އިބްރާހިމް ލަތީފް އުމުރުން 16 އަހަރުފުރުމުން ވަގުތީ ލައިސެންސެއް ދިނުމާއި ގުޅޭގޮތުން އިއްޔެގެ ރައްޔިތުންގެ މަޖިލީހުގައި ބަހުސްކޮށްފިއެވެ. ރައްޔިތުންގެ މަޖިލީހުގެ މިއަހަރުގެ 3 ވަނަ ދައުރުގެ 6 ވަނަ ޖަލްސާގައި 16 އަހަރާއި 18 އަހަރާއި ދެމެދުގެ ކުޑަކުދިންނަށް، ބެލެވެރިން އިއުތިރާޒުނުކުރާނަމަ، ވަގުތީ ލައިސެންސެއް ދިނުމަށް ބަހުސްކުރެވިފައިވަނީ ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ މައްސަލަ ގަވާއިދު ކޮމިޓީން ދިރާސާކޮށް ނިންމިގޮތުގެ ރިޕޯޓު ހުށަހެޅުމަށް އިއްޔެ ބޭއްވުނު ރައްޔިތުންގެ މަޖިލީހުގެ ބައްދަލުވުމުގައެވެ.
ހެންވޭރު ހުޅަނދު ދާއިރާގެ މެންބަރު އެމްޑީޕީގެ ޗެއާޕާސަން ހަސަން ލަތީފް މިމައްސަލަ ހުށަހަޅުއްވާފައިވަނީ، އުމުރުން 18 އަހަރު ފުރުމުގެ ކުރިން އެއްގަމު ދަތުރުފަތުރުގެ ގާނޫނާ ހިލާފުވެފައިވާ ފަރާތްތަކަށާއި އެކި ސަބަބުތަކާ ގުޅިގެން ލައިސަންސް ނުނަގައި އެއްގަމު އުޅަނދުފަހަރު ދުއްވުމުގެ ސަބަބުން ޖޫރިމަނާ ކޮށްފައިވާ ފަރާތްތަކަށް ލުއި ހޯދައިދިނުމުގެ ގޮތުންނެވެ.
އުމުރުން 18 އަހަރު ފުރުމުގެ ކުރިން އެއްގަމު އުޅަނދު ފަހަރު ދުއްވައިގެން ފަސް އަހަރު ދުވަހުގެ ތެރޭގައި ޖުމްލަ 116 މިލިއަން ރުފިޔާއަށް ވުރެ ބޮޑު އަދަދަކުން ޖޫރިމަނާތައް ކޮށްފައި ހުރިކަންވެސް އިއްޔެގ ޖަލްސާގައި ވާހަކަދައްކަވަމުން ހިތަދޫ ދެކުނު ދާއިރާގެ މެމްބަރު އަދި މަޖިލީހުގެ ގަވާއިދު ކޮމިޓީގެ މެމްބަރު އިބްރާހިމް ނާޒިލް ފާހަގަކުރެއްވިއެވެ.
ނާޒިލް އިތުރަށް ވިދާޅުވީ ޖޫރިމަނާތައް އާއްމުކޮށް ކުރެެވިފައި ހުންނަނީ ދުއްވާ ސްޕީޑާއި ގުޅިގެން ކަމަށެވެ. އަދި އެ ސްޕީޑްގައި ދުއްވާކަން ފާހަގަކުރެވިފައިވަނީ ލައިސެންސް ނެތި ދުއްވާފައި ދާއިރު ފުލުހަކު ފެނިއްޖެއްޔާ ފިލުމުގެ ގޮތުން ކަމަށެވެ. އަދި އެކަމުގެ ސަބަބުން ނުރައްކާތެރި އެކްސިޑެންޑްތައް ހިނގުމަށްވެސް މަގުފަހިވާ ކަމަށެވެ.
ޚިޔާލުތައް
ބޭފުޅެއްގެ ދަރިކަލެއް 16އ ގައި ލައިސަންސް ނަގާން ބޭނުންވީބާ!!!