މުހައްމަދު ޝިހާބް އައްޑޫ ސިޓީގައި ކޮވިޑް-19 ފެތުރުމާއި ގުޅިގެން އައްޑޫ އިކުއެޓޯރިއަލް ހޮސްޕިޓަލުގެ ބައެއް ޑޮކްޓަރުން ޚިދުމާތައި ދުރަށް ދާން ޖެހިފައިވާތީ ޑޮކްޓަރުންގެ އެހީތެރިކަން ދިނުމުގެ ގޮތުން ފުވައްމުލަކު ހޮސްޕިޓަލުގެ ޑޮކްޓަރަކު އިއްޔެ މެންދުރުފަހު އައްޑޫ އިކުއެޓޯރިއަލް ހޮސްޕިޓަލުގައި މަސައްކަތް ކުރުމަށް ފުރައިފިއެވެ.
ފުވައްމުލައް ސީޓީ އިން ދެކެނީ އަވަށްޓެރި އައްޑޫ ސިޓީގައި ދިމާވާ ދަތި ވަގުތުގައި ވެސް، ވެދެވެން އޮތް އެހީތެރިކަމެއް ފޯރުކޮށް ދިނުމަށަށް ކަމަށް ފުވައްމުލަކު ހޮސްޕިޓަލުން ހާމަކުރެއެވެ. އިއްޔެ އައްޑޫ ސިޓީގައި ޚިދުމަތްދިނުމަށް ފުރި މެޑިކަލް އޮފިސަރ އަކީ ޑރ. މުރުޝެދް ޗޯވްދުރީ އެވެ. އޭނާ އޭ.އީ.އެޗް.ގައި މަސައްކަތް ކުރެއްވުމަށް ވަނީ ހަމަޖެހިފައެވެ. މިއީ އޭއީއެޗްގެ ބައެއް ޑޮކްޓަރުން ކަރަންޓީނުން ވާން ޖެހުމުން ދިމާވާ ޑޮކްޓަރުންގެ ދައްޗަށް ލުޔެއް ހޯދުމުގައި އެހީތެރިވުމުގެ ގޮތުން ފުވައްމުލަކު ހޮސްޕިޓަލުން ފޮނުވާ ޑޮކްޓަރެކެވެ.
މީގެ އިތުރުން އައްޑޫ ސިޓީއަށް ދިމާވެފައިވާ މިހާލަތުގައި އައްޑޫ އިކުއެޓޯރިއަލް ހޮސްޕިޓަލަށް ބޭނުންވާ އެހެނިހެން ކަންތައްތަކުގައި ވެސް ފުވައްމުލަކު ހޮސްޕިޓަލުން އެހީތެރިކަން ފޯރުކޮށް ދެމުންއަންނަ ކަމަށް އެ ހޮސްޕިޓަލުން ހާމަކުރެއެވެ.
ނުރައްކާތެރި ހާލަތަކާ ކުރިމަތިލާންޖެހޭ ދަނޑިވަޅުތަކުގައި ފުވައްމުލަކު ހޮސްޕިޓަލުގެ ފަންނީ މުވައްޒަފުން ދެއްވާ އެއްބާރުލެއްވުމަށާއި ދައްކަވާ ހިތްވަރު ޝުކުރުވެރިކަމާއެކު ފާހަގަކުރާކަމަށް އެ ހޮސްޕިޓަލުގެ ބަޔާނުގައި ވެއެވެ.
ފުވައްމުލަކުގައި ކޮވިޑް-19 ފެތުރޭތޯ ބެލުމަށް ސާވޭއަށް ސާމްޕަލް ނަގާ ޓީމުތައް
ފުވައްމުލަކު ހޮސްޕިޓަލުގެ މި ނިންމުން ރަށުގެ ގިނަބަޔަކު ބަލައިގަތީ ކުރީ ޝުކުރުވެރިކާމާއެކު ކޮންމެހެންވެސް ކުރަން ޖެހޭ ކަމެއްގެ ގޮތުގައެވެ. ވަސީލަތްތަކާއި ފަންނީ މީހުންނާއި ޑޮކްޓަރުންގެ ނިސްބަތުން ފުވައްމުލަކު ހޮސްޕިޓަލުގައި ކިތަންމެ މަދުވެ ދަތިތަކެއް އުފުލަން ޖެހުނު ކަމުގައިވިޔަސް މިފަދަ ކަންކަންކަމުގައި އެހީތެރިކަން ދިނުމަކީ އިންސާނިއްޔަތައްޓަކައި ވެސް ކުރެވޭ މުހިންމު ޚިދުމަތެއްކަމުގައި ގިނަބަޔަކު ބަލައިގަތްކަން ހާމަވަނީ ސޯޝަލްމީޑިއާގައި އެކަމަށް މީހުން ދީފައިވާ ޕޮޒިޓިވް ކޮމެންޓްތަކުންނެވެ.
ފުވައްމުލަކު ހޮސްޕިޓަލުން އައްޑޫ ސިޓީއަށް ޑޮކްޓަރުން ފޮނުވަނީ އެ ހޮސްޕިޓަލުގައި ޑޮކްޓަރުން ގިނަވެ، ބަލާނެ ބަލިމީހުން ނެތިގެއް ވެސް ނޫނެވެ. ޚިދުމަތް އެކަށީގެންވާ މިންވަރަށް އެ ހޮސްޕިޓަލުގައި މީހުން ނެތް ކަމުގައި ވިޔަސް ހާލަތުގެ ގޮތުން ފަރުވާއަށް މިވަގުތު ބޮޑަށް ބޭނުންޖެހިފައިވާ އައްޑޫ ސިޓީގެ މީހުންނަށް މިވަގުތު އެޚިދުމަތް ދިނުމުގައި ފުވައްމުލަކު ރައްޔިތުން ތިބީ ހިތްހެޔޮކަމާއެކު އަވަށްޓެރިޔާއަށް އެހީތެރިވެދެވޭތީ އެކަމުގެ އުފަލާއި ހިތްހަމަޖެހުމުގައެވެ.
ނަމަވެސް، ފުވައްމުލައް ސިޓީގެ ގިނަ ބަޔަކު ފާހަގަ ކުރާ ކަމަކީ އައްޑޫ ސިޓީގެ ކަމާއިގުޅޭ ފަރާތްތަކުން އެފަދަ އެކުވެރިކަމަކާއި ޚިދުމަތްތައް ޝެއަރކުރުމުގެ ފަހި މަންޒަރު ނުފެންނަކަމަށެވެ. ނުވަތަ ފެންނަލެއް މަދުކަމެވެ.
އެގޮތުން ގިނަ ބަޔަކު ފާހަގަ ކުރީ މި ހަފުތާގެ ކުރި ކޮޅުގައި ފުވައްމުލަކުގެ ހޮސްޕިޓަލުގައި ހުރި ހަމައެކަނި ގައިނަކޮލޮޖިސްޓް ބަލިހާލު ދިމާކުރިގޮތުން ޚިދުމަތް ނުދެވި ވަނިކޮށް ގިނަ އަދަދެއްގެ ބަޔަކު ވިހަން ތައްޔާރުވެފައިވާތީ އެކަމުގައި އެހީތެރިކަމަށް އެދުމުން އައްޑޫ އިކުއެޓޯރިއަލް ހޮސްޕިޓަލަށް އެކަން ކޮށްނުދެވުނު ކަމާއި ކޮވިޑްގެ ހައިރިސްކް ދެމީހަކު އައްޑޫ ސިޓީގައި ގާއިމުކުރި ރީޖަނަލް ކޮވިޑް ފެސިލިޓީގެ ޚިދުމަތަށް ފޮނުވަން ރުހުން ނުލިބުނު ފަދަ މައްސަލަތަކެވެ.
ނަމަވެސް، ފާހަގަ ކުރަންޖެހޭ ކަމަކީ ފައިތުވި 2020 ވަނަ އަހަރު ޖުލައި މަހު މެދުތެރޭގައި އައްޑޫ އިކުއެޓޯރިއަލް ހޮސްޕިޓަލުގެ ޚާއްސަ ދެ ޑޮކްޓަރެއްގެ ޚިކިދުމަތް ފުވައްމުލަކު ހޮސްޕިޓަލުން ލިބިގެންގޮސްފައިވާ ކަމެވެ. އެ ހަރަކާތާއެކު ފުވައްމުލަކުގެ ގިނަ ބައެއްގެ އުއްމީދު އާވީ އައްޑޫ އިކުއެޓޯރިއަލް ހޮސްޕިޓަލުގެ ސްޕެޝަލިސްޓް ޑޮކްޓަރުންނާއި ސުޕަރ ސްޕެޝަލިސްޓް ޑޮކްޓަރުންގެ ޚިދުމަތް ފުވައްމުލައް ސިޓީއިން ލިބިގެންދާނެ ކަމަށެވެ. ނަމަވެސް އެމަންޒަރު ސިފަކުރެވުނީ މުޅިން ރަނގަޅަކަށް ނޫންކަން ފަހުގެ ހާދިސާތަކުން ގިނަބަޔަކަށް މޭރުން ވިއެވެ. އެއިގެ ފަހުން އެފަދަ ޚިދުމަތެއް މިހާހިސާބަށް ވެސް ލިބިފައި ނެތުމުންނެވެ.
ކަށީގެ ޚާއްސަ ޑޮކްޓާ މުންޝިދު އަދި ކިޑްނީގެ ޚާއްސަ ޑޮކްޓާ ތާރިގު
އަދި ފުވައްމުލަކު ހޮސްޕިޓަލާއި ހުޅުމާލޭ ހޮސްޕިޓަލާއި ދެމެދު ޓެލެމެޑިސިންގެ ޚިދުމަތުގެ ވާހަކަ ދެކެވެން ފެށުމުން މަންޒަރު މުޅިން ބަދަލުވެފައިވާކަމަށް ގިނަބަޔަކު ނިންމިއެވެ.
ފުވައްމުލަކުގެ ރައްޔިތުން އެދެނީ އައްޑޫ ސިޓީގައި ގާއިމުކުރެވިފައިވާ ސަރަހައްދީ ޚިދުމަތްތައް މިހާރަށްވުރެ ފަސޭހައިން ފުވައްމުލަކުގެ ރައްޔިތުންނަށް ލިބިގެންދާނެ ގޮތުގެ އިންތިޒާމުތަކެއް ހަމަޖެހުމަށެވެ. ދެ ސިޓިގެ ރައްޔިތުން ވެސް ޚިދުމަތް ހޯދަން އަނެއް ސިޓީއަށް ދާންޖެހޭ ގޮތަށް ކަންތައްތައް އިންތިޒާމުވުމާއި، އެއް ސިޓީއެއްގައި ގާއިމުކުރެވިފައިވާ ޚިދުމަތްތައް، މިސާލަކަށް ސްޕެޝަލިސްޓް ޑޮކްޓަރުންގެ ޚިދުމަތް، ވިޒިޓިން ޑޮކްޓަރުންގެ ގޮތުގައި އަނެއް ސިޓީއިން ދިނުންފަދަ ކަންކަން އިންތިޒާމުކުރެވި ކުރިޔަށްދިއުމެވެ. އެއީވެސް އުއްމީދެކެވެ. ނަމަވެސް މިއީ ކޮވިޑްގެ ދަތި އުނދަގޫ ދުވަސްވަރެވެ.
މި ދުވަސްވަރު ދެކުނުގެ ސަހައްދުގައި ކޮވިޑް-19 ރޯގާ ފެތުރުން ވަނީ އިތުރުވެފައެވެ. ވުމާއެކު ކޮވިޑް-19 ކޮންޓްރޯލް ކުރުމަށް ސަރަޙައްދުގެ ރަށްތަކުގައި ދިރިއުޅުއްވާ ހުރިހާ ބޭފުޅުންވެސް ޞިއްޙީ ދާއިރާތަކުން ދެއްވާ އިރުޝާދުތަކަށް ފުރިހަމައަށް އަމަލު ކުރެއްވުމަށް ފުވައްމުލަކު ހޮސްޕިޓަލުން އިލްތިމާސް ކުރެއެވެ.
ޚިޔާލުތައް