މުހައްމަދު ޝިހާބް އަނެއްކާވެސް ފުވައްމުލަކު ގޮނޑުދޮށުން ދެމީހަކު ވެލި ނަގާ މަންޒަރު ފެންނަ ވީޑިއޯއެއް އިއްޔެ މީހަކު ފޭސްބުކްގައި އާއްމުކޮށްފިއެވެ. ފުވައްމުލަކު ގޮޑުދޮށުން ވެލިނެގުން ވަނީ މަނާކުރެވިފައެވެ.
އިއްޔެ، މިވިޑިއޯ އާއްމުކުރަމުން ހަމްނާ ކިޔާ މީހަކު ބުނެފައިވަނީ ކޮންމެ ދުވަހަކު ހެން ވެސް އެމީހުން އެތަނުން ވެލި ނަގަމުން ދާތަން ފެންނަކަމަށެވެ. އަދި އެކަން ގިނަ ބަޔަކަށް އެނގޭނެ ކަމަށާއި މިކަން ހުއްޓުވޭނީ ކޮންގޮތަކުން ތޯ އޭނާ ސުވާލުކޮށްފައި ވެއެވެ. އަދި މިފަދަ އަމަލުތަކާއި މެދު ދެރަވެ ކަންބޮޑުވާކަން ވެސް ހާމަކޮށްފައި ވެއެވެ.
ވީޑިއޯގައި ފެންނަނީ ދިވެހި ފިރިހެނަކު ގޮނޑުދޮށުން ދޮންވެލި ގޯންޏަށް އަޅާމުންދާ ތަނެވެ. އަދި އިރުކޮޅަކުން އިތުރު ފިރިހެނަކު އައިސް އެތަނުން ގޯންޏެއް ނަގައި ވެލިއަޅަން ފަށައެވެ. އެދެ މީހުން ވެލި އަޅަން 3-4 ގޯނި ގެންގުޅޭތަން ފެނެއެވެ. ލަފާކުރެވޭ ގޮތުން އެއީ ފުވައްމުލަކުގެ އިރު-އުތުރު ފަރާތުން ބަނދަރާއި އެއާޕޯޓް ސަރަހައްދާއި ދެމެދެވެ.
ހަމްނާ ފާހަގަކުރި ގޮތަށް ފުވައްމުލަކުގެ ގޮނޑުދޮށުން ވަގަށް ވެލިނެގުމުގެ އަމަލުތައް މަދުން ނަމަވެސް ކުރަމުން އާދެއެވެ. އަދި އެކަން ހުއްޓުވަން ވެސް ބައެއް ފަހަރު މަސައްކަތް ކުރާ ތަން ވެސް ފެނެއެވެ.
ގަވާއިދާއި ޚިލާފަށް ގޮނޑުދޮށުން މަދުބަޔަކު ވެލިނަގަނީ އެވެލީގެ ބޭނުންކުރާނެ ބަޔަކުވެސް ރަށުގައި ތިބޭތީ ކަމަށް އެންމެން ވެސް އެއްބަސް ވެއެވެ. ސިއްރުން މީހުން ވެލިނަގަނީ ވިއްކުމަށް ވެއެވެ. އެގޮތުން ނަގާ ވެލި ގަންނަ ބަޔަކު ރަށުތެރޭގައި ތިބޭ ކަމަށާއި އެފަދަ މީހުން ހޯދައި ފިޔަވަޅަ އަޅައިގެން ނޫނީ މިކަން އެއްކޮށް ހުއްޓިގެންދާނެ ކަމަކަށް ނުބެލެވެއެވެ.
ފުވައްމުލަކު ގޮނޑުދޮށުން ވަގަށް ވެލި ނަގަނީ. 26 ޖޫން 2021
ގަވާއިދާއި ޚިލާފަށް ނަގާފައި ހުނަން ވެލި ބޭނުން ކުރޭތޯ އާއި އިމާރާތްކުރުމުގެ މަސައްކަތްކުރާ ތަންތަނުގައި ބޭނުންކުރަނީ ކޮންގޮތަކުން ހޯދާފައިވާ ވެލިތޯ މިހާރަށް ވުރެ ކައިރިން ބަލައިގެން ނޫނީ މިފަދަ އަމަލުތައް ހުއްޓުވުން ދުރުކަމަށް ގިނަބަޔަކު ބުނެއެވެ.
ދޮންވެލީގެ އިތުރުން ކަށިވެއްޔާއި ތުނޑި އޮފްވެލި އަދި އަކިރި ވެސް ދޭތެރެ ދެތެރެއިން ގޮނުދޮށުން ނަގާކަމަށް އާމުންނަށް ފާހަގަ ކުރެވިފައި ވެއެވެ.
ފުވައްމުލައް ސިޓިގެ ގޮނުދޮށުން ވެލި ނެގުން މަނާކޮށްފައި އޮންނަތާ އެތައް އަހަރެއް ވެއްޖެއެވެ. ގޮނުދޮށުން ނަގާފައި ހުންނަ ވެލި އެއްގަމު ތެރެއިން ފެނިއްޖެ ނަމަ ސިޓީ ކައުންސިލުން އެ ވެލިތަކެއް އަނބުރާ ގޮނުދޮށަށް އެޅުމުގެ މަސައްކަތް ކުރަމުން އަންނަތާ ވެސް ގިނަ ދުވަސްތަކެއް ވެއްޖެއެވެ. ނަމަވެސް ގޮނުދޮށުން ވެލި ނެގުން މުޅިން ހުއްޓިފައެއް ނުވެއެވެ.
ފުވައްމުލަކު ގޮނޑުދޮށުން ވެލިނަގާފަރާތްތަކާއި މެދު ގާނޫނީ ފިޔަވަޅު އެޅުމަށް ގަވާއިދެއް އެކުލަވާލުމުގެ މަސައްކަތް ފުވައްމުލައް ސިޓީ ކައުންސިލުން އަންނަނީ ކުރަމުންނެވެ.
ރަށް ގިރުމުގެ ނުރައްކަލުން ފުވައްމުލައް ސިޓީ ހިމާޔަތް ކުރުމަށްޓަކައި ފުވައްމުލަކުގެ ގޮޑުދޮށުން އެއްވެސް މިންވަރަކަށް ވެލި ފަދަ ތަކެތި ނެގުން ވަނީ މަނާ ކުރެވިފައެވެ. ގަވާއިދާ ޚިލާފަށް ވެލި ނަގާނަމަ އެކަން ފުވައްމުލައް ސިޓީ ކައުންސިލް ހޮޓްލައިން 1618 އަށް ގުޅުއްވައި މައުލޫމާތު ހިއްސާ ކޮށްދެއްވުމަށް ސިޓީ ކައުންސިލުން އެދިފައިވެވެ.
ޚިޔާލުތައް