މުހައްމަދު ޝިހާބް ޏ.އަތޮޅު ތައުލީމީ މަރުކަޒު (ޏ.އޭއީސީ) ގެ 40 ވަނަ އަހަރީ ދުވަހުގެ ހަރަކާތައް މުޅި އަހަރު ދުވަހަށް ބަހާލައިގެން ކުރިޔަށް ގެންދިއުމަށް ރާއްވަވާފައިވާ ކަމަށް ޕްރިންސިޕަލް އިސްމާއީލު ސައުދުﷲ ވިދާޅުވެއްޖެއެވެ.
ސާޅީސް ވަނަ އަހަރީ ދުވަސް ފާހަގަކުރުމުގެ ފެށުން އޮތީ އިއްޔެ ހަވީރުގެ ރޯދަވީއްލުމާއި މަޣުރިބު ނަމާދު ޖަމާއަތުގައި ސްކޫލް ހޯލުގައި ކުރުމުންނެވެ. މިހަރަކާތުގައި ސްކޫލުގެ ދަރިވަރުންނާއި މުވައްޒަފުން ބައިވެރިވެފައި ވެއެވެ. އިއްޔެއާއި މިއަދު ދަރިވަރުންނާއި މުވައްޒަފުން ސްކޫލް ގޯތިތެރެ ޒީނަތްތެރި ކުރުމާއި ކްލާސްތައް ޑެކަރޭޓްކުރުމުގެ މަސައްކަތް ކުރިޔަށް ގެންގޮސްފައިވާ ކަމަށް ޕްރިންސިޕަލް މައުލޫމާތު ދެއްވިއެވެ. އަދި މިރޭ 9:30ގައި ޚާއްސަ މެދެދަން (ތަރާވީސް ބުއިމެއް) ބޭއްވުމަށް ރޭވިފައި ވެއެވެ.
ޏ.އޭއީސީއަސް 40 ވަނަ އަހަރީ ދުވަސް ފާހަގަ ކުރުން – 2022
މިއަހަރުގެ އަހަރީ ދުވަހުގެ ޝިއާރަކީ ‘ޕާފެކްޓިން އެޑިއުކޭޝަން ސިންސް 1982″ އެވެ. އަދި މިދުވާހައި ގުޅުވައިގެން ސޯޝަލް މީޑިއާގައި ބޭނުންކުރުމަށް ނިންމާފައިވާ ހޭޝްޓެގަކީ GNAEC40 # އެވެ. ޏ.އޭއީސިއިން އެދެނީ ކުރީގެ ދަރިވަރުންނާއި މިހާރުގެ ދަރިވަރުން އަދި މުވައްޒަފުން އަދި ބެލެނިވެރިން ވެސް ސްކޫލުގެ 40 ވަނަ އަހަރީ ދުވަސް ފާހަގަކުރުމުގެ ގޮތުން ސްކޫލާއި ގުޅޭ ކުރީގެ އިވެންޓްްތަކުގެ ފޮޓޯއާއި އެކިއެކީ މީޑިއާތައް މިހޭޝްޓެގާއިއެކު ޝެއާކޮށް ދެއްވުމަށެވެ.
ޕްރީންސިޕްލް ސައުދުﷲ އާއި ޓީޗާ ފިރާޝް އަދި ދަރިވަރުން
މިއަދަކީ ޏ.އޭއީސީ ހުޅުވުނުތާ 40 އަހަރު ފުރޭ ދުވަހެވެ. އެސްކޫލް ހުޅުވުނީ 20 އޭޕްރީލް 1982 ގައެވެ. އޭޕްރީލް 20 ގައި ޏ.އޭއީސީ ހުޅުވަން ޖެހުނު ސަބަބަކީ އެދުވަސްވަރު ދިރާސީ އަހަރުގެ ކިޔެވުން ފަށަނީ އޭޕްރީލް މަހު 20 ގައި ކަމަށް ވުމުންނެވެ.
އަހަރީ ދުވަހުގެ ހަރަކާތެއްގެ ގޮތުގައި ކުރިޔަށް އޮތް ފިތުރު އީދު ފާހަގަކުރުން، އީދު ސަޔާއެކު ކުރިޔަށް ގެންދިއުމަށް ވެސް ހަމަޖެހިފައި ވެއެވެ. މީގެ އިތުރުން ކުރީގެ ދަރިވަރުންނާއި، މުވައްޒަފުންނާއި ބެލެނިވެރިން ޝާމިލްކޮށްގެން އެކިއެކި ހަރަކާތްތައް ހިންގުމަށް ޕްލޭން ކުރެވިފައިވާ ކަމަށް މައުލޫމާތު ދެއްވިއެވެ. އެގޮތުން އެލަމްނައި (ކުރީގެ ދަރިވަރުންގެ ޖަމްއިއްޔާ) އަލުން އިފުތިތާހު ކުރުމާއި ކުރިޔަށް އޮތް 40 އަހަރަށް ސްކޫލްގެ ލަނޑުދަނޑިތަކެއް ކަނޑައެޅުން ހިމެނޭކަމަށް ވިދާޅުވިއެވެ.
ޏ.އޭއީސީއަށް 40 ވަނަ އަހަރީ ދުވަސް ފާހަގަ ކުރުމުގެ ގޮތުން ބޭއްވި ރޯދަވީއްލުން- 2022
މީގެ އިތުރުން ވެސް 40 ވަނަ އަހަރު ފާހަގަ ކުރުމުގެ ގޮތުން ތަފާތު ހަރަކާތްތައް ރޭވިފައިވާ ކަމަށާއި އެހަރަކާތްތައް ރޯދަމަހަށްފަހު ފައިނަލް ކުރެވި އެންމެންނާއި ހިއްސާކުރެވިގެން ދާނެކަމަށް ސައުދު ވިދާޅުވިއެވެ. އަހަރީ ދުވަހުގެ ޚާއްސަ ޖަލްސާ ބޭއްވުމަށް ހަމަޖެހިފައި ވަނީ ވެސް ރޯދައިގެ ފަހުންނެވެ.
ޏ.އޭއީސީ އަކީ ކުރީގެ ޏ.އަތޮޅު މަދަރުސާ އުވާލައި އުފެއްދި ސްކޫލެކެވެ. އަދި ޏ.އޭއީސީ ހުޅުވުމުން ޏ.އަތޮޅު މަދަރުސާގައި ތިބި ދަރިވަރުން ޏ.އޭއީސީއަށް ބަދަލުކުރިއެވެ. އަލަށް ޏ.އޭއީސީ އަށް ވެއްދި ދަރިވަރުންނާއި އަތޮޅު މަދަރުސާއިން ބަދަލުކުރި ދަރިވަރުން ތިބީ ގްރޭޑް 1 ގައި ނަމަވެސް ދެ ކްލާހެއްގައެވެ. އަދި ބަދަލުކުރި ދަރިވަރުން ފަހުން ގްރޭޑް 2 އަށް ހަމަޖައްސައި ގްރޭޑް 1 ގައި ކިޔެވީ އަލަށް ވެއްދި ދަރިވަރުންނެވެ. ހަމައެއާއެކު އަތޮޅު މަދަރުސާގައި ތިބި ސީނިއާ ކްލާހުގެ ދަރިވަރުން ޏ.އޭއީސީއަށް ބަދަލުކުރީ ޚާއްސަ ކްލާހަކަށެވެ.
ޏ.އޭއީސީގެ އެންމެ ކުރީ ކޮޅުގެ ދަރިވަރުން – އެކުދިނ އަތުގައި އެވަނީ އޭރުގެ ފޮތްދަބަސް- ފޮޓޯގެ ވެރިފަރާތަށް ހައްގު ޝުކުރު
ޏ.އޭއީސީއިން ފުރަތަމަ ގައުމީ އިމްތިހާނެއް ހެދީ އެ (ސީނިއާ) ދަރިވަރުންނެވެ. އެއީ ކުރިން ރާއްޖޭގައި ބޭއްވި ޖޫނިއާ ސްކޫލް ސެޓްފިކެޓް (ޖޭއެސްސީ) އިމްތިހާނެވެ. އެއީ ގްރޭޑް 7 ނިންމާފައި ސެކަންޑަރީއަށް ދިއުމަށް ހަދަން އޭރު މަޖުބޫރު އިމްތިހާނެކެވެ. އެ އިމްތިހާނުގަިއ ބަިއވެރިވި ފުރަތަމަ ފަހަރު ހުރިހާ މައްދާއަކުން ފާސްވީ ޏ.އޭއީސީގެ އަންހެން ދެ ދަރިވަރުންނެވެ.
ޏ.އޭއީސީއަށް ގައުމީ ފެންވަރުގެ އިމްތިހާނެއްގައި މުޅިރާއްޖެއިން 1 ވަނަ ހޯދައިދިން ދަރިވަރުން -1988ގެ ޖޭއެސްސީ އިމްތިހާނުން.
ޏ.އޭއީސީއަށް މިހާތަނަށް ކިޔެވުމުގެ ރޮނގުން ގައުމީ ފެންވަރުގައި އެންމެ މަތީ ވަނައެއް ހާސިލު ކުރެވިފައިވަނީ ވެސް ޖޭއެސްސީ އިމްތިހާނުގައެވެ. އެއިމްތިހާނުގެ އެންމެ ފަހުބުރު، (އެއީ ޏ.އޭއީސީއިން އެއިމްތިހާނުގައި ބައިވެރިވި 3 ވަނަ ފަހަރު) ގައި މުޅިރާއްޖެގެ ކޮންމެ ސްކޫލަކުން ބައިވެރިވި ދަރިވަރުންގެ އެވްރެޖު ނަތީޖާއިން އެންމެ މަތިން ހޯދައި މުޅި ރާއްޖެއިން 1 ވަނަ ހާސިލުކުރުމެވެ. އަދި ގައުމީ ގަދަ 10ގައި 4ވަނަ އަދި 8 ވަނާގައި 2 ދަރިވަރުން ހިމެނިފައި ވެއެވެ.
ސެކަންޑަރީ ލެވެލް އުފެދި ޖީސީއީ އޯލެވެލް ހަދަން ފެށީ އެއިގެ މާ ފަހުންނެވެ.
ޚިޔާލުތައް