އިބްރާހިމް ލަތީފް ކޮވިޑް ރޯގާގެ ދެވަނަ ރާޅާއިއެކު ފުވައްމުލަކުން ގިނަ އަދަދަކަށް އެރޯގާއަށް މީހުން ޕޮޒިޓިވުވި ނަމަވެސް މިހާރު އެއަދަދުގެ 5 އަށްވުރެ މައްޗަށް ނުދާތާ 16 ދުވަސްވެއްޖެއެވެ. އެގޮތުން، އިއްޔެ އެރޯގާއަށް ޕޮޒިޓިވުވެފައިވަނީ 4 މީހުންނެވެ. އޭގެ ކުރީ ދުވަހު އެންމެ މީހެކެވެ. ފާއިތުވީ 3 ދުވަހުގެ އެވުރެޖަށް ބަލާއިރު މިރޯގާ އަށް ޕޮޒިޓިވުވާ މީހުންގެ ނިސްބަތަކީ ނަތީޖާ ލިބޭ އަދަދުގެ 1 އިންސައްތައެވެ.
އިއްޔެ ފުވައްމުލަކުން ޕޮޒިޓިވުވެފައިވަނީ 4 ދިވެހިންނެވެ. މިވަގުތު ކޮރޯނާ ރޯގާޖެހިފައި ތިބީ 20 މީހުންނެވެ. އެއީ 18 ދިވެހިންނާއި 2 ބިދޭސީއެކެވެ. އިއްޔެ 4 ދިވެހިންނަށް މިރޯގާ ޖެހުނުއިރު 2 މީހުންވަނީ މިރޯގާއިން ސަލާމަތްވެފައެވެ.
ކޮރޯނާ ރޯގާގެ ހާލަތާއި ގުޅިގެން ފުވައްމުލަކު ސިޓީގައި އަޅާފައިވާ ބައެއް ފިޔަވަޅުތަކަށް މިދިޔަ އާދީއްތަ ދުވަހުން ފެށިގެން ވަނީ ބައެއް ލުއިތައް ދީފައެވެ. އެގޮތުން ކާފިއު ވަގުތު ރޭގަނޑު 9:00 އިން ފަތިހު 4:00 ވަނާ ބަދަލުކޮށްފައެވެ. އަދި ކެފޭ ރެސްޓޯރެންތް ހޮޓާފަދަ ތަންތަން އެޗްޕީއޭގެ އުސޫލާއި އެއްގޮތްވާ ގޮތުގެމަތީން ކާފިއު ނޫން ގަނޑިތަކުގައި ހުޅުވައިގެން ޚިދުމަތްދިނުމަށް ވަނީ ދޫކޮށްލާފައެވެ. މީގެ އިތުރުން ބިދޭސީންނަށް މީހުން ދިރިއުޅޭ ގޭގޭގައި މަސައްކަތް ކުރުން ބަންދުކުރުމަށް ނެރެފައިވާ އަމުރުވެސް ވަނީ އުވާލާފައެވެ.
ޚިޔާލުތައް