އިބްރާހިމް ލަތީފް ކުރީގެ ނާއިބު ރައީސް ޑރ. މުހައްމަދު ޖަމީލު އަހުމަދު ކުރީގެ ރައީސް މުހައްމަދު ނަޝީދަށް ސާބަސް ދެއްވައި ޓްވީޓެއް ކުރައްވައިފިއެވެ. ޑރ ޖަމީލު މިމޭރުމުން ޓްވީޓް ކުރައްވާފައިވަނީ، ރައީސް އިބްރާހިމް މުހައްމަދު ސޯލިހާއެކު ސިޔާސީ ގޮތުން ދެން ހުރެވެން ނެތް ކަމަށް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވުމުންނެވެ.
ރައީސް މުހައްމަދު ނަޝީދުގެ ރަސްމީ ޓްވިޓާ އެކަންޓް ޓެގް ކުރައްވާ ޑރ. ޖަމީލު ކުރެއްވި ޓްވީޓުގައި ލިޔެފައިވަނީ “ސާބަސް ރައީސް” އެވެ. މި ޓްވީޓްގައި ވަނީ ރައީސް އިބްރާހިމް މުހައްމަދު ސޯލިހާއިއެކު ދެން ހުރެވެން ނެތްކަމަށް ރައީސް ނަޝީދު ވިދާޅުވި ކަމަށް ބުނެ މިހާރު ނޫހުން ލިޔެފައިވާ އާޓިކަލެއް ވެސް ހިމަނާފައެވެ.
އިއްޔެ މިހާރު ނޫހުގައި ލިޔެފައިވާ އެލިއުމުގައި ވަނީ “އެންމެ ގާތް އެކުވެރިޔާ ރައީސް އިބްރާހިމް މުހައްމަދު ސޯލިހާއެކު ފިކުރީ ގޮތުން ހިޔާލު ތަފާތުވެފައިވާތީ، އެ މަނިކުފާނާއެކު އޮތް ސިޔާސީ ގުޅުން ކަނޑާލެއްވިކަން ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު އިއުލާން ކުރައްވައިފި” ކަމަށެވެ.
މިޚަބަރަކީ އެމްޑީޕީގެ ގައުމީ މަޖިލިސް މެންބަރުންވެސް ތިއްބަވާ ވަޓްސްއެޕް ގްރޫޕަކަށް ރައީސް ނަޝީދު ފޮނުއްވި މެސެޖަކާއި ހަވާލާދީ އާންމުކޮށްފައިވާ ޚަބަރެކެވެ. އެ މެސެޖުގައި ރައީސް ނަޝީދު ވިދާޅުވެފައިވަނީ ރައީސުލްޖުމްހޫރިއްޔާއާ އެކީ ސިޔާސީ ގޮތުން ދެން ހުރެވޭކަށް ނެތް ކަމަށެވެ. މީގެ އިތުރުން ކުރީގެ ރައީސް އަބްދުﷲ ޔާމީނާއި އިދިކޮޅު ޕީޕީއެމްގެ އެހީތެރިކަން ހޯއްދަވަން ޖެހިއްޖެ ނަމަ އެކަން ކުރައްވާނެކަމަށްވެސް ރައީސް ނަޝީދު ވިދާޅުވިކަމަށް ދިވެހި މީޑިއާ ތަކުން ރިޕޯޓުކުރިއެވެ.
ނަޝީދު މިގޮތަށް ވިދާޅުވި ނަމަވެސް އެމްޑީޕީއާއެކު މަސައްކަތް ކުރުމުގެ ވިސްނުމެއް ނެތް ކަމަށް އިދިކޮޅު ޕީޕީއެމް/ޕީއެންސީ ކޯލިޝަނުން ވަނީ ބުނެފައެވެ.
ޚިޔާލުތައް