މުހައްމަދު ޝިހާބް އެސްއެސްއައި (ސްކޫބާ ސްކޫލް އިންޓަނޭޝަނަލްގެ) ފުރަތަމަ އޯޕަންސީ ޑައިވް ކޯސް ފުވައްމުލައް ޑައިވް ޕޮއިންޓް އިން ފަށައިގެން ކުރިޔަށް އެބަދެއެވެ. މި ސެޕްޓެމްބަރު މަހު 16 ގައި ފެށި ފުރަތަމަ ބުރުގައި ނިމޭނީ މި މަހު 18 ގައި ކަމަށް މިކަލް ނޫހަށް މައުލޫމާތު ދެއްވަމުން ފުވައްމުލައް ޑައިވް ޕޮއިންޓްގެ ސްކޫބާ ޑައިވް މާސްޓާރ އިންސްޓްރަކްޓަރ މުހައްމަދު ސައީދު ހާމަކުރެއްވިއެވެ.
ފުވައްމުލައް ޑައިވް ޕޮއިންޓްގެ ފަރާތުން މިހާރު ކުރިޔަށްގެންދާ ކޯސްތަކުގެ ތެރޭގައި އޯޕަން ވޯޓަރ ޑައިވް ކޯހުން ފެށިގެން ޑައިވް މާސްޓަރ ކޯހާއި ހަމަޔަށް ހިމެނެއެވެ. އަދި ކުރިޔަށް އޮތްތަނުގައި ޑައިވިން އިންސްޓްރަކްޓަރުން ވެސް ތަމްރީނުކުރުމުގެ ކޯސް ކުރިޔަށް ގެންދިއުމަށް ހަމަޖެހިފައިވާ ކަމަށް މުހައްމަދު ސައީދު މައުލޫމާތު ދެއްވިއެވެ. މިހާރު ކޯހުގެ ބެޗެއް ކުރިޔށް ގެންދެވެނީ 4 މީހުންނާއެކު ކަމަށެވެ.
މަސްވެރިންނަށް ޑައިންވިން ކޯސް ޚާއްސަ ޑިސްކައުންޓް ރޭޓެއްގައި ކުރިޔަށް ގެންދިއުމަށް ވަނީ ހަމަޖެހިފައެވެ. ޑައިވިން ކޯހުގައި ބައިވެރިވުމުގެ ޝަރުތަކީ މެޑިކަލް ސުވާލު ތަކުން ފާސްވުމެވެ.
ފުވައްމުލައް ޑައިވް ޕޮއިންޓްގެ އެސްއެސްއައި ޑައިވް ކޯސް ފުރަތަމަ ބެޗު – ބައިވެރިންނާއި ޓްރެއިނަރުން މޫދުގައި
ސްކޫބާ ސްކޫލް އިންޓަނޭޝަނަލްގެ (އެސްއެސްއައި) އަކީ މުޅި ދުނިޔޭގައި ވެސް ވަރަށް ފުޅާދާއިރާއެއްގައި ފްރީ-ޑައިވިން އާއި ސްކޫބާ ޑައިވިންގެ ތަމްރީނުތައް ދެމުން އަންނަ ޖަމްއިއްޔާއެކެވެ. މީގެ އިތުރުން ފަތުރުވެރިކަމުގެ ޑައިވިން ހަރަކާތްތަކާއި ޑައިވިންގެ އެކިއެކި ކަންކަމުގައި އިސްކޮށް ހަރަކާތްތެރިވާ ޖަމްއިއްޔާއެކެވެ. ދުނިޔޭގެ އެކި ހިސާބުތަކުގައި އެޖަމްއައިޔާގެ 2500 އަށްވުރެ ގިނަ އޮތޯރައިޒްޑް ސެންޓަރާއި 35 ރީޖަނަލް ސެންޓަރު ހިންގަމުން އަންނަ ކަމަށް މުހައްމަދު ސައީދު މައުލޫމާތު ދެއްވިއެވެ.
އެގޮތުން “ފުވައްމުލައް ޑައިވް ޕޮއިންޓު” އަކީ ފުވައްމުލައް ސިޓީގައި ހުރި ހަމައެކަނިި އެސްއެސްއައި ޑައިވް ޕާޓްނަރެވެ. އެސްއެސްއައިގެ ޑައިވް ކޯސްތައް ފުވައްމުލަކުގައި ކުރިޔަށް ގެންދިއުމުގެ ހުއްދަ އޮތް ހަމައެކަނި ފަރާތަކީ ފުވައްމުލައް ޑައިވް ޕޮއިންޓެވެ.
ފުވައްމުލައް ޑައިވް ޕޮއިންޓްގެ އެސްއެސްއައި ޑައިވް ކޯސް
ދާދިފަހުން ދިވެހިރާއްޖޭގައި ފާސްކުރި މަސްވެރިކަމުގެ ގާނޫނުގެ ދަށުން ހަދާފައިވާ ގަވާއިދުގައިވާ ގޮތުން ތަމްރީނާއި ސެޓްފިކެޓް ނެތް މީހުން ޑައިވްކުރުމަކީ މަނާކަމަކެވެ. އަދި އެން ހިފަން ވެސް ނުވަތަ އެހެން ކަމަކުވެސް ތަމްރީނު ނެތް މީހަކު ފީނުވާ (ޑައިވްކުރުވާ) ދޯންޏެއްގެ ކެޔޮޅު ނުވަތަ ކެޕްޓަނު ވެސް ޖޫރިމައިނާ ކުރާ ގޮތަށް ވެއެވެ. އަދި އެކަމުގައި މީހަކަށް ގެއްލުމެއް ލިބިއްޖެނަމަ ޖިނާއީ ދާއުވާއެއްވެސް ކުރެވިދާނެއެވެ. ވުމާއެކު ރާއްޖޭގައި އެންދަމަ ފީނާ މީހުންވެސް މިހާރު ޖެހެނީ ޑައިވިން ކޯސް ފުރިހަމަކޮށް ސެޓްފިކެޓް ހޯދާށެވެ.
މަސްވރިކަމުގެ ގާނޫނުގެ ދަށުން ހަދާފައިވާ ގަވާއިދު 6 ވަނަ ބާބުގައި ވަނީ:
14. ގައުމީގޮތުން ނުވަތަ ބައިނަލް އަގުވާމީގޮތުން ގަބޫލުކުރާ ފީނުމުގެ ތަމްރީނު ފުރިހަމަކޮށް ސެޓްފިކެޓް ލިބިގެން މެނުވީ ފުޅިއަޅައިގެން އެންވެރިކަން ކުރުން، ނުވަތަ މަސްވެރިކަން ކުރުން ނުވަތަ މަސްވެރިކަމާއި ގުޅުންހުރި އެއްވެސް ހަރަކާތެއް ހިންގުމަކީ މަނާކަމެކެވެ.
15. މަސްވެރިކަން ކުރުމަށް މިނިސްޓްރިން ދޫކުރާ ލައިސަންސް ލިބިގެން މަސްވެރިކަން ކުރާ އުޅަނދުފަހަރުގައި ފީނުމަށް ބޭނުންކުރާ އާލާތްތަކަކީ އެކަމަށް ރައްކާތެރި އާލާތްތައް ކަން ކަށަވަރުކުރުމަށްޓަކައި އެތަކެތި ގަވާއިދުން ސާވިސްކޮށް ބަލަހައްޓަން ވާނެކަމަށެވެ.
މަސްވެރިކަމުގެ ގަވާއިދު 2020
ޚިޔާލުތައް