މުހައްމަދު ޝިހާބް ފުވައްމުލައް ސިޓީގައި ކަނޑާފައިވާ ނެރުތައް ބަންދު ކުރުން ރައީސުލްޖުމްހޫރިއްޔާގެ ނާއިބު އޮނަރަބްލް ފައިސަލް ނަސީމު އިއްޔެ (26 އޮކްޓޯބަރު 2021) ފައްޓަވާދެއްވައިފިއެވެ. ލަފާފުރުމާއި އަދި އެނޫން ގޮތްގޮތުންވެސް ނެރުތަކުން ބޭނުންކުރުމުގައި ހިނގާފައިވާ ހާދިސާތަކުގައި ފުރާނަ ގެއްލި ގޮސްފައިވާ ފަރާތްތަކުގެ ހަނދާނުގައި 30 ސިކުންތުގެ ހަމަހިމޭންކަމުގެ ސުކޫތެއް އިއްޔެގެ މި މަސައްކަތް ފެއްޓުމުގެ ރަސްމިއްޔާތުގައި ގެނެސްފައިވެއެވެ. މިރަސްމިއްޔާތު ބާއްވާފައިވަނީ މާނޭރެ އަތިރިމަތީގައެވެ.
ނެރުތައް ބަންދުކުރުމުގެ ރަސްމިއްޔާތު ގައި ރައީސުލްޖުމްހޫރިއްޔާގެ ނާއިބު
މިއީ ފުވައްމުލައް ސިޓީގައި އެންމެ އިހުގައި ރަށަށް އަރާ ފޭބުމަށް ބޭނުންކުރަމުން އައި 8 ނެރު ޑައިނަމޭޓް އަޅާއި ގޮއްވައި ބޮޑު ކުރުރުމަށްފަހު އަލުން އެނެރުތައް ބަންދުކުރުމުގެ މަސައްކަތް ކުރާ ދެވަނަ ފަހަރެވެ. ފުރަތަމަ ބުރުގެ މަސައްކަތުން ވަނީ ފުވައްމުލައް ސިޓީގެ އިރު އުތުރު ފަރާތުގެ 4 ނެރު ބަންދުކުރުމަށް، ނެރުގެ ބޭރު ކޮޅުން ހުރަހަށް ގެރިގާ (ޓެޓްރާ ޕޮޑް) ޖަހާފައި ވެއެވެ.
މިފަހަރުގެ މަސައްކަތުގައި ބަންދުކުރުމަށް ހަމަޖެހިފައިވަނީ ފުވައްމުލައް ސިޓީ ހުޅަނގު ދެކުނު ފަރާތުގައި ކަނޑާފައިވާ 4 ނެރެވެ. އެއީ ދަޑިމަގު އަވަށުން ނެރަގަނޑު ފަންނު ނެރާއި، ދިގުވާޑުން އަރުއްފަންނު ނެރާއި، މިސްކިތްމަގުން މާނޭރު ނެރާއި ފުނާޑުން ކަނދުވަލި ފަންނު ނެރެވެ. މިނެރުތައް ވެސް ބަންދުކުރުމަށް ހަމަޖެހިފައިވަނީ ނެރުގެ ބޭރު ކޮޅުން ހުރަހަށް ގެރިގާ (ޓެޓްރާ ޕޮޑް) ޖަހައިގެންނެވެ.
ފުވައްމުލައް ސިޓީގެ ބަނދުރު 2003 ގައި ހުޅުވުމުން މިނެރުތަކުން ވަދެނުކުމެ ހެދުން އެއްކޮށްހެން ވަނީ ހުއްޓިފައެވެ.
ފުވައްމުލަކުގެ އިރުމަތީ ބިތުގެ ނެރުތައް ގެރިގާ ޖަހައި ބަންދުކޮށްފައި
މިނެރުތަކަކީ ފުވައްމުލައް ސިޓީގެ މީހުން މޫދަށް އެރުމަށް ބޭނުންކުރާ ތަންތަނަށް ވެފައި އެތަންތަނުގެ އޮއިވަރަށް އަންނަ ކުއްލި އަދި ބޮޑެތި ބަދަލުތަކާއި ގުޅިގެން މޫދަށް ދާމީހުން އޮޔާއި ގެނބެން ދިމާވުމުގެ ހާދިސާތައް ދިމާވަމުން އަންނަކަން ވަނީ ފާހަގަ ކުރެވިފައެވެ. އަދި ފުރަތަމަ ބަންދުކުރެވުނު ނެރުތަކުން މޫދަށް އެރިއުޅެނިކޮށް އޮޔާއި ދަމައިގެންދިޔަ އެތައްބައެއް ސަލާމަތްކުރެވިފައިވާކަން ފުވައްމުލައް ސިޓީގެ ރައްޔިތުން ފާހަގަ ކުރެއެވެ. ފަޅެއް ނެތުމުގެ ސަބަބުން ފުވައްމުލަކު މީހުން މޫދަށް އެރުމަށް ގިނައިން ބޭނުން ކުރަނީ މި ނެރުތަކެވެ.
މި ނެރުތައް ބަންދު ކުރުމުގެ މަސައްކަތަކީ ކުރިން ރޭވިފައިވާ މަސައްކަތަކަށް ނޫނެވެ. ނަމަވެސް މިއަހަރު، ޖެނުއަރީ މަހު ފުވައްމުލައް ސިޓީގައި ހިނގާދިޔަ ހިތާމަވެރި ހާދިސާއެއްގައި އެފްއެސްގެ ގްރޭޑް 10ގެ ދަރިވަރު، ފައުޒާނުގެ ފުރާނަ ގެއްލިދިއުމާއި ގުޅިގެން ފުވައްމުލައް ސިޓީގެ ރައްޔިތުން ވަނީ ނެރުތައް ބަންދުކޮށްދެއްވުމަށް ސަރުކާރުގައި އެދިފައި ވެއެވެ. އަދި މިއީ ރައީސުލްޖުމްހޫރިއްޔާ އެކަމަށް އެއްބަސްވެ ވަޑައިގެން ނެރުތައް ބަންދުކުރުމަށް ކުރިޔަށް ގެންދެވޭ މަސައްކަތެކެވެ. މި މަސައްކަތް ކުރުމަށް ހަމަޖެހިފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ (އެމް.ޓީ.ސީ.ސީ.) ގެ ސީ.އެސް.އާރު މަސައްކަތުގެ ތެރޭގައި ހިމަނައިގެންނެވެ.
ނެރުތައް ބަންދުކުރުމުގެ އަމަލީ މަސައްކަތް ފެށުން
ނެރުތައް ބަންދުކުރުމުގެ މަސައްކަތް ފެށުމުގެ ރަސްމިއްޔާތުގައި ރައީސުލްޖުމްހޫރިއްޔާގެ ނާއިބުގެ ވާހަކަފުޅުގައި، މިއީ ރައްޔިތުންގެ ސަރުކާރެއް ކަމަށާއި ރައްޔިތުންގެ އަޑު އަހަން މި ސަރުކާރުގެ އިތުރުން ރައީސުލްޖުމްހޫރިއްޔާ ވަރަށް ބޮޑަށް ތައްޔާރު ކަމަށް ވިދާޅުވިއެވެ. އެގޮތުން ރައްޔިތުންނަށް މުހިންމުވާ ކިތަންމެ ކުޑަކަމެއްވިޔަސް މި ސަރުކާރުން ނުކޮށް ދޫކޮށްނުލައްވާނެ ކަމަށް ރައީސުލްޖުމްހޫރިއްޔާގެ ނާއިބު ފައިސަލް ވިދާޅުވިއެވެ.
ލާމަރުކަޒީ ގާނޫނުގެ ދަށުން ހިންގުން ހަރުދަނާ ވެގެންދާއިރު ސަރުކާރުން ހުރިހާ ރައްޔިތުންނާއި ހަމައަށް ޚިދުމަތްތައް ފުޅާކޮށް، ފުރިހަމަ ކުރުމަށްޓަކައި ގިނަ މަސައްކަތްތަކެއް ކުރަމުންދާ މަންޒަރު ފެންންމުންދާކަމަށް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
ނެރުތައް ބަންދުކުރުމުގެ އަމަލީ މަސައްކަތް ރައީސުލް ޖުމްހޫރިއްޔާގެ ނާއިބު ފައްޓަވައި ދެއްވަނީ
ޚިޔާލުތައް