މުހައްމަދު ޝިހާބް ފުވައްމުލައް ސިޓީގައި ދަރިވަރުންނަށް ވެކްސިން ދޭން މާދަމާ، (16 އޮގަސްޓް 2021 ވާ އާދިއްތަ) ދުވަހު ފަށަން ހަމަޖެހިފައިވާ ކަމަށް ފުވައްމުލަކު ހޮސްޕިޓަލުން ހާމަކުރައްވައެވެ.
މިކަލް ނޫހަށް މައުލޫމާތު ދެއްވަމުން ފުވައްމުލކު ހޮސްޕިޓަލުގެ މެނޭޖަރު އަހުމަދު ސައީދު ވިދާޅުވީ މާދަމާއި އިން ފެށިގެން މި ހަފުތާތެރޭގައި ފުވައްމުލައް ސިޓީގެ ސްކޫލަތަކުގައި ވެކްސިން ދިނުން ކުރިޔަށް ގެންދިއުމަށް ތާވަލް ކުރެވިފައިވާ ކަމަށެވެ. އެގޮތުން ވެކްސިން ދިނުމަށް ހަމަޖެހިފައި ވަނީ ދަރިވަރުން ކިޔަވާ ސްކޫލްތަކުގައެވެ.
އެމްޖޭއެސް ގެ ދަރިވަރުން – އައު އަހަރުގެ ކިޔެވުމަށް ސްކޫލްގައި 2021
ވެކްސިން ޖެހުމަށް ހަމަޖެހިފައި ވަނީ ހެނދުނު 9:00 އިން މެންދުރު 12:00 އަށް އަދި މެންދުރުފަހު 13:30 އިން އެ ސްކޫލެއްގެ ހުރިހާ ދަރިވަރުންނަށް ވެކްސިން ދީ ނިމެންދެނެވެ.
އާދިއްތަ، 16 އޮގަސްޓް 2021- ޏ. އަތޮޅު ތަޢުލީމީ މަރުކަޒު
ހޯމަ، 17 އޮގަސްޓް 2021 – ހާފިޒު އަޙްމަދު ސްކޫލް
އަންގާރަ، 18 އޮގަސްޓް2021 – ފުވައްމުލަކު ސްކޫލް
ބުދަ، 19 އޮގަސްޓް 2021 – މުޙައްމަދު ޖަމާލުއްދީން ސްކޫލް
މިއަހަރު އަދި މިދިޔަ އަހަރު ސްކޫލް ނިންމާފައިވާ އުމުރުން 12 އަހަރާއި 17 އަހަރާ ދެމެދުގެ ކުދިނަށް ވެސް އެދަރިވަރަކު ކިޔެވި ސްކޫލަކުން ވެކްސިން ޖަހައިދޭގޮތަށް އެޑިއުކޭޝަން މިނިސްޓްރީއިން ހަމަޖައްސާފައިވާ ކަމަށް އެޗްޕީއޭއިން ހާމަކުރެއެވެ. އެގޮތުްނ ފުވައްމުލައް ސިޓީގެ ތިބި ސްކުލް ނިންމާފައިވާ ދަރިވަރުންވެސް އެދަރިވަރަކު އެންމެ ފަހުން ކިޔެވި ސްކޫލެއްގެ ލިސްޓްގައި ހިމަނައިގެން ވެކްސިން ދިނުމަށް ވަނީ ހަމަޖެހިފައެވެ. އެހެން ރަށަކުން ވެސް ސްކޫލް ނިންމާފައިވާ ދަރިވަރަކު ފުވައްމުލައް ސިޓީގެ ކޮންމެވެސް އެއް ސްކޫލެއްގެ ލިސްޓްގައި ހިމަނައިގެން ވެކްސިން ޖަހައިދިނުމުގެ އިންތިޒާމު ހަމަޖެހިގެން ދާނެ ކަމަށް މެނޭޖަރު އަހުމަދު ސައީދު ހާމަކުރެއްވިއެވެ.
ޏ.އޭއީސީގެ ދަރިވަރުން – އައު އަހަރުގެ ކިޔެވުމަށް ސްކޫލަށް ވަންނަނީ. 2021
ފުވައްމުލައް ސިޓީގެ މި4 ސްކޫލުން މިހާތަނަށް 1068 ދަރުވަރުންގެ ބެލެނިވެރިން ވަނީ ވެކްސިން ޖެހުމަށް އިއުތިރާޒެއް ނެތްކަމުގެ ލިޔުން ސްކޫލަތަކަށް ދީފައެވެ.
ސްކޫލްތަކުގައި ވެކްސިން ޖަހަނީ 12 އަހރުން މަތީގެ ދަރިވަރުންނަށެވެ. އެއީ އާއްމު ގޮތެއްގައި ގްރޭޑް 7 އިން ފެށިގެން މަތީގެ ދަރިވަރުންނެވެ. އެދަރިވަރުންނަށް ދެނީ ފައިޒާ ވެކްސިން ކަމަށް ނެޝެނަލް ހެލްތު އިމްޖެންސީ އޮޕަރޭޝަން ސެންޓަރުން ހާމަކުރައްވާފައި ވެއެވެ. ފައިޒާ ވެކްސިންގެ ދެޑޯޒް ފުރިހަމ ަކުރަން ޖެހެއެވެ. ދެވަނަ ޑޯޒް ދެނީ ފުރަތަމަ ޑޯޒަށް 3 ހަފުތާ ފަހުންްނެވެ. ފައިޒާ ވެކްސިނަކީ އެންމެ ކާމިޔާބު ދެވެކްސިންގެ ތެރެއިން އެއް ވެކްސިނެވެ. އެވެކްސިނުގެ އެފިކަސީ ހުރީ %95 ގައެވެ. އަދި ވެކްސިންގެ ޑޯޒެއްގެ އަގު ބާޒާރުގައި ހުރީ 20 ޑޮލަރުގައެވެ. އަދި މިއަގު އަންނަނީ ބޮޑުވަންނެވެ.
މިވެކްސިންގެ އަސަރު ހަށިގަނޑަށް ބޮޑަށް ކުރަނީ 2 ވަނަ ޑޯޒް ޖެހުމުން ކަމަށްް ވެކްސިން ޖެހި ގިނަބަޔަކު ބުނެއެވެ. އެގޮތުން ބޮލުގައި ރިހުމާއި، ހުންއައުން އަދި މިހާ ބަރުހެލިވުމާއި، ހުޅުތަކުގައި ރިއްސުން ހިމެނެ ކަމަށް މިވެކްސިން ޖެހި މީހުން ނުނެއެވެ.
ސަރުކާރުން ކަނަޑައަޅާފައި ވަނީ މި ކުރިޔަށް އޮތް ސެޕްޓެމްބަރު މަސް ނިމުމުގެ ކުރިން ރާއްޖޭގެ ހުރިހާ ދަރިވަރުންނަށް ވެކްސިންގެ ޑޯޒްތައް ފުރިހަމަ ކުރުމަށެވެ. ރާއްޖޭގެ ސްކޫލް ދަރިވަރުންގެ ތެރޭގައި ވެކްސިން ޖެހޭނެ 40 ހާހެއްހާ ދަރިވަރުން ތިބޭނެކަމަށް އެޑިއުކޭޝަން މިނިސްޓްރީން ހާމަކޮށްފައި ވެއެވެ.
ސްކޫލް ދަރިވަރުންނަށް މިހަފުތާގައި ވެކްސިން ޖެހުން ކުރިޔަށް ގެންދާތީ ފުވައްމުލައް ސިޓީގައި މިހަފުތާގެ ބުރާސްފަތި ދުވަހާއި ހަމަޔަށް އާއްމުންނަށް ވެކްސިން ޖެހުން މެދުކަނޑާލާފައި ވާކަމަށް ފުވައްމުލަކު ޕަބްލިކް ހެލްތު ޔުނިޓުން ހާމަކުރައްވައެވެ.
ޚިޔާލުތައް