އަލަށް ހޮވުނު ފުވައްމުލައް ސިޓީ ކައުންސިލް މެމްނަރުން މަގާމާއި ހަވާލުވުމުގެ ހުވައިކުރުމަށް ބާއްވާ ދަރުބާރު މާދަމާ، (17 މެއި 2021، ހޯމަ) ހެދުނު 10:00 ގައި ޏ. އަތޮޅު ތަޢުލީމީ މަރުކަޒުގެ ހޯލުގައި ކުރިޔަށް ގެންދާގޮތަށް ފުވައްމުލައް ސިޓީ ކައުންސިލުން ހަމަޖައްސާފައި ވެއެވެ.
މި ރަސްމިއްޔާތުގައި އަލަށް އިންތިޚާބުކުރެވުނު އަންހެނުންގެ ތަރައްޤީއަށް މަސައްކަތްކުރާ ކޮމިޓީ (އ.ތ.ކ) މެންބަރުން ވެސް މަގާމާއި ހަވާލުވުމަށް އިގްރާރުގައި ސޮއިކުރުން ކުރިޔަށް ގެންދިއުމަށް ވަނީ ހަމަޖެހިފައެވެ. މި ދެ ރަސްމިއްޔާތު ވެސް އާއްމުންނަށް ބައިވެރިވެވޭނީ އޮންލައިންކޮށް ކަމަށް ފުވައްމުލައް ސިޓީ ކައުންސިލުން ވަނީ ކަނޑައަޅާފައެވެ.
ކައުންސިލަރުންގެ ހުވާ
މި ދެ ރަސްމިއްޔާތު ވެސް އޮންލައިކޮށް ކުރިޔަށް ގެންދިއުމަށް ނިންމީ މިދުވަސްވަރު ފުވައްމުލައް ސިޓީގައި ވެސް ކޮވިޑް-19 ހަލުވިކަމާއެކު ފެތުރެމުންދާތީއެވެ. މިކަމާއި ގުޅިގެން މިކަލް ނޫހުން ކުރި ސުވާލަކަށް ޖަވާބު ދެއްވަމުން ފުވައްމުލައް ސިޓީ ކައުންސިލްގެ ޑިރެކްޓާ ޖެނެރަލް އަހުމަދު ނިޖާހު ވިދާޅުވީ މިހާރު އޮތް ސިޓީ ކައުންސިލް މެމްބަރުންނާއި އަދި އަލަށް ހޮވިފައިވާ ކައުންސިލް މެމްބަރުން ވެސް ބޭނުންފުޅުވަނީ މި ރަސްމިއްޔާތުގެ ސަބަބުން ފުވައްމުލައް ސިޓީގެ ކޮވިޑް-19 ގެ ހާލަތަށް ނޭދެވޭ އެއްވެސް އަސަރެއް ނުކުރާނެ ކަމުގެ ޔަގީންކަން އޮތް ގޮތަކަށް ހުވާކުރުމުގެ ދަރުބާރު ކުރިޔަށް ގެންދާށެވެ.
އަލަށް ހޮވުނު ކައުންސިލަރުން ހުވާކުރުން 17 މެއި 2021ގައި.
އެގޮތުން މިހާރު ހަމަޖެހިފައިވާ ގޮތުން މި ދަރުބާރުގައި ބައިވެރިވާނީ މިހާރުގެ ކައުންސިލް ދެ މެމްބަރުންނާއި މޭޔަރާއި އަދި އަލަށް އިންތިޚާބުވެފައިވާ މޭޔަރާއި ކައުންސިލް މެމްބަރުންނެވެ. ހުވައި ލާދެއްވާ ގާޒީ އާއި ސިޓީ ކައުންސިލްގެ ޑިރެކްޓާރ ޖެނެރަލް ގެ އިތުރުން ވީހާވެސް މަދު އިދާރީ މުވައްޒަފުން ބައިވެރިކޮށްގެން ކުރިޔަށްގެންދަން ރާވާފައިވާ ކަމަށް ހާމަކުރެއްވިއެވެ. މި ރަސްމިއްޔާތު ކުރިޔަށް ގެންދިއުމުގެ އިސްފަރާތަކީ ފުވައްމުލައް ސިޓީ ކައުންސިލް ގެ ވަގުތީ ސެކެރެޓަރީ ޖެނެރަލް އެވެ.
ކައުންސިލް މެމްބަރުންގެ އިތުރުން މިހާރުގެ އަދި އަލަށް އިންތިޚާބުވެފައިވާ އ.ތ.ކ. މެމްބަރުން ބައިވެރިވެ އިގުރާރުގައި ސޮއިކުރުން އޮންނާނެއެވެ. އާއްމުންގެ ފަރާތުން އެއްވެސް މީހަކު މި ރަސްމިއްޔާތުގައި ބައިވެރިކުރުމަށް ހަމަޖެހިފައި ނުވާކަމަށް ވެއެވެ. މާދަމާ ހުވައިކުރުމުގެ ދަރުބާރުގައި އާއްމުން ބައިވެރިކުރުމުގެ ގޮތުން ސިޓީ ކައުންސިލްގެ ފޭސްބުކް ޕޭޖުން ލައިވްކުރުމަށް ވަނީ ހަމަޖެހިފައެވެ.
ކައުންސިލަރުން އަދި އ.ތ.ކ އަށް ހޮވިފައިވާ މެމްބަރުންގެ ތެރެއިން އެއްވެސް މީހަކީ ކޮވިޑް-19 އަށް ފައްސިވެފައިވާ ނުވަތަ ފައްސިވެފައިވާ މީހެއްގެ ޑައިރެކްޓް ކޮންޓެކްޓަކަށް ވެ ނުވަތަ އެނޫންވެސް ގޮތަކުން ކަރަންޓީން/އައިސޮލޭޓް ކުރެވިފައިވާ މީހެއްނަމަ އެމީހަކު މި ރަސްމިއްޔާތުގައި ބައިވެރި ވާނީ އޮންލައިންކޮށް ކަމަށް އެލްޖީއޭއިން ހާމަކުރައްވައެވެ
އަލަށް ހޮވުނު ކައުންސިލަރުން ހުވާކުރުން 17 މެއި 2021ގައި.
މިހާރުގެ ފުވައްމުލައް ސިޓީ ކައުންސިލްގެ ތިބި 3 މެމްބަރުންގެ ތެރެއިން އެއްވެސް މެމްބަރަކު އަލުން، ކައުންސިލްތަކުގެ 4 ވަނަ ދައުރަށް ހޮވިފައެއް ނުވެއެވެ.
މިހާރު ފުވައްމުލައް ސިޓީ ކައުންސިލްގައި ތިބީ 3 މެމްބަރުންނެވެ. އެއީ:
1. ފުވައްމުލަކު ދެކުނު ދާއިރާއިން އަބްދުﷲ ފަލާޙު ޝަރީފު ފުނާޑެ، މާނެލް (3 އހަރުގެ 2 ދައުރު)- ސިޓީގެ މޭޔަރު
2. ފުވައްމުލަކު މެދު ދާއިރާއިން މުހައްމަދު ޟިރާރު މިސްކިތްމަގު، މާކޯޅި (3 އަހަރުގެ 2 ދައުރު) – ޑެޕިއުޓީ މޭޔަރު
3. ފުވައްމުލަކު އުތުރު ދާއިރާއިން ހަމަދު އަބްދުﷲ ހޯދަޑު، ވާރުތަ (3 އަހަރުގެ 2 ދައުރު) – ކައުންސިލް މެމްބަރު
މީގެ ތެރެއިން މިފަހަރުގެ އިންތިޚާބުގެ ޕްރައިމަރީގައި ވާދަކުރީ މުހައްމަދު ޟިރާރު އެކަންޏެވެ. އޭނާއަށް އެމްޑީޕީ ޕްރައިމަރީ ނާކާމިޔާބުވީއެވެ.
ލާމަރުކަޒީ ގާނޫނަށް ބޮޑެތި ބަދަލުތަކެއް ގެނެސް މިހާރު ވަނީ ފުވައްމުލައް ސިޓީ ކައުންސިލަށް ރަށް 6 ދާއިރާއަކަށް ބަހާފައެވެ. އަދި މޭޔަރަކީ މުޅިރަށުން އިންތިޚާބުކުރާ މަގާމެއްގެ ގޮތަށް ވަނީ ބަދަލުގެނެސްފައެވެ.
މި ބަދަލުތަކާއެކު އިންތިޚާބު ނުބޭއްވި ކުރީގެ ކައުންސިލް މެމްބަރުންގެ މުއްދަތު އަހަރެއްހާ ދުވަހަސް ވަނީ އިތުރުކުރެވިފައެވެ. ލަސްކުރެވުނު އިންތިޚާބު މިއަރު އޭޕްރީލް މަހު ބާއްވައި މަގާމުތަކަށް މެމްބަރުން މިވަނީ އިންތިޚާބު ކުރެވި، މާދަމާ އެމެމްބަރުން ހުވާކުރުން ބާއްވަނީއެވެ.
ކައުންސިލަރުން ހުވައިކުރުމުގެ ދަރުބާރުގެ ސްޓޭޖް 2021
އަލަށް ފުވައްމުލައް ސިޓީ ކައުންސިލަށް ހޮވިފައި ވަނީ:
1. މޭޔަރު: އިސްމާއީލް ރަފީޤް، ދަޑިމަގު/ އާބާދުގެ – އެމްޑީޕީ
2. ފުވައްމުލައްކު ހުޅަނގު-އުތުރު ދާއިރާ: އާއިޝަތު އަބްދުލް ގާދިރު، ދަޑިމަގު/ ޕްލާޒާ – ޕީޕީއެމް (އަންހެނުންނަށް ޚާއްސަ)
3. ފުވައްމުލައްކު އިރު-އުތުރު ދާއިރާ: އަބްދުﷲ ނާސިރު އަހުމަދު، ހޯދަޑު/ ނިޔާޒު – އެމްޑީޕީ
4. ފުވައްމުލައްކު މެދު-އުތުރު ދާއިރާ: މުހައްމަދު ފިކުރީ ، މާދަޑު/ ހޯސްޓް – އެމްޑީޕީ
5. ފުވައްމުލައްކު ހުޅަނގު-ދެކުނު ދާއިރާ: އާމިނަތު އިނާޔާ، ފުނާޑު/ ރަތަމަލާނާ – އެމްޑީޕީ (އަންހެނުންނަށް ޚާއްސަ)
6. ފުވައްމުލައްކު މެދު-ދެކުނު ދާއިރާ: މުހައްމަދު އިސްމާޢީލް، މިސްކިތްމަގު/ ދޫރިއަން – ޕީޕީއެމް
7. ފުވައްމުލައްކު އިރު-ދެކުނު ދާއިރާ: އިބްރާހިމް މުހައްމަދު، ދޫނޑިގަމް/ ގާކެނޑިގެ – އެމްޑީޕީ
މާދަމާގެ މިރަސްމިއްޔާތު ނިމުމާއެކު ލޯކަލް ކައުންސިލް/ ސިޓީ ކައުންސިލްގެ 4 ވަނަ ދައުރުގެ ފުރަތަމަ ޖަލްސާ ބާއްވަން ޖެހެއެވެ. އަދި މިޖަލްސާގައި ކައުންސިލަށް ހޮވިފައިވާ މެމްބަރުންގެ ވޯޓުން ޑެޕިއުޓީ މޭޔަރަކު ހޮވަން ޖެހެއެވެ. އަދި ނިމުނު ކައުންސިލް ދައުރު ހިގައިދިޔަ ގޮތުގެ ރިޕޯޓް ވެސް ހުށަހަޅަން ޖެހެއެވެ. ޑެޕިއުޓީ މޭޔަރުގެ މަގާމަށް އެންމެގިނަ ގޮނޑި ކާމިޔާބުކުރި އެމްޑީޕީ މެމްބަރުންގެ މެދުގައި ވާދަވެރިކަން ބޮޑުވެފައިވާކަމުގެ މައުލޫމާތު ލިބެއެވެ. އެގޮތުން އެމްޑީޕީއިން ހޮވުނު 4 ކައުންސިލް މެމްބަރުން ވެސް ޑެޕިއުޓީ މޭޔަރުގެ މަގާމަށް އަންނަން ޝައުގުވެރިކަން ވަނީ ފާޅުކޮށްފައެވެ.
ނަމަވެސް މިކަލް ނޫޙާއި ވާހަކަ ދެއްކި ފުވައްމުލަކުގެ ސިޔާސީ އިސް ފާރާތަކުން ހާމަކުރާ ގޮތުގައި 4 މެމްބަރުންނަށް އެއްބަސްވުމަކަށް ނާދެވޭނަމަ އެކަން ހައްލުކުރުމަށް އެފަރާތުން ހުރީ ވިސްނައިގެންނެވެ. ނަމަވެސް އެމްޑީޕީ އިންތިޚާބީ މެމްބަރުންގެ އެކަމަށް ވަކި ގޮތެއް ހަމަޖެހިފައިވާކަން އަދި އެނގިފައެއް ނުވެއެވެ.
އތކ ގެ މެމްބަރުން އިގުރާރުގައި ސޮއިކުރުން މާދަމާ. 17 މެއި 2021
މީގެ އިތުރުން ނިމުމުން އ.ތ.ކ ގެ މިދައުރުގެ ފުރަތަމަ ޖަލްސާ ވެސް މާދަމާގެ ސިޓީ ކައުންސިލްގެ ފުރަތަމަ ޖަލްސާއަށްފަހު ބާއްވަން ޖެހެއެވެ. އެޖަލްސާގައި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ރައީސާ އާދި ނާއިބު ރައީސާ ވެސް މެމްބަރުންގެ ވޯޓުން ހޮވަން ޖެހެއެވެ. މި ދެ ޖަލްސާގެ ރިޔާސަތު ވެސް ބަލަހައްޓާނީ އަލަށް ހުވައިކުރާ މޭޔަރެވެ.
ފުވައްމުލައް ސިޓީގެ އ.ތ.ކ އަށް ހޮވިފައިވަނީ އަމިއްލަ ގޮތުން ކުރިމަތިލި ކެންޑިޑޭޓަކާއި އެމްޑީޕީގެ 3 ކެންޑިޑޭޓުންނާއި ޕީޕީއެމްގެ 2 ކެންޑިޑޭޓުންނެވެ.
މުހައްމަދު ޝިހާބް 
ޚިޔާލުތައް