް ކަމަށް ބުނީ! އަވަހަށް އަންނާށޭ ބުނެފަ ފޯނު ކަނޑާލައިފި! ވަރަށް ހާސްވެފަ ހުރީ!” ޚަދީޖާއަށް ރޮވޭވަރުން ވާހަކަދައްކަން ވެސް އުނދަގުލެވެ.
މަގުމައްޗަށް ނިކުމެ ކާރެއް ހޯދުން ވެސް އެއީ ފަސޭހަކަމެއް ނޫނެވެ. އެހެންނަމަވެސް އެގަޑީގައި ނަސީބަކުން ދެތިން ކާރަކަށް އަތް ހިއްލާލުމުން ކާރެއް ލިބިއްޖެއެވެ. ޚަދީޖާގެ ތިން މައިންނަށް ފަރުހާންއިން ވެއިޓިން އޭރިޔާއަށް ދެވުނުއިރު ފަރުހާން ފެންނާކަށްނެތެވެ. ޚަދީޖާގެ ފޯނުން ލަމްޔާ ގުޅާލުމުން ފަރުހާން ނުކުތްއިރު ލަމްޔާ ފެނުމުން މޫނު އަލިވެގެން ދިޔައެވެ. ކުޑަކޮށް ހީނލުން ފިޔަވައި އިތުރު އެއްވެސް ކަމެއް ފަރުހާންއަށް ނުކުރެވެނީސް ރޮވިއްޖެއެވެ. އަދި ޚަދީޖާއަށް އިޝާރާތް ކުރުމުން ސާރާ ބަހައްޓާފައި ވަނީ ޚަދީޖާއެކަންޏެވެ. ފަރުހާން އައިސް ސާރާ އުނގުގައި ބައިންދައިގެން ގޮނޑިއެއްގައި އިށީނދެއްޖެއެވެ.
“ޕްލީޒު، ބީ ސްޓްރޮންގ، ސާރާއަށް ވަރަށް އަސަރުކުރާނެ! ކެތްތެރިވޭ!”
ލަމްޔާ އައިސް ފަރުހާންގެ ކުރިމަތީ ހުއްޓުމުން ފަރުހާންގެ މޫނު ލަމްޔާގެ ބަނޑުގައި ޖައްސައިލިއެވެ. އަދި ބުރަކަށީގައި މަޑުމަޑުން ފިރުމަން ފެށިއެވެ. އެއީ އެވަގުތަށް ވަރަށް އެކަށޭނަ ފަރުވާއެކެވެ. ފަރުހާން މަޑުމަޑުން ސާރާގަޔާލާ ބޮނޑިކޮށްލަމުން، ދަރިފުޅުދެކެ ބައްޕަ ވަރަށް ލޯބިވެޔޭ ބުނެ ސާރާގެ މޫނުގައި އެތައް ފަހަރަކު ބޮސް ދިނެވެ. ސާރާ އިނީ ވާނުވާ ނޭނގި ޙައިރާންކަމެއްގައެވެ.
ކުޑަކުޑަ ސާރާއަށް ނޭނގެނީ އެ ކުޑަކުޑަ ކުއްޖާ ދޫކޮށްލުމަށްފަހު އެ ދަރިފުޅު ބަނޑުއަޅައި ވިހޭ މައިމީހާ މިދުނިޔެއާ ވަކިވުމުގެ ވަގުތު ދާދި ކުޑަތަންވިކަމެވެ. ބައްޕައަށް ކޮށްފައި އެވާއަސަރަކީ އެ ދަރިފުޅުގެ މަންމަ މިދުނިޔެއާ ވަކިވާތީ ކުރާ އަސަރެއް ނޫންކަމާ އެ ދަރިފުޅުގެ އެހާ ޅައުމުރުގައި މިސްކީނަކަށް ވާތަން ދެކެން އެ ބައްޕަޔަށް ކުޅަދާން ނުވެގެން ކުރާ އަސަރެއްކަމެވެ.
އައިސީޔޫގެ ދޮރު ހުޅުވުނުއަޑަށް ފަރުހާންއާއި ލަމްޔާއަށް އެދިމާއަށް ބަލައިލެވުނެވެ. ޚަދީޖާ ހުރީ އަނގަމަތީ އަތްއަޅައިގެންނެވެ. އެމީހުންކައިރީ އަންނާށޭ ބުނީވެސް ބޮލުންނެވެ. ދެލޮލުން ހިފެހެއްޓުމެއްނެތި ކަރުނަ ފައިބަމުންދިޔައެވެ. ފަރުހާން ސާރާ ގޮވައިގެން ވަނުމުން ލަމްޔާ ވެސް އެމީހުންގެ ފަހަތުން ދިޔައެވެ. އެވަގުތަކީ ލައިލާ އޭނަގެ އެންމެ ފަހުގެ ނޭވާ ގުނަމުން ދިޔަ ވަގުތެވެ.
ލައިލާ އޮތް އެނދާ ކައިރިވުމަށްފަހު ލަމްޔާ ސާރާ ގެނެސް ލައިލާގެ އަތުގައި ހިފެހެއްޓުވިއެވެ. އަދި މަޑުމަޑުން ލައިލާގެ ކަންފަތާ އަނގަ ކައިރިކުރުމަށްފަހު ސާރާ ވަރަށް ރަނގަޅަށް ބަލައިދޭނެ ކަމަށް ވަޢުދުވަމޭ ބުނެލިއެވެ. ކިތަންމެ މަޑުން ލަމްޔާ އެހެން ބުންޏަސް އެއަޑު ފަރުހާންއަށް އިވުނެވެ. އެ ވެވުނީ ކިހާވަރުގެ ވަޢުދެއްކަން ރޭކާނުލިޔަސް ސާރާއަށް ވެސް އެ އަޑު އިވުނެވެ. އަދި ލަމްޔާގެ މޫނަށް ލޯބިގޮތަކަށް ބަލައިލިއެވެ.
ފަރުހާން ބޭރަށް ނިކުތީ ލަމްޔާއާއި ސާރާވެސް ގޮވައިގެން ޝަކީބުގެ ތިންބަފައިންނަށް ވަގުތު ދޭން ވެގެންނެވެ. އޭރު ޝަރުފާ ވެސް އައިސް ހުއްޓެވެ. ވެއިޓިން އޭރިއާ އޮތީ ހިތާމަޔާއި ކަރުނުގެ ކަނޑަކަށް ގެނބިފައެވެ. ލައިލާގެ ޙާލު ކިހާސީރިއަސްކަން އެންމެނަށްވެސް އެނގެއެވެ. މިއަދަކީ ލައިލާ މިދުނިޔެމައްޗަށް ނޭވާލާނެ އެންމެ ފަހުދުވަހަށްވުން ވަރަށްކައިރިއެވެ. މިއަދުގެ އިރު އޮއްސިގެންދާނީ ލައިލާގެ މުޅިހަޔާތުގެ އޮއްސުމާއެކު ނޫންކަމެއް ވެސް ނޭނގެއެވެ. އެންމެންގެ ހިތުގައި ވެސް ހިނގަނީ މިޚިޔާލެވެ. އެހެންކަމުން އެ ހާލުގައިވެސް އަދި އިތުރު އެންމެ ދުވަހަކަށް ނަމަވެސް ލައިލާ ދުނިޔޭގައި ލަހައްޓަވާތޯ ހެޔޮ އެދޭމީހުން ދުޢާކުރަމުން ދިޔައެވެ.
ތަޤުދީރު ނިންމާ ގޮތަކާމެދު އެއްވެސް މީހަކަށް ދެކޮޅެއް ހެދުމުގެ ކުޑަވެސް ބާރެއް ލިބިގެންނުވެއެވެ. އިންސާނުންނަށް ކުރެވޭނީ ތަދުބީރެވެ. އެ ކުރާ ތަދުބީރުގައި ކުލައެއް ޖައްސައިލުމުގެ ބާރެއްވެސް ކުޑަމިނުން އިންސާނާއަކަށް ލިބިގެން ނުވެއެވެ.
ދުވަހުގެ އެންމެ ފަހު ދަންފަޅި ހަމަކޮށް އިރު ދުނިޔެއާ އަލްވަދާޢު ކީއިރު ކިތަންމެ ފުރާނައެއް މި ދުނިޔެއާ ވެސް އަލްވަދާޢު ކިޔެވެ. ލައިލާވެސް ހިމެނެނީ އޭގެ ތެރޭގައެވެ. ހެޔޮއެދޭ މީހުންގެ ހެޔޮ ދުޢާއާއެކު މި ފަނާވަނިވި ކެހިވެރި ވަގުތީ މަންޒިލް ދޫކޮށް އާޚިރަތުގެ ގޮވައްޗަށް ލައިލާ ދިޔައީ ފުރިހަމަ ތައުބާއަކުން ތައުބާ ވެގެންނެވެ. ފަރުހާންއާ ލަމްޔާއަށް ނޭނގުނީ ލައިލާ ފަރުހާން ގާތު ލައިލާއާ އިންނަން އެދުނީ ކޮންފަދަ މަތިވެރި ނިޔަތެއްގައި ކަމެވެ. ހިލޭ ފިރިހެނެއްގެ ގޮތުގައި ލައިލާ ގައިގާ ފަރުހާން އަތް ޖައްސާލަން ލައިލާ އޭރު ބޭނުން ނުވާތީއެވެ. ކޮންމެ ގޮތެއްވިޔަސް ލައިލާގެ ހިތް އެ ދެފަރާތަށް ވެސް ސާފެވެ. އެވާހަކަ ލައިލާ ބުނަން ކިތަންމެހާ ވެސް ބޭނުން ވިއެވެ. އެހެންނަމަވެސް ޙާލަތު އެ ގޮތަށް އެ ފުރުސަތު ލައިލާއަށް ނުދިނީއެވެ.
އާސަހަރާގައި ލައިލާގެ ކަށުކަމާކެމީގެ ކަންތައް ހިނގަމުން ދިޔައިރު އެކަމުގައި ބައިވެރިވާން ކިތަންމެހާ ވެސް ބޭނުން އިތުރު މީހަކު ހުއްޓެވެ. އެހެންނަމަވެސް އެ ފުރުސަތު ނުލިބިއެވެ. އިރުއިރުކޮޅާ ދެލޮލުން ފައިބަމުން ދިޔަ ކަރުނަތަކުން އެ ހިތަށް ކޮށްފައިވާ އަސަރު ކިތަންމެ ރަނގަޅަކަށް ވެސް އެނގެއެވެ. އެކަމަކު މިއަދު އެ ކަރުނަތަކުގެ އަގަކީ ކޮބައިހެއްޔެވެ! ލައިލާ ދުނިޔޭގައި ހުރިއިރު ލައިލާގެ ލޮލުން ކިހާ ކަރުނައެއް އެ އިންސާނާގެ ކުރިމަތީ އޮއްސިހެއްޔެވެ! އެދުވަހު ހިތަށް ނުވަން ރަޙުމެއް! …………. ލައިލާގެ ބަނޑުގައި އަށަގަތް އެ ފުރާނައަށްޓަކައި ނަމަވެސް! ……… ފާފަ ކުރީ ދެމީހުންނެވެ. ހުރިހާ ވޭނަކާ ތަކުލީފެއް އުފުލީ ލައިލާ އެކަނި މާއެކަންޏެވެ. މިހާއަވަހަށް ލައިލާ މި ދުނިޔެ ދޫކުރަން ޖެހުނު އެއްސަބަބަކީ އެއީ ނޫންބާވައޭ ވެސް މިހާރު ހުޒާމް ހިތަށް އަރައެވެ.
ލައިލާގެ ޖަނާޒާ ނިމިގެން އެންމެން އެ ތަން ދޫކޮށް ދިޔައިރުވެސް ހުޒާމް އެކަނި މާއެކަނި އެތާ ހުއްޓެވެ. އެކަނިވެރިކަމާ ހިތްދަތިކަން ވަނީ ހުޒާމް ވާށާލާފައެވެ. ކުރެވިފައިވާ ފާފަތަކާ ކުށްތައް މާބޮޑަށް ހަނދާންވެ ގިސްލާ ރޮމުން ދިޔައެވެ. މިއަދު ހުޒާމްގެ ބުރަކަށީގައި ފިރުމާލާ ހިތްވަރުދޭނެ އެއްވެސް ފަރާތެއް ނެތެވެ. ކުޑަމިނުން އެ ކުރާ ހިތާމަ ދެކޭނެ މީހަކުވެސް ނެތެވެ.
އެންމެން ގޮސް ތަން ހުސްވުމުން މަޑުމަޑުން ހިނގާލާފައި ގޮސް ލައިލާގެ މަހާނަ ކައިރީ ހުއްޓުނު ހުޒާމް ގުދުވެ އިރުކޮޅަކު މަހާނައަށް ބަލަން އިނެވެ. އަދި މަހާނައިގެ ބޮލާވީ ކޮޅުގައި އިށީނދެ މަހާނަމަތީ އަތްތިލައިގެ އިގިލިތައް ހިންގައިލިއެވެ.
“ލައިލާ! އަހަންނަށް މަޢާފު ކުރޭ! ލައިލާ ތިހާ ބަލިކަމެއް އެއްގޮތަކަށް ވެސް ނުދެނަހުރިން. ލައިލާ ނުގުޅާ ހުއްޓާލީމަ ވެސް ހިތަކަށް ނާރާ ލައިލާއަށް ހުރެވޭނެއެކޭ! ހީކުރީ އަދި ލައިލާ އަހަރެން ކައިރިއަށް އަންނާނެ ކަމަށް….! އަހަންނަށް މަޢާފު ކުރޭ! ޕްލީޒް! އަހަރެން އަބަދުވެސް ލައިލާއަށްޓަކައި ހެޔޮދުޢާ ކުރާނަން! އަބަދުވެސް އަހަރެންގެ ހެޔޮދުޢާވަނީ ލައިލާއާއެކު!”
ހުޒާމް ދެއަތް މައްޗަށްނަގައި ދެލޯ މަރާލައިގެން އިނދެ ލައިލާގެ ފާފަ ފުއްސެވުން އެދި އެތައް އިރަކު ދުޢާ ކުރުމުގައި އިނެވެ. އެއީ މިއަދު ހުޒާމްއަށް ލައިލާއަށްޓަކައި ކޮށްދެވޭނެ ހަމައެކަނިކަމެވެ.
ހުޅަނގު މޫސުމުގެ ވިއްސާރަ ރެއެކެވެ. އިރު އެރީއްސުރެ އެއްވާނަކަށް ވެހިލަ ވެހިލާ އޮތެވެ. އުޑުމަތި އޮތީ ކަޅުވިލާތަކުން ބަރާވެފައެވެ. ވައިގައި ވަނީ އާދަޔާ ޚިލާފު ތެތްފިނިކަމެއް ހިފާލާފައެވެ. މަގުތަކުގައި ފެންބޮޑުވިޔަސް ގިނަ މީހުންނަކަށް މިހާރު އެކަމުގައި ފަރުވާލެއް ނެތެވެ. ރަށުގެ ބޮޑެތި މަގުތަކުގައި ތާރު އަޅާފައި އޮތުމުންނެވެ. ކިރިޔާ ފެންތިކި މަދުވެލާއިރަށް ވެސް ޒުވާން ޖޯޑުތައް އެމަގުތަކުން ސައިކަލުތަކުގައި ދުއްވާލަން ނިކުމެ އުޅެނީ އެހެންވެއެވެ.
މޫސުމުގެ ހިތްގައިމުކަމާ ޖެހެމުންދިޔަ ފިނި ރޯޅިތަކުން އުފާ ލިބިގަންނަން އެރޭ އެންމެ ބޭނުންވި އެއް ޖޯޑަކީ ފަރުހާންއާ ލަމްޔާގެ ޖޯޑެވެ. ރޭގަނޑުގެ އެ ހަމަ ހިމޭން ވަގުތަށް އެ މީހުން އިންތިޒާރު ކުރާތާ މިހާރު ކިތައް މަސް ފާއިތުވެ ހިނގައްޖެ ހެއްޔެވެ! މިރެއަކީ އެ އިންތިޒާރަށް ނިމުން އައި ރެއެވެ. އައިނީއާ ސާރާއަށް ކާންދީ ނިންދެވުމަށްފަހު ލަމްޔާ އާއި ފަރުހާން ނިކުތީ ބޯގަންވިލާ ގަސްތައް ކައިރިއަށެވެ. ވާރޭކަނި ޖަހާތީ ބޭރަށް ނުނިކުމެ އިރުކޮޅަކަށް މަޑުކޮށްލާނީއޭ ހިތައެވެ.
އަބަދުވެސް ލަމްޔާ ގަސްތައް ކައިރީ މަޑުކޮށްލަން ނިކުމެ ހުންނައިރު އިށީންނަން އެތާގައި ގޮނޑިއެއް ބަހައްޓާފައި ހުރެއެވެ. އެ ގޮނޑީގައި ފަރުހާން އިށީނދެގެން އިނުމުން ލަމްޔާ އެތެރެއަށް ޖެހިލާފައި ނިކުންނަން އައީ އިތުރު ގޮނޑިއެއް ހިފައިގެންނެވެ. މިތަން ފެނުމުން ފަރުހާން ގާތަށް އައީ ލާނެއް ހިންޏެކެވެ.
“އަދިވެސް އަހަރެމެނަށް ދެ ގޮނޑި ބޭނުންވާނެތަ!” ފަރުހާން ބުނިއެއްޗެއް ފަހުމުނުވެ ލަމްޔާ އިރުކޮޅަކު ހުއްޓެވެ.
“މިހިރީ ލަމްޔާއަށް ޚާއްސަ ގޮނޑި!” ފަރުހާން އަތްތިލަ ގެންގޮސް ބޭއްވީ ފަރުހާންގެ އުނގުގައެވެ.
ލަމްޔާއަށް ލަދުން މޯޅިވެވުނެވެ. އައިސް ގާތްވެލުމުން ފަރުހާން ނުހަނު ލޯތްބާ އޯގާތެރިކަމާއެކު ހިފީ ލަމްޔާގެ އަތުގައެވެ. އަދި ފަރުހާން ދެއްކި ތަނުގައި ލަމްޔާ ބައިންދަމުން ވަރަށް ފިނި ރެއެއް ދޯ އޭ ބުންޏެވެ.
“ހަނދު ވެސް ވިލާތަކުން ބޭރަށް މިރޭ ބޯ ދިއްކޮށްލައިފިއްޔާ ލަދުން މަރުވާވަރު ކޮށްލާނަން! …..އޯކޭތަ!” ފަރުހާންގެ ދެ އަތުން ލަމްޔާގެ ތުނި ހަށިގަނޑު ވަށައިލަމުން ސިއްރު ސިއްރުން ބުންޏެވެ! ލަދުގަތީ ހަނދެއް ނޫނެވެ. ފަރުހާން އެ ކޮށްލި ކަމަކުން ލަދުގަތީ ލަމްޔާއެވެ. އެހެންވެ ލަމްޔާގެ މޫނު ފަރުހާންގެ މޭގައި ފޮރުވައިލިއެވެ. އެ ހަށިގަނޑުން ހޫނާ އަރާމު ލިބިގަތުމަށްޓަކައެވެ. އަބަދަށެވެ!
ނިމުނީ
ޚިޔާލުތައް
ވ ވ ރީތި ޝުކުރިއްޔާ މިކަލްނިވްސް