މުހައްމަދު ޝިހާބް ފުވައްމުލައް ސިޓީގައި ކޮވިޑް-19 ވެކްސިން ދޭގޮތުގެ ތާވަލް އަދާހަމަކޮށް، އިއްޔެ އާމުކޮށްފިއެވެ. ފުވައްމުލަކު ހޮސްޕިޓަލުން ނެރުނު އާތާވަލުގައި ވާ ގޮތުން ހަފުތާގެ ފުރަތަމަ 4 ދުވަހު ސިނޮވެކް ވެކްސިން ޖެހުން ކުރިޔަށްގެންދާ އިރު ބުރާސްފަތި ދުވަހު ވެކްސިން ދިނުމަށް ހަމަޖެހިފައިވަނީ އެސްޓްރެޒެނެކާ އެވެ.
އެގޮތުން ހަފުތާގެ އާދީއްތަ، ހޯމަ، އަންގާރަ އާއި ބުދަ ދުވަހު މެންދުރުފަހު 2:00 އިން ހަވީރު 4:00 އަށް ސިނޮވެކް ވެކްސިން ޖަހައި ދިނުމަށް ހަމަޖެހިފައިވަނީ ފުވައްމުލަކު ހޮސްޕިޓަލުގެ ގަރާޖް ސަރަހައްދުންނެވެ.
ހަފުތާގެ ބުރާސްފަތި ދުވަހު އެސްޓްރެޒެނެކާ ވެކްސިން ޖެހުމަށް ހެނދުނާއި ހަވީރު ވެސް ހުޅުވާލެވިފައި ވެއެވެ. އެގޮތުން ހެނދުނު 9:30 އިން 11:00 އަށް އަދި މެންދުރުފަހު 2:00 އިން ހަވީރު 4:00 އަށް ވަގުތު ކަނޑައަޅާފައި ވެއެވެ. ބުރާސްފަތި ދުވަހުވެސް ވެކްސިން ޖެހުމަށް ހަމަޖެހިފައި ވަނީ ފުވައްމުލަކު ހޮސްޕިޓަލުގެ ގަރާޖް ސަރަހައްދުންނެވެ. ކުރިން ކޮވިޝީލްޑްގެ ފުރަތަމަ ޑޯޒް ޖަހައި ދެވަނަ ޑޯޒް ނުޖެހި ތިބި ފަރާތްތަކަށް ދެވަނަ ޑޯޒަކަށް ޖަހަނީ އެސްޓްރެޒެނެކާ ވެކްސިން އެވެ. ‘ކޮވިޝީލްޑަކީ’ އެސްޓްރެޒެނެކާގެ ވެކްސިންގެ އަސްލުން އިންޑިއާގައި އުފައްދާ ބްރޭންޑަށް ކިޔާ ނަމެކެވެ.
ދެކުނުގެ 4 އަތޮޅުގައި ކޮވިޑް-19 ވެކްސިން ޖެހި ނިސްބަތް (3 ސެޕްޓެމްބަރު 2021
މިނިސްޓްރީ އޮފް ހެލެތުއިން ހާމަކުރައްވާފައިވާ ގޮތުގައި (3 ސެޕްޓެމްބަރު ގައި) ފުވައްމުލައް ސިޓީއިން ވެކްސިން ޖެހުމުގެ ނިސްބަތް އުޅެނީ ދަށްކޮށެވެ. އެއީ ވެކްސިން ޖހާ އުމުރު، 12 އަހަރުން މަތީގެ ދިރިއުޅޭ އާބާދީގެ 2 ޑޯޒް ފުރިހަމަ ކުރެވިފައިވަނީ %66 މީހުންނަށެވެ. އަދި ފުރަތމަ ޑޯޒް ޖެހިފައިވަނީ %88 މީހުންނަށެވެ.
ރަށުގައި ދިރިއުޅޭ މުޅި އާބާދީއަށް (ކުޑަކުދިން ހިމަނައިގެން) ބަލާއިރު 2 ޑޯޒް ފުރިހަމަ ކުރެވިފައި ވަނީ %50 މީހުންނަށެވެ. އަދި ފުރަތަމަ ޑޯޒް ޖެހިފައި ވަނީ %66 މީހުންނަށެވެ. މިއީ މިސަރަހައްދުގައިވާ އަނެއް 3 އަތޮޅަށްވުރެ ވެސް ނިސްބަތުން ދަށް މިންވަރެކެވެ.
ޚިޔާލުތައް