އަހުމަދު ނިޖާހް އެޑިއުކޭޝަން މިނިސްޓަރު ޑރ. އައިޝަތު އަލީ ޚާއްސަ މެސެޖެއް ފުވައްމުލަކު ދަރިވަރުންނަށް ފުވައްމުލަކު ބަހުން ދީފިއެވެ.
އެޑިއުކޭޝަން މިނިސްޓާ ޑރ. އައިޝަތު އަލީ ކުރެއްވި ޓްވީޓެއްގައި ވިދާޅުވެފައިވަނީ “ކޫދުނޭ! ތި ކޫދުން ދަކޮނާހިތެން، ތި ކޫދުންނާ ބަހައްކޭނހިތެން ހަމަ މަރޮވެނީ. ރައްކަލްތެރި މާހައުލަކުން އަފުން އެންމެން ބައްދަލްވެ ތިކޫދުންނާ އެއްކޮހޮ އަލް ފެށުމަކުން ފެށެންނެން ދުވަހަކަ މަޑޮމިކެރަނީ ކެއްވެގެނައް ނުން. އިރާދަކުރެއްވީ ފަހެނާ ދެން މާގިނަ ދުވަހައް ނިވެ އަފުން އެންމެން އެއްތަން ވެންނެން.” އެޑިއުކޭޝަން މިނިސްޓަރު ވިދާޅުވިއެވެ. އެޑިއުކޭޝަން މިނިސްޓަރުގެ މިމެސެޖްއަކީ ކޮވިޑް-19 އާއި ގުޅިގެން ސްކޫލްތައް ބަންދު ކުރުމަށްފަހު އަލުން ހުޅުވުމަށްޓަކައި ތައްޔާރުވުމުގެ ގޮތުން ދެއްވި މެސެޖެކެވެ.
އެޑިއުކޭޝަން މިނިސްޓަރުގެ ޓްވީޓް ރީޓްވީޓް ކުރައްވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އައިޝަތު އާތިޔާ ނަސީރު ވިދާޅުވީ “އެޑިއުކޭޝަން މިނިސްޓަރު ދައްކަވާ ވަރަހަ ރަންގަޅަ ނަމޫނާއެއް މީ. ހުށިހައި ބަހުރުވާސް ރިވެތިކަން. އެކޫދަކުގެ ބަހުރުވާށަ އެކޫދަކު ފަރިތަވެންނަ ވެންނެންކަން.” އާތިޔާ ވިދާޅުވިއެވެ.
ޑރ. އައިޝަތު އަލީގެ މެސެޖަށް ކޮމެންޓްކުރި އެއް ބޭފުޅަކު ބުނެފައިވަނީ ކުރިން ހީވެފައި އޮންނަނީ ފުވައްމުލަކު ބަހުން ވާހަކަދައްކާ ލިޔެ އުޅުމަކީ ލަދުވެތި ކަމެއްކަމަށް، ނަމަވެސް މިނިސްޓަރުގެ އެމެސެޖުން އެގިގެންދިޔައީ ފުވައްމުލަކު ބަހަކީވެސް ފަޚުރެއްކަމާއި އެބަހުން ވެސް ލިޔެކިޔަން ވެއްޖެކަން ކަމަށެވެ.
އެޑިއުކޭޝަން މިނިސްޓަރުގެ މިޓްވީޓްގެ ސަބަބުން ފުވައްމުލަކު ބަހަކީ ވެސް ސްކޫލްތެރޭގައި ބޭނުން ކުރެވޭނެ ބަހެއް ކަމާއި އަދި ކުރިއަށް އޮތްތަނުގައި ފުވައްމުލަކު ބަހުން ސުކޫލް ތެރޭގައި ދަރިވަރުންނަށް ވާހަކަ ދެއްކުމުގެ ފުރުސަތު ލިބިގެންދާނެކަމުގެ ފެހި ސިގްނަލެއް ކަމަށް ބައެއް ފަރާތްތަކުން ބުނެފައިވެއެވެ. އެޑިއުކޭޝަން މިނިސްޓަރު ވަނީ އެހެން ބައެއް ރަށްތަކުގެ ބަހުންވެސް ދަރިވަރުންނަށް ޚާއްސަ މެސެޖްތަކެއް ދެއްވާފައެވެ.
ޚިޔާލުތައް
ލަދުން ބޯ ހަލާކު! ހަދަހާ ފުވައްމުލަކޭ ދޯ!!؟؟؟ ލޮލް!!