މޫސުމީ ހުދު ސަމާލު އަދިވެސް ކުރިޔަށް

އިއްޔެއްސުރެން ފުވައްމުލައް ސިޓީ ހިމެނޭ ސަރަހައްދަށް މޫސުން ގޯސްވެ، ހުދު ސަމާލު ނެރެމުން އެބަ އާދެއެވެ. އެންމެ ފަހުން މޫސުމާއި ބެހޭ އިދާއާރިން މިވަނީ މިއަދު، 26 މެއިން 2021 ދުވަހުގެ ހެނދުނު 8:00 އިން މެންދުރު 13:00 އަށް ހުދު ސަމާލުގެ މުއްދަތު އިތުރުކޮށްފައެވެ.

މިފަހަރު ރާއްޖޭގެ މޫސުން ގޯސްވެގެން މިއުޅޭނީ ރާއްޖޭގެ އިރުއުތުރުން ބޭ އޮފް ބެންގަލް ނުވަތަ ބަންގާޅު ކަނޑުގައި އުފެދިގެން އުޅޭ މޫސުމީ ތޫފާނެއްގެ ސަބަބުންނެވެ. މި ތޫފާނުގެ މިސްރާބު ރާއްޖެއާއި ދުރަށް ހުރިކަމުގައި ވިޔަސް އޭގެ އަސަރު ރާއްޖެއަށް އަންނަނީ ކުރަމުންނެވެ. އެގޮތުން ރާއްޖޭގެ އުތުރުގެ އަތޮޅުތަކަށް މޫސުމީ އަސަރު ބޮޑަށް ކޮށް، މިއަދު ހެނދުނު 10:00 އާއި ހަމަޔަށް ރީނދޫ ސަމާލު ނެރެފައި ވެއެވެ. ނަމަވެސް މިހާރު އުތުރުރުގެ ސަރަހައްދަށް އިތުރު ސަމާލެއް ނެރެފައެއް ނުވެއެވެ.

މިއަދު މެންދުރަށް ނެރެފައިވާ ހުދު ސަމާލު

ދެކުނުން މޫސުމީ ހުދު ސަމާލު ނެރެފައި ވަނީ އައްޑޫ ސިޓީ އާއި ފުވައްމުލައް ސިޓީއަށެވެ. މިހާލަތުގައި އާއްމު ވައި ގަޑިއަކު 19-24 މޭލު ބާރުމިނުގައި ޖެހޭނެ ކަމަށް ލަފާކުރެއެވެ. ކުރިޔަށް އޮތް 2 ދުވަހު ވެސް ރާއްޖޭގެ އެކި ހިސާބުތަކަށް ވާރޭވެހޭނެ ކަމަށް ދައްކައެވެ. ނަމަވެސް ހޮނިހިރު ދުވަހު މޫސުން ރަނގަޅުވާނެ ކަމަށް ބެލެވެއެވެ.

ދެކުނާއި މެދު ރާއްޖެތެރޭގެ މޫސުން ކުރިޔަށް އޮތް 24 ގަޑިއިރަށް (މިއަދު ހެނދުނު 1:00 އިން މާދަމާ ހެނދުނު 10؛00 އަށް) ލަފާކުރާގޮތުން މިއަދު މެންދުރުފަހު ކެރީގެ އަސަރު ފޯރާނެއެވެ. އަދި މި ސަރަހައްދުތަކަށް ގުގުރުން އެކަށީގެންވާ ކަމަށް ލަފާ ކުރެއެވެ. ދެކުނުގެ އަތޮޅުތަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި ވިލާ ގަނޑުގައި ގަޑިއަކު ގާތްގަނޑަކަށް 45 މޭލާއި 55 މޭލާ ދެމެދުގެ ބާރުމިނަށް ވައި ގަދަވުން އެކަށީގެެންވާ ކަމަށް ލަފާކުރެއެވެ.

ރާއްޖޭގެ އުތުރުގެ އެކި ހިސާބުތަކަށް ވިއްސާރަކޮށް ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށް ލަފާކޮށްފައި ވެއެވެ. އުތުރާއި މެދުރާއްޖެތެރޭގެ އަތޮޅުތަކަށް ހުޅަނގުދެކުނާއި ހުޅަނގުން ގަޑިއަކު 18 މޭލާއި 28 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރެއެވެ.

މިފަހަރު މުސން ގޯސްވެގެން އުޅޭނީ ބަންގާޅު ކަނޑުގެ ތުފާނެއްގެ ސަބަބުން

ރާއްޖޭގެ ކަނޑުތައް އާންމު ގޮތެއްގައި ގަދަ ވާނެ ކަމަށާއި ރާޅުގެ އުސްމިން 4 – 8 ފޫޓު އަށް އާރާނެކަމަށް ލަފާކޮށްފައި ވެއެވެ. އަދި ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރުކުރުން އެކަށީގެން ވެއެވެ.

ރާއްޖޭގެ މޫސުން ގޯސްވެ، ކަނޑުތައް ގަދަވާނެކަމަށް ލަފާކުރެވޭތީ ހުރިހާ ފަރާތްތަކުން، ހާއްސަކޮށް ކަނޑުފަތުރުކުރާ ފަރާތްތަކުން ސަމާލުވުމަށް މޫސުމާބެހޭ އިދާރާއިން އެދިފައިވެއެވެ.