އިބްރާހިމް ލަތީފް ކުރީގެ ނާއިބު ރައީސް ޑޮކްޓަރު މުހައްމަދު ޖަމީލު އަހުމަދު ނާއިބު ރައީސްކަމުން ދުރުކުރި މައްސަލަ ކޯޓަށް ހުށަހެޅިދާނެ ކަމަށާއި ނަމަވެސް އެމައްސަލައިގެ ފުރަތަމަ މަރުހަލާ ސުޕްރީމް ކޯޓަށް ނުބެލޭނެކަމަށް ސުޕްރީމް ކޯޓުން ހުކުމް ކޮށްފިއެވެ.
ސުޕްރީމް ކޯޓުން މިއަދު ކުރި ހުކުމުގައިވަނީ އިސްލާމްދީނާއި ގާނޫނު އަސާސީ އާއި ގާނޫނުތަކާ ޚިލާފްވާ ހާލަތްތަކުގައި ރައީސާއި ނައިބު ރައީސް މަގާމުން ދުރުކުރުމުގެ ބާރު މަޖިލީހަށް އެބައޮތް ކަމަށާއި އެކަމާބެހޭ އިޖްރައާތުތައް ކަނޑައެޅުމުގެ ބާރު ވެސް އޮތީ މަޖިލީހަށް ކަމަށެވެ. ނަމަވެސް މަޖިލީހުން ވެސް އަމަލުކުރަން ޖެހެނީ ގާނޫނު އަސާސީއާ އެއްގޮތަށް ކަމަށް ވާއިރު، ޖަމީލް ވަކިކުރުމުގައި މަޖިލީހުން އަމަލުކުރި ގޮތުން ކޯޓު މެދުވެރިކޮށް ހައްލު ހޯދަން އޭނާއަށް ދައުވާ ކުރެވިދާނެ ކަމަށް އެ ހުކުމުގައިވެ އެވެ.
ހުކުމުގައިވަނީ އެ މައްސަލާގައި ދައުވާކުރުމުގެ ހައްގު ޖަމީލަށް އޮޮތަސް، އެއީ ފުރަތަމަ މަރުހަލާގައި ސުޕްރީމް ކޯޓުން ބެލޭނެ މައްސަލައެއް ނޫން ކަމަށެވެ. ސަބަބަކީ ގާނޫނު އަސާސީ އޮތްގޮތުން ސުޕްރީމް ކޯޓަށް ބެލޭނީ ރައީސް މަގާމުން ދުރުކުރާ މައްސަލަތައް އެކަނި ކަމަށް ވެފައި، ނައިބު ރައީސް މަގާމުން ދުރުކުރާ މައްސަލަތައް ސުޕްރީމް ކޯޓަށް ބެލޭނެ ކަމަށް ގާނޫނު އަސާސީގައި ނެތުން ކަމަށް އެ ހުކުމުގައިވެ އެވެ. އެހެންވެ، އެ މައްސަލަ ފުރަތަމަ މަރުހަލާގައި ބަލަންޖެހޭނީ ސިވިލް ކޯޓުން ކަމަށް އެ ހުކުމުގައިވެ އެވެ.
ކުރީގެ ނާއިބު ރައީސް މުހައްމަދު ޖަލީލު އަހުމަދު އެމަގާމުން ފުރުކޮށްފައިވަނީ ކުރީގެ ރައީސް އަބްދުﷲ ޔާމީނު އަބްދުލް ގައްޔޫމުގެ ވެރިކަމުގައި ރައްޔިތުންގެ މަޖިލީހުން ނެގި އިތުބާރުނެތްކަމުގެ ވޯޓަކުންނެވެ.
ރައީސާއި ނައިބު ރައީސްގެ އިތުރުން ވަޒީރުންނާއި މިނިވަން މުއައްސަސާތަކުގެ ވެރިން މަގާމުން ދުރުކުރުމާއި ގުޅޭ ގޮތުން ސުޕްރީމް ކޯޓުން ކުރިން ނިންމާފައިވާ ނިންމުމަކީ ރަގަޅު ނިންމުމެއްނޫންކަމަށްވެސް މިއަދު އެކޯޓުން ނިންމާފައިވެއެވެ. “މަޖިލީހުން ނިންމާ ހުރިހާ ނިންމުންތައް ކޯޓަށް ހުށަހަޅަންޖެހޭ ކަމުގައި ގާނޫނު އަސާސީގައި ބަޔާން ކޮށްފައި ނުވާއިރު އަދި މި މޭރުމުން ދިވެހިރާއްޖޭގައި އަމަލު ކުރަމުންދާ އެއްވެސް ގާނޫނެއްގައި ބަޔާން ކޮށްފައި ނުވާއިރު، ސުޕްރީމް ކޯޓުގެ އަމިއްލަ އިސް ނެގުމަކަށް، ރައްޔިތުންގެ މަޖިލީހުން މަގާމުން ދުރުކުރާ އެންމެންގެ މައްސަލަތައް ބަލައި، ގޮތް ކަނޑައެޅުން ލާޒިމެއް ނުކުރެވޭނެ.” އެ ހުކުމުގައިވެ އެވެ.
2017 ވަނަ އަހަރު އެކޯޓުން ނިންމާފައިވާ ގޮތުން، ރައީސާއި ނައިބު ރައީސްގެ އިތުރުން ވަޒީރުންނާއި މިނިވަން މުއައްސަސާތަކުގެ ވެރިން މަގާމުން ދުރުކުރަން މަޖިލީހުން ފާސް ކުރިޔަސް، އެ ނިންމުމަށް އަމަލުކުރެވޭނީ ސުޕްރީމް ކޯޓުން އެކަމާ މެދު ފަހު ބަސް ބުނުމަށް ފަހުގައެވެ.
ޚިޔާލުތައް