އިބްރާހިމް ލަތީފް އެމެރިކާގެ ރައީސް ކަމަށް ޑިމްކްރެޓިކް ޕާޓީން ކުރިމަތިލީ ޖޯ ބައިޑަން އެމެރިކާގެ ރައީސްކަމަށް ވަޑައިގަތުމަށް ބޭނުންވާ އަދަދަށް އިލެކްޓޯރަލް ކޮލެޖްގެ ވޯޓު ލިބިފައިވާއިރު އަދިވެސް ބަލި ގަބޫލުނުކުރައްވާ މިހާރުގެ ރައީސް ޑޮނަލްޑް ޓްރަމްޕް މިވަނީ އަނެއްކާވެސް އާރިކޯޑެއް ހޯދާފައެވެ.
އެމެރިކާގެ ފާއިތުވީ 27 އަހަރުތެރޭ ދެ ދައުރު އަދާނުކުރެވުނު އެމެރިކާގެ ފުރަތަމަ ރައީސްގެ ގޮތުގައި ޓްރަމްޕް މިވަނީ ބެލެވިފައެވެ. މީގެ ކުރިން ދެ ދައުރު އަދާނުކުރެވުނީ ކުރީގެ ރައީސް ޖޯޖް ބުޝް (ސީނިއާ) އެވެ. ކުރީގެ އެކްޓަރު އަދި ރައީސް ރޮނަލްޑް ރޭގަންގެ ނާއިބު ރައީސް ގޮތުގައި ހުންނަވައި 1989 ވަނަ އަހަރު އެމެރިކާގެ އިންތިޚާބު ކާމިޔާބު ކުރެއްވި ޖޯޖް ބުޝް 1993 ވަނަ އަހަރު އޮތް އިންތިޚާބުގައި ރައީސް ބިލް ކްލިންޓަނާއި ވާދަކޮށް ބަލިވިއެވެ. ބިލް ކްލިންޓަނަށް ފަހު އެމެރިކާގެ ސިޔާސީ ނިޒާމު ފެނިގެން ގޮސްފައި ވަނީ ވަރަށްވެސް ވާދަވެރި ގޮތަކަށެވެ. އެގޮތުން، ބިލް ކްލިންޓަންގެ ދެ ދައުރަށްފަހު ރިޕަބްލިކަން ޕާޓީގެ ދެ ދައުރާއި ކުރިމަތިލިއެވެ. އެއަށްފަހު އަނެއްކާވެސް އެމެރިކާގެ ރައީސްކަން ޑިމްކްރެޓިކް ޕާޓީއަށް ލިބުނެވެ. އެމެރިކާގެ ފުރަތަމަ ކަޅު ނަސްލުގެ ރައީސް ބަރަކް އޮބާމާގެ ދެ ދައުރަށްފަހު އެމެރިކާގެ ރައީސްކަން ފުރޮޅިގެން ދިޔައީ ރިޕަބްލިކަނުންގެ އަތްމައްޗަށެވެ. އެމެރިކާގެ ރިއާސީ އިންތިޚާބުގެ ވޯޓުގެ ރަސްމީ ނަތީޖާ ރަސްމީކޮށް އިއުލާންކޮށްފައި ނުވި ނަމަވެސް މިހާރުގެ ނަތީޖާތަކަށް ބަލާއިރު ބިލިއަނަރު ޑޮނަލްޑް ޓްރަމްޕަށް ދެ ދައުރު ފުރިހަމަ ނުކުރެވި މިވަނީ ބަލިވެފައެވެ.
ކުރީ އަހަރުތަކާއި ޚިލާފަށް ދުނިޔެއަށް ދިމާވެފައިވާ ކޯވިޑްގެ ހާލަތާއި ގުޅިގެން އެމެރިކާގެ ގިނަ ބަޔަކު ޕޯސްޓް މެދުވެރިކޮށް ވޯޓުލާފައިވުން އެ ވޯޓުތަށް ލިބުމުގައި ލަސްވެފައިވާތީވެ ޓްރަމްޕް ވަނީ މީގެ ކުރިވެސް ވޯޓު އޮޅުވާލުމަށް ޕޯސްޓަށް ވޯޓު ބޭނުންކުރަމުންދާ ކަމަށް ބުނެފައެވެ. އަދި އެގޮތަށް ބުނަމުން ދަނިކޮށް ޓްރަމްޕަށް ކުރި ލިބިފައިވާ ޕެންސިލްވޭނިއާގެ ނަތީޖާ މިވަނީ ފަހު ވަގުތު ކުޑަ ތަފާތަކުން ބައިޑަން ކޮޅަށް ބަދަލުވެފައެވެ. ޕެންސިލްވޭނިއާގެ އިތުރުން ޖޯޖިއާ ނެވާޑާ ފަދަ ބައެއް ސްޓޭޓްތަކުން ވެސް ހަނި ތަފާތަކުން ބައިޑަން ކުރި ހޯދުމަކީ ޓްރަމްޕް ނާކާމިޔާބީ ގަބޫލުނުކޮށް އެންމެ މަތީ ކޯޓަށް ގޮސްފާނެކަމަށް ކަމަށް ބެލެވެއެވެ. އެހެންކަމަށްވާނަމަ، އެމެރިކާގެ ރައީސެއް ކަނޑައެޅުމަށް ދުވަސްތަކެއް ނަގާފާނެއެވެ. އެމެރިކާގެ ރައީސްގެ ރައީސްކަމުގެ މުއްދަތު ހަމަވާނީ އަންނަ އަހަރު ޖެނުއަރީ މަހުގައެވެ.
ޚިޔާލުތައް