އިބްރާހިމް ލަތީފް ކިޑްނީ ބަލީގެ ސަބަބުން ޑައިލިސިސް ހަދަންޖެހޭ ފަރާތްތަކަށް އެޚިދުމަތް ލިބޭނެ އިންތިޒާމު ހަމަޖެއްސުމުގެ ގޮތުން ފުވައްމުލަކުގައި ޑައިލިސިސް ސެންޓަރެއް ގާއިމުކުރުމުގެ މަސައްކަތް ސަރުކާރުން ކުރިއަށް ގެންދާކަމުގެ މައުލޫމާތު މިކަލް ނޫހަށް އިތުބާރު ހުރި ގޮތަކަށް ކަށަވަރުވެއްޖެއެވެ. ސަރުކާރުގެ އިސް އޮފިޝަލަކު މައުލޫމާތު ދިން ގޮތުގައި ޑައިލިސިސް ސެންޓަރު ހެދުމަށް ބޭނުންވާ ސާމާނު ހޯދުމަށާއި އެސެންޓަރު ގާއިމުކުރުމަށް ބޭނުންވާ ތަކެތި ހޯދުމަށް ވަރަށް އަވަހަށް ބިޑަށް ހުޅުވާލެވޭނެއެވެ.
ޑައިލިސިސް ފަރުވާ ފުވައްމުލަކު ހޮސްޕިޓަލުން ލިބެން ނެތުމުގެ ސަބަބުން ބައެއް ފަރާތްތަކުން ފުވައްމުލައް ދޫކޮށް މާލެއަށް ނޫނީ ހުޅުމާލެއަށް ހިޖުރަކޮށް ދަތި ހާލުގައި އުޅެން ޖެހެއެވެ. މިދަތި ހާލު ތަހައްމަލުކުރަމުންދާ ފަރާތްތަކާއި ބަދަލުވެ އެކަމުގެ ދަތި އިހުސާސްކުރެވިފައިވާ ކަމަށް ފުވައްމުލަކު އުތުރު ދާއިރާއަށް ކުރިމަތިލެއްވި ކެންޑިޑޭޓު މުހައްމަދު ރަޝީދު (ދޮންބެ) އެންމެފަހުން ފުވައްމުލަކުގައި ބޭއްވި ކެމްޕޭނެ ޖަލްސާގައި ވިދާޅުވިއެވެ.
ފުވައްމުލައް ސިޓީ އަކަށް ބަދަލުވި ނަމަވެސް، ގިނަ އަސާސީ ޚިދުމަތްތަކެއް ނުލިބޭ ކަމުގެ ޝަކުވާ ގިނަ ރައްޔިތުން ކުރަމުންދެއެވެ.
ފާއިތުވީ ދެހަފުތާއެއްހާ ދުވަހުގެ ތެރޭ އެންމެ ގިނަ ކަންތައްތައް އިއުލާންކުރެވުނު ރަށަކީ ފުވައްމުލަކެވެ. އެގޮތުން، ފުވައްމުލަށް ވަށައިގެންވާ ނައިބުތުއްތު މަގުގެ ބައެއްގައި ތާރު އެޅުމުގެ މަސައްކަތް ހަވާލުކުރުމާއި ފުވައްމުލަކުގެ ގިރާ ސަރަހައްދު ހިމާޔަތްކުރުމަށް ބިޑަށް ހުޅުވާލުންވެސް ހިމެނެއެވެ. މިފަދަ ގިނަ ކަންތައްތަކެއް ސަރުކާރުން އިއުލާން ކުރައްވާފައި މިވަނީ ފުވައްމުލަކަށް ނިސްބަތްވާ ނާއިބު ރައީސެއް ހުންނަވައިގެން ފުވައްމުލަކަށް ކުރެވުނު ކަންތައްތަކާއި މެދު މަދު ބަޔަކު ސުވާލުވެސް އުފައްދަމުންދާ ދަޑިވަޅެއްގައެވެ. ފުވައްމުލަކަށް ނިސްބަތްވާ ނާއިބު ރައީސް ފައިސަލް ނަސީމަކީ ފުވައްމުލަކަށް ގިނަ އިޖުތިމާއީ ކަންތައްތަކެއްކޮށްދެއްވި ބޭފުޅެކެވެ.
ޚިޔާލުތައް