މުހައްމަދު ޝިހާބް ހެލްތު މިނިސްޓަރު އަބްދުﷲ އަމީނު މަގާމުން ރޭ އިސްތިއުފާ ދެއްވައިފިއެވެ. މިނިސްޓަރުކުމުގެ މަގާމުން އިސްތިއުފާ ދެއްވުމުގެ ސިޓީ ރޭގައި ވަނީ ރައީސް އިބްރާހިމް މުހައްމަަދު ސޯލިހަށް ފޮނުއްވާފައެވެ.
އަމީނު މަގާމުން އިސްތިއުފާ ދެއްވި އިރު ހުންނެވީ މަގާމުގެ މައްސްއޫލިއްޔަތު ތަކުން އެކަހެރި ކުރައްވާފައެވެ. މީޑިއާއި އެންމެ ފުރަތަމަ އަމީނު މަގާމުގެ މަސްއޫލިއްޔަތުތަކުން އެކަހެރިވެ ވަޑައިގަތީ އަމިއްލައަށް ކަމަށް ފާހަގަކޮށްފައި ވެއެވެ. ނަމަވެސް ވެންޓިލޭޓަރު ގަތުމުގެ މައްސަލާގައި ރައީސް އޮފީހުން މިނިސްޓަރު އަމީނު މަސްއޫލިއްޔަތުތަކުން އެކަހެރިވެ ވަޑައިގެން ގޭގައި މަޑުކުރެއްވުމަށް ސިޓީ ފޮނުވާފައި ވާކަމަށް ވެއެވެ.
އަމީނުގެ އިސްތިއުފާގެ ސިޓީގައި ތުހުމަތު ކުރައްވާފައި ވަނީ އޭނާއަށް ކުރިމަތިވާ ޕްރެޝަރަކީ އޭނާގެ މައްސަލެއް އޮވެގެން ދިމާވާ ކަމެއް ނޫންކަމަށާއި އެއީ އެމްޑީޕީގެ އެތެރޭގެ ބާރުވެރިކަން ހޯދުމުގެ ގޮތުން ކުރާ ކަމެއްކަމަށެވެ.
“އަޅުގަނޑު މަގާމުން ދުރުކުރުމަށް ވާންކުރާ ކުރުމަކީ ކޮންމެހެން އަޅުގަނޑަށް އަމާޒުވާ އެތިފަހަރެއް ކަމަކަށް ނުދެކެމެވެ. އަދި މި ހާލަތާއި ގުޅިގެން މަނިކުފާނާއި ކުރެވުނު މަޝްވަރާއިން ހާލަތު އަޅުގަނޑަށް ވަޒަން ކުރެވުނެވެ. އެހެން ކަމުން މި ހާލަތުގައި މަސްލަހަތު އެންމެ ރަނގަޅު ގޮތަކީ އަޅުގަނޑު މަގާމުން އިސްތިއުފާ ދިނުން ކަމަށް ގަބޫލުކުރޭތީ، މިއަދުން ފެށިގެން މިނިސްޓަރު އޮފް ހެލްތްގެ މަގާމުން އިސްތިއުފާ ދިފީމެވެ.” އަބްދުﷲ އަމީން ހެލްތް މިނިސްޓަރު ވިދާޅުވެފައި ވެއެވެ.
އަމީނު މަގާމުން އިސްތިއުފާ ދެއްވި އިރު އިއްޔެ ވަނީ އަމީނުގެ އިތުބާރު ނެތްކަމުގެ މައްސަލައެއް މަޖުލީހަށް ވައްދާފައެވެ. އަމީނު ވެސް ހިމެނޭ ކޯލިޝަން ސަރުކާރުގެ މައިޕާޓީ އެމްޑީގެ އެމްޕީން ތަކެއް އެކުވެގެން މައްސަލަ މަޖުލީހަށް ލާން ޖެހުނީ އާއްމު މެމްބަރުންގެ ފާޑުކިޔުންތަކާއި ޕްރެޝަރު ބޮޑުުވެގެންނެވެ. ސަރަކާރަށް ތާއިދުކުރާ އާއްމު މެމްބަރުންނާއި އިދިކޮޅު އާއްމު މެމްބަރުންގެ ފާޑުކިޔުންތައް ވެސް ވެންޓިލޭޓަރުގެ މައްސަލަ ފެށުނު ހިސާބުން ވެސް އޮތީ ފެންމަތިވެފައެވެ. ނަމަވެސް އާއްމު މެމްބަރުން ކެތްތެރިވެގެން ތިބީ ތަހުގީގީ އިދާރާތަކުން ކަން ނިމިގެންދާނެ ގޮތުގެ އިންތިޒާރުގައެވެ.
ހެލްތު މިނިސްޓރު އަމީނުގެ އިތުބާރު ގިނަ މެމްބަރުންނަށް ނެތްކަމަށް ބެލެވޭ
އިއްޔެ ތަހުގީގީ އިދާރާތުގެ ނިންމުން ހާމަވެގެން ދިޔައީ ޖިނާއީ ދައުވާއެއް ހެލްތު މިނިނސްޓްރީގެ އިސް އޮފިޝަލުންނަށް ކުރެވެން ނެތްކަމެއްގެ ގޮތުގައެވެ. ވުމާއެކު ދެން އޮތީ އިތުބާރު ނެތްކަމުގެ މައްސަލަ ކަމަށް ބުނެ އާއްމު މެމްބަރުން އިއްޔެ ވަނީ ޓްވިޓާރއާއި ފޭސްބުކުގައި ޕޯސްޓްތައް އޮއްސަން ފަށާފައެވެ.
ޖުމްހޫރީ ޕާޓީގެ ސްލޮޓެއްގައި ހެލްތު މިނިސްޓަރު ކަމުގައި ހުންނެވި އަމީނުއަށް، ކޮވިޑް-19 އާއި ގުޅިގެން ވެންޓިލޭޓަރު ގަތުމުގައި ހެލްތު މިނސްޓްރީން އަމަލުކޮށްފައިވާ ގޮތުގެ ސަބަބުން ބޮޑެތި ތުހުމަތުތަކެއް ކުރެވި އާއްމުންގެ ފާޑުކިޔުން އޮތީ އިތުރުވެފައެވެ. އެ މައްސަލާގައި ކުރެވުނު އޯޑިޓް ރިޕޯޓުންނާއި ތަހުގީގު ކުރެވުނު އޭސީސީގެ ރިޕޯޓުން ހެލްތު މިނިސްޓްރީގެ އިސް މަގާމުތަކުގައި ތިއްބެވި ބޭފުޅުންނަށް ގިނަ ތުހުމަތުތަކެއް ކުރެވިފައި ވެއެވެ. އަދި ޕީޖީއަށް ދައުވާ ކުރުން ފޮނުވި މައްސަލަތަކުގައި ހުރީ އިދާރީ ބޮޑެތި މައްސަލަތަކެއް ކަމަށާއި ޖިނާއީ ދައުވާއެއްގެ ގޮތުގައި ކޮރަޕްޝަނަށް ސާބިތު ކުރެވޭ ވަރުގެ ހެއްކެއް ނެތްކަމަށް ބުނެ މައްސަލަ އާއްމުންނަށް ސާފުކޮށްދީފައި ވަނީ އިޔެވެ.
އެއާއެކު އެމްޑީޕީ މަޖުލިސް މެމްބަރުންނަށް މަޖުބޫރުވީ ވަގުތުން ޕާލެމެންޓްރީ ޖަލްސާއަކުން މައްސަލާގައި ގޮތެއް ނިންމާށެވެ. ނަމަވެސް ޕާލަމެންޓްރީ ގްރޫޕް ދެބައިވެ ހެލްތު މިނިސްޓަރުގެ އިތުބާރު ނެތްކަން މަޖުލީހަށް ލުމާއި މެދު ޚިޔާލު ތަފާތުވިއެވެ. ބައެއް މެމްބަރުން ބުނަމުން ދިޔައީ ކޯލިޝަން ސަރުކާރުގެ މިނިސްޓަރެއްގެ އިތުބާރު ނެތްކަމުގެ މައްސަލާގައި ރައީސް އިބްރާހިމް މުހައްމަދު ސޯލިހަށް ގޮތެއް ނިންމުމަށް ޖާގަ ދިނުމަށެވެ. ނަމަވެސް އަނެއްބައި މެމްބަރުން ބުނަމުން ދިޔައީ އެ މެމްބަރުން ޖަވާބުދާރީވާން ޖެހެނީ ރައީސަށް ނޫން ކަމަށާއި އާއްމު މެމްބަރުންނަށް ކަމަށެވެ. މިމައްސަލާގައި އާއްމު މެމްބަރުންނަށް މޫނު ދައްކާލަން ކެރޭނެ އިތުރު ގޮތެއް ނެތްކަމަށެވެ. ޕާލެމެންޓަރީ ގްރޫޕްގެ ބައްދަލުވުން ވެސް ގޮތެއް ނުނިންމުމުން އެމްޕީންގެ ތެރެއިން 24 މީހަކު މައްސަލަ މަޖުލީހަށް ވަގުތުން ވެއްދީ މިފަދަ މައްސަލަތަކުގައި ސަރުކާރު ޖަވާބުދާރީ ކުރުވާނެ ކަމަށް ބުނެއެވެ. އަދި އިތުރު މެމްބަރުން އެ ހުށަހެޅުމަށް ތާއިދުކުރާކަން ހާމަކުރިއެވެ. މިނިސްޓަރެއްގެ އިތުބާރުނެތްކަމުގެ މައްސަލައެއް މަޖުލީހަށް ވައްދަން ބޭނުންވަނީ 10 އެމްޕީންގެ ސޮޔެވެ.
އަމީނުގެ އިތުބާރު ނެތްކަމުގެ މައްސަލާގައި ރައްޔިތުންގެ މަޖުލީހުގެ ފުވައްމުލަކުގެ ތިން މެމްބަރުން ވެސް ތިބީ އަމީން އާއި މެދު އިތުބާރު ނެތްކަން ހާމަކޮށްފައެވެ.
އަމީން ވަނީ ޕީޕީއެމް ސަރުކާރުގައި ރައީސް އޮފީހުގެ މިނިސްޓަރުކަން ކުރައްވާފައެވެ. އެފަހަރު، 2014، ޑިސެމްބަރުގައި ތިމަރަފުށީ އެއަރޕޯޓް މައްސަލައެއްގައި އެންޓި ކޮރަޕްޝަން ކޮމިޝަން (އޭސީީސީ) އަމީންގެ މައްޗަށް ދައުވާކުރުމަށް ފޮނުވާފައި ވެއެވެ. އެމައްސަލައާއި ގުޅިގެން 2015 ވަނަ އަހަރު ޖުލައި 12 ގައި އަމީން ވަނީ އެފަހަރުވެސް މިނިސްޓަރުކަމުން އިސްތިއުފާ ދެއްވާފައެވެ.
ރައީސް އިބްރާހިމް މުހައްމަދު ސޯލިހުގެ ސަރުކާރުން އިސްތިިއުފާ ދެއްވި މިއީ 3 ވަނަ މިނިސްޓަރެވެ. އެއީ ޖެންޑަރ މިނިސްޓަރު ޝިދާތާ ޝަރީފު (އަދާލަތު ޕާޓީ) އާއި، ހައުސިން މިނިސްޓަރު އައިމިނަތު އާތިފާ ޝަކޫރު (އެމްއާރު އެމް)އެވެ. އަދި ޖޭޕީގެ ސްލޮޓެއްގައި ހުރި ކުރީގެ ޓްވަރިޒަމް މިނިސްޓަރު އަލީ ވަޙީދު މަގާމުން އިސްތިއުފާ ދިނުމަށް ރައީސް އެންގެވުމުން އިސްތިއުފާ ނުދެއްވުމުން ވަނީ މަގާމުން ވަކިކުރައްވާފައެވެ.
ޚިޔާލުތައް