އިބްރާހިމް ލަތީފް ފުވައްމުލަކު ސިޓީއިން ކޮރޯނާ ރޯގާއަށް އިއްޔެ ޕޮޒިޓިވުވެފައިވަނީ އެންމެ މީހެކެވެ. ކޮރޯނާ ރޯގާގެ ދެވަނަ ރާޅަށްފަހު އިއްޔެނޫން ކުރީދުވަހު ގިނަ އަދަދެއްގެ ބަޔަކު މިރޯގާއަށް ޕޮޒިޓިވުވުމާއިއެކު ތިންވަނަ ރާޅެއްގެ ބިތުވެރިކަން ކުރިމަތިވި ނަމަވެސް އިއްޔެ ޕޮޒިޓިވުވި އަދަދު މަދުވުމަކީ ތިންވަނަ ރާޅެއްނައިސް ދާނެ ކަމުގެ ނިޝާނެކެވެ. ނަމަވެސް، އިއްޔެ ނަތީޖާ ލިބިފައިވަނީ އެންމެ 20 ސާމްޕަލެއްގެއެވެ. ހަތް ދުވަހުގެ އެވްރެޖަށް ބަލާއިރު ޕޮޒިޓިވުވާ މީހުންގެ ނިސްބަތަކީ އެންމެ 3 އިންސައްތައެވެ. މިއަދަދު އިއްޔެނޫން ކުރީ ދުވަހާއި ހަމައަށް ހުރީ 1 އިންސައްތާގައެވެ. އަދި މިމަސް ފެށުނުއިރު މިއަދަދު ހުރީ 3.5 އިންސައްތާގައެވެ.
ކޮރޯނާ ރޯގާއަށް ފުވައްމުލަކު ސިޓީއިން އިއްޔެ ޕޮޒިޓިވުވެފައިވަނީ ދިވެއްސެކެވެ. މިއަދަދާއިއެކު މިރޯގާ ޖެހިފައިތިބި މީހުންގެ އަދަދަކީ 36 އެވެ. އެއީ 26 ދިވެހިންނާއި 10 ބިދޭސީންނެވެ. އިއްޔެ ނަތީޖާ ލިބުނީ އެންމެ 20 ސާމްޕަލެއްގެއެވެ. އަދި މިހާތަނަށް ނަތީޖާ ނުލިބޭ 176 ސާމްޕަލެއްވާއިރު އިއްޔެ 217 ސާމްޕަލެއް ނެގުނެވެ.
ކޮރޯނާ ރޯގާގެ ހާލަތާއި ގުޅިގެން ފުވައްމުލަކު ސިޓީގައި މިވަގުތު އެޅިފައިވާ ފިޔަވަޅުތަކަކީ:
- ކާފިއު ގަޑި ރޭގަނޑު 21:00 އިން 4:00 އަށް
- ބިދޭސީންލައްވައި ކުރަމުން އައި ހުރިހާ މަސައްކަތް ހުއްޓާލުން، ނަމަވެސް މިހާލަތުގައި ކޮންމެހެން ކުރަންޖެހޭ މަސައްކަތް ކުރުމަށް ކައުންސިލުން ހުއްދަނަގައިގެން ކުރެވިދާނެ
- ގާޑިޔާ. ރެސްޓޯރެންޓް އަދި ކެފޭތައް އެޗްޕީއޭ ގައިޑްލައިނާއި އެއްގޮތަށް މަސައްކަތްކުރުން
- ކައުންސިލުން ހުއްދަދީފައިވާ ފިހާރަތައް ގަވާއިދާއި އެއްގޮތަށް ވިޔަފާރިކުރުން
- ސެލޫން، ޖިމް، ބޯކޮށާތަންތަން އެޗްޕީއޭ ގައިޑުލައިނާއި އެއްގޮތަށް އަމަލުކުރުން
- ޕާޓީ، ޙަފްލާތައް ބޭއްވުން ހުއްޓާލުން
- އެއްގެއިން އަނެއްގެއަށް ޒިޔާރަށް ކުރުން ހުއްޓާލުން
- އެއްއަވަށުން އަނެއް އަވަށެއް ދިއުން ހުއްޓާލުން
- އެއްފަހަރާ ތިން މީހުންނަށްވުރެ ގިނަ މީހުން މަގުމަތީގައި އުޅުމާއި އާންމުތަންތަނުގައި އުޅުން ހުއްޓާލުން
- ހުރިހާ ކުޅިވަރު ހަރަކާތްތަކާއި ކަސްރަތު ހަރަކާތްތައް ހުއްޓާލުން
މުޅި ރާއްޖޭގެ ކޮވިޑު ހާލަތަށް ބަލާއިރު މުޅި ރާއްޖެއިން އިއްޔެ ކޮވިޑަށް ޕޮޒިޓިވުވެފައިވަނީ 78 މީހެކެވެ. އެއީ މާލެއިން ޕޮޒިޓިވުވި 28 މީހުންނާއި މީހުން ދިރިއުޅޭ އެހެން ރަށްރަށުން ޕޮޒިޓުވި 34 މީހުންނާއި، ރިސޯޓުތަކުން ޕޮޒިޓުވި 61 މީހެކެވެ.
ޚިޔާލުތައް