މުހައްމަދު ޝިހާބް ފުވައްމުލައް ސިޓީއިން ކޮވިޑް-19އަށް ޕޮޒިޓިވްވާ މިންވަރު ވަރަށް ބޮޑުތަނުން އިތުރުވާން ފަށައިފިއެވެ. ފާއިތުވި 3 ދުވަހުގެ އަދަދުތަކަށް ބަލާއިރު ވެސް މިކަން ސާފުވެއެވެ. އެގޮތުން އިއްޔެ މިވަނީ އަލުން ރެކޯޑް އަދަދަކަށް ޕޮޒިޓިވް ކޭސްތައް ފެނިފައެވެ. އިއްޔެ އެކަނިވެސް 25 ޕޮޒިޓިވްވެ ކޭސް ރިޕޯޓްކޮށްފައި ވެއެވެ.
އެއިގެ ކުރީ ދެ ދުވަހު ވަނީ 18، އަދި 17 ޕޮޒިޓިވް ކޭސް ފެނިފައެވެ. މިއިން ކޮންމެ މީހަކާއެކު އެމީހުންގެ ކޮންޓެކްޓުންގެ އަދަދު އިތުރުވެ ބައްޔަށް ހުށަހެޅިފައިވާ މީހުންގެ އަދަދު އިތުރުވެގެން ދާނެއެވެ.
އިއްޔެ އަލަށް ބަލި ފެނުުނު 25 މީހުންނާއެކު މިހާރު ވަނީ ރަށުގެ ޖުމްލަ ވަނީ 143 އަށް އަރާފައެވެ. އަދި ބަލީގައި މިވަގުތު އެކްޓިވް 70 މީހުން އެބަތިއްބެެވެ. އަދި 74 މީހުން ބަލިން ރަނގަޅުވެފައި ވެއެވެ.
ފުވައްމުލައް ސިޓީ އިމަޖެންސީ އޮޕަރޭޝަން ސެންޓަރުން ރޭ ބޭއްވި ނޫސްވެރިންގެ ބައްދަލުވުން. 12 މެއި 2021
މިހާރު ތިބި 70 ޕޮޒިޓިވް ކޭސްގެ ތެރޭގައި ހޯމް ކަރަންޓީނުން 4 މީހަކު، ފްލޫ ކްލިނިކުން 10 މީހުން (މި 10 މީހުންނަކީ ވެސް ކުރީގެ ޕޮޒިޓިވް ކޭސްތަކުގެ ކޮންޓެކްޓުންގެ ގޮތުގައި ފާހަގަ ކުރެވިފައިވާ ފަރާތްތައް)، އަދި ކޮންޓެކްޓް ޓްރެސިންގެ ތެރެއިން ފާހަގަ ކުރެވުނު 55 މީހުން، އަދި ޑިޕާޗާ ސާމްޕަލްގެ އެެކަކު ހިމެނެއެވެ.
މީގެ ތެރޭގައި ދިވެހި 62 މީހުންނާއި ބިދޭސީ 8 މީހުން ހިމެނެއެވެ.
މިވަގުތު ފުވައްމުލައް ސިޓީއިން ބަލީގެ 5 ކްލަސްޓާއެއް ފާހަގަ ކުރެވިފައިވާ ކަމަށް ފުވައްމުލަކު ހޮސްޕިޓަކުގެ ފަރާތުން ރޭގެ ނިއުސް ކޮންފަރެންސްގައި ސީނިއާ ޕަބްލިކް ހެލްތު އޮފިސާ އާމިނަތު އަހުމަދު ހާމަކުރެއްވިއެވެ. އެގޮތުން ދެވަނަ ރާޅުގެ އެންމެ ފުރަތަމަ ކޭސް އާއި ގުޅުން ހުރި ކްލަސްޓާ (ފުވައްމުލައް ކްލަސްޓާ 4) އިން ޕޮޒިޓިވް ވެފައިވާ 5 މީހަކާއި އެ ކްލަސްޓާގެ 58 މީހަކު ކޮންޓެކްޓުންގެ ގޮތުގައި ފާހަގަކުރެވިފައިވާ ކަމަށެވެ.
ފުވައްމުލައް ކްލަސްޓާ 5 އިން 4 މީހުން ޕޮޒިޓިވް ވެފައިވާ އިރު، ފުވައްމުލައް ސިޓީ ކްލަސްޓާ 6، 7، އަދި 8 އިން އިންޑެކްސް ކޭސް ފާހަގަ ކުރެވި އިތުރު ސާމަޕަލްތައް ޓެސްޓް ކުރުމަށް ފޮނުވިފައިވާ ކަމަށް ހާމަކުރެއްވިއެވެ. މި 3 ކްލަސްޓާ އާއި ކުރީގެ އެއްވެސް ކްލަސްޓާ އަކާއި ގުޅުމެއް ހުރިކަމަކަށް ކޮންޓެކްޓް ޓްރޭސިން އިން އަދި ފާހަގަ ކުރެވިފައި ނުވާކަމަށެވެ.
މި 8 ކްލަސްޓާ ތެރިެިން މިހާރު ޕޮޒިޓިވް ކޭސްތައް ތިބީ މިފަހަރުގެ 5 ކްލަސްޓާގައެވެ. ކުރީގެ 3 ކްލަސްޓާގެ އެންމެން ވެސް ވަނީ ބަލިން ރަނގަޅުވެ ނިމިފައެވެ.
މިފަހަރުގެ ވޭވްއާއިއެކު ފްލޫ ކްލިނިކަށް ދެއްކި މީހުންގެ ތެރެއިން 17 މީހަކު ޕޮޒިޓިވް ވެފައިވާކަމަށް އާމިނަތު ފާހަގަ ކުރެއްވިއެވެ. ވުމާއެކު ފްލޫ ކްލިނިކަށް ދައްކާ މީހުންވެސް ސާމްޕަލް ނެގުމަށްފަހުނަތީޖާ ލިބެންދެން ރައްކާތެިކަމާއެކު އައިސޮލޭޓްވެގެން ތިބުމަކީ ރައްކާތެރިކަމުގެ ގޮތުން މުހިންމު ކަމެއް ކަމަށާއި އެކަން އެގޮތަށް ކޮށްދެއްވުމަށް އެދިފައިވެއެވެ.
ފުވައްމުލައް ސިޓީ ކޮވިޑް-19ގެ ދެވަނަ ރާޅާއެކު ކޭސްތައް އިތުރުވެފައި
ފާއިތުވި 24 ގަޑިއިރު ތެރޭގެ ކޮވިޑް-19 އާއި ގުޅުންހުރި އަދަދުތައް
އަލަށް ނެގުނު ސާމްޕަލް 51
ނަތީޖާ ލިބުނު 173 ސާމްޕަލް
ނުލިބި 125 ސާމްޕަލް (އޭގެތެރޭގައި ހޯމް ކަރަންޓީން ސާމްޕަލް ތަކާއި، ފްލޫ ކްލިނިކް، އަދި ކޮންޓެކްޓުންގެ ސާމްޕަލްގެ އިތުރުން އެކްޓިވް ސާވޭލަންސްގެ ތެރެއިން ނެގުނު ސާމްޕަލްތައް ހިމެނޭ).
މިހާތަނަށް ނެގުނު ޖުމްލަ ސާމްޕަލް 9878
އަލަށް ފާހަގަ ކުރެވުނު ޑައިރެކްޓް ކޮންޓެކްޓުން 102
ކޮންޓެކްޓުންގެ ގޮތުގައި 525 މީހަކު ފާހަގަ ކުރެވިފައި (އޭގެތެރޭގައި ހައިރިސްކު 84 މީހުން، އަރިދަފުސް ރޯގާގެ 221)
މޮނިޓރިންގައި 241 ގެއެއް.
ޚިޔާލުތައް