އިބްރާހިމް ލަތީފް އިސްލާމީ ގައުމުތައް ތަމްސީލުކުރާ ބައިނަލް އަގްވާމީ ޖަމިއްޔާ އޯއައިސީ އިން އިންޑިއާގައި މުސްލިމުންނާއި ދެކޮޅަށް ހިންގޭ ހަރަކާތްތައް ކުށްވެރިކޮށްފިއެވެ. އިންޑިއާގައި މުސްލިމުންނާއި ދެކޮޅަށް ފަހަކަށް އައިސް ހިންގާފައިވާ ހަރަކާތްތައް ފާހަގަކޮށް އޯއައިސީގެ އިދާރާއިން ނެރުނު ބަޔާނުގައި އިންޑިއާގެ މުސްލިމު މުޖުތަމައުގެ ރައްކާތެރިކަމާއި އަމާންކަން ކަށަވަރުކޮށްދިނުމަށް އިންޑިއާއަށް ގޮވާލާފައިވެއެވެ.
އިންޑިއާގެ އަންހެން ދަރިވަރުންނަށް ބުރުގާ މަނާކުރުމަށް ކަރުނާޓަކާ ސްޓޭޓުން ނިންމި ނިންމުމާއި ސޯޝަލް މީޑިއާގައި އާންމުވި އަންހެން ދަރިވަރަކަށް ފުރައްސާރަކުރުމާ މަންޒަރުތައްވެސް ހިމެނޭ ވީޑިއާއާއިމެދު ކަންބޮޑުވާކަންވެސް އޯއައިސީއިން ފާހަގަކުރިއެވެ.
މީގެއިތުރުން، އިންޑިއާގެ އުއްތަރަކްހަންދް ސްޓޭޓްގެ ހަރުކަރި ހިންދީ ފާދިރީއެއް އިންޑިއާ މުސްލިމުންގެ ނަސްލުނައްތާލުމަށް ގޮވާލި ގޮވާލުމާއިމެދު ކަންބޮޑުވުންވެސް އޯއައިސީއިން ފާޅުކޮށްފައިވެއެވެ. ފަހަކަށް އައިސް މުސްލިމުން އަޅުކަންކުރާ މިސްކިތްތަކާއި މުސްލިމުންނާއި ދެކޮޅަށް ހިންގޭ ހަރަކާތްތައް އާންމު ވަމުންދާކަން ވެސް އޯއައިސީން ވަނީ ފާހަގަކޮށްފައެވެ.
މިކަންތައްތަކާއި ގުޅިގެން ބައިނަލް އަގްވާމީ މުޖުތަމައަށް ޚާއްސަކޮށް އެކުވެރި ދައުލަތް ނުވަތަ ޔޫއެން އާއި ސްޕެޝަލް ޕްރޮސީޖާ އޮފަ ހިއުމަން ރައިޓްސް ކައުންސިލުން ފިޔަވަޅުތައް އެޅުމަށްވެސް އޯއައިސީއިން ގޮވާލާފައިވެއެވެ.
އިންޑިއާގައި މިފަދަ ހަރަކާތްތައް ގިނަވި ނަމަވެސް، އިންޑިއާއާއި އަވަށްޓެރި ސައްތައިން ސައްތަ އިސްލާމީ ދައުލަތް ދިވެރިރާއްޖެއިން މިކަންކަމާއި ކަންބޮޑުވުން މިހާތަނަށް ފާޅުކޮށްފައެއްނުވެއެވެ. އަދި އެއާޚިލާފަށް އިންޑިއާއާއެކު ހިންގޭ އަޑިނޭގޭ މުއާމަލާތްތައް ދަނީ އިތުރުވަމުންނެވެ. އެގޮތުން، އުތުރު ތިލަފަޅުވަޅު ތަރައްގީކުރުމާއި މާލެއާއި ތިލަފުއްޓާއި ދެމެދު އަޅާ ބްރިޖް އެޅުމަށް އިންޑިއާގެ އެފްކޮން އާއިއެކު ހެދުނު އެއްބަސްވުން ހިމެނެއެވެ.
ޚިޔާލުތައް