އިބްރާހިމް ލަތީފް މަދީނާ ޔުނިވާސިޓީގެ ހަދީސް ކޮލެޖްގެ އިސްވެރިޔާގެ މަގާމު ފުރުއްވަމުންދިޔަ ހަދީސް އިލްމުގެ ފުންނާބު އުސް އުއްތާޒެއްކަމަށްވާ ދިއާއުއްރަހުމާން އާޒަމީ މިއަދު މިދުނިޔެ ދޫކުރައްވައިފިއެވެ. އިންޑިއާއަށް އުފަން ހިންދޫއެއްގެ ގޮތުގައި ޅައުމުރު ހޭދަކުރުމަށްފަހު ޅަޒުވާން އުމުރުގައި އިސްލާމްދީން ގަބޫލުކޮށް އިސްލާމްވި ދިއާއުއްރަހުމާން ވަނީ ސައްހަ ހަދީސްތައް އެއްކޮށް ޕްރިންޓްކޮށް ނެރެފައެވެ. މަދީނާ ޔުނިވާސިޓީގެ އުސްތާޒެއްގެ ގޮތުގައި ހަރަކާތްތެރިވެފައިވާ ދިއާއުއްރަހުމާންގެ އެއްކުރި ހަދީސް 20 ވޮލިއުމަށްވުރެ ބޮޑު ކަމަށް މަދީނާ ޔުނިވާސިޓީއިން ބުނެއެވެ.
އުމުރުން އެންމެ 16 އަހަރުގައި އިސްލާމްދީން ގަބޫލުކޮށް އިސްލާމްދީނަށް ވެންނެވި ދިއާއުއްރަހުމާން އިސްލާމްވުމަށްފަހު އިންޑިއާގައި އުޅުއްވުން ފަސޭހަފުޅުނުވެގެން މައްކާއަށް ހިޖުރަކުރެއްވީ 1966 ވަނަ އަހަރުގައެވެ. 1971 ވަނަ އަހަރު ފުރަތަމަ ޑީގްރީ ނެންގެވުމަށްފަހު އުއްމުލް ގުރާ ޔުނިވާސިޓީއިން މާސްޓާސް ޑީގްރީ ހާސިލުކުރެއްވި ދިއާއުއްރަހުމާނު ރިސާޗުކުރިއަށް ގެންދެވީ އަބޫ ހުރައިރާގެ ދިފާއުގައެވެ. އިމާމް އަބޫ ހުރައިރާ ކީރިތި ރަސޫލުﷲ (ސއވ) އަރިހުގައި ހޭދަކުރައްވާފައިވަނީ 3-4 ވަރަކަށް އަހަރުކަމަށް ވީނަމަވެސް ގިނަ އަދަދެއްގެ ހަދީސް ރިވާކުރައްވާފައިވުމުން އެޒަމާނުގައި ބައެއް ފަރާތްތަކުން އެކަމަށް ފާޑުކިއުން އަމާޒުވަމުންދާތީވެ ދިއާއުއްރަހުމާންގެ ތީސީސް ޚާއްސަކުރެއްވީ އިމާމް އަބޫ ހުރައިރާގެ ދިފާއުގައެވެ. އަބޫ ހުރައިރާ ކީރިތި ރަސޫލުﷲ (ސއވ) އަރިހުގައި ހޭދަކުރެއްވި މުއްދަތާއި އަޅާބަލާއިރު އަބޫ ހުރައިރާ ރިވާ ކުރެއްވި ހަދީސްތަކުގެ އަދަދަކީ ރިވާނުކުރެވޭނެ އަދަދެއްނޫންކަމަށް ދިއާއުއް ރަހުމާން މިދިޔަ އަހަރު ޔާސިރު ގާދީއަށް ދެއްވި އިންޓަވިއުއެއްގައި ވިދާޅުވިއެވެ. ޔާސިރު ގާދީގެ އުސްތާޒެއް ކަމަށްވާ ދިއާއުއް ރަހުމާން ވިދާާޅުވީ އަބޫ ހުރައިރާ ރިވާކުރެއްވި ހަދީސް 5 ހާހަށްވުރެ ގިނަވެފައިވަނީ އިސްނަދު (ރިވާކުރެއްވި ފަރާތްތައް) ގިނަކަމުން ކަމަށާއި ހަދީސްގެ މަތަނަށް (ކީރިތި ރަސޫލުﷲ ހަދީސްފުޅު) ބަލާއިރު އެއީ 1500 އެއްހާ ހަދީސްކަމަށާއި އެހެންކަމުން ޖުމްލަ އަދަދު 2 ހާސް ކަމަށް ބެލި ނަމަވެސް އެއީ ގިނަ އަދަދެއްނޫންކަމަށެވެ. ދުވާލަކު 2 ހަދީސް ރިވާކުރާ ކަމަށްވަންޏާ 3 އަހަރަށްވުރެ އަވަހަށް 2 ހާސް ހަދީސް ރިވާކުރެވޭނެކަމަށް ވެސް ދިއާއުއް ރަހުމާން ވިދާޅުވިއެވެ. ދިއާއުއްރަހުމާންގެ އެތީސީސްއަށް ގިނަ ބައެއްގެ މަގުބޫލުކަން ލިބިގެން ދިޔައެވެ. އެއަށްފަހު މުސްލިމް ވޯލްޑް ލީގުގެ ސްޕޮންސާއެއްގެ ދަށުން އަލް އަޒުހަރު ޔުނިވާސިޓީއިން ޕީއެޗްޑީ ހާސިލުކުރެއްވިއެވެ.
ދިއާއުއް ރަހުމާން އަވަހާރަވެފައިވަނީ މިއަދު ކަމަށް މަދީނާ ޔުނިވާސިޓީއިން ހާމަކުރެވެއެވެ.
ޚިޔާލުތައް