ޞާލިޙް ކައުންސިލްތަކުގައި ތިބޭ މެންބަރުންގެ އަދަދު މަދުކުރުމަށް ރައްޔިތުންގެ މަޖިލީހުން ދެކޭގޮތެއް ބެލުމަށް މަޖިލީހަށް ބާރަށު ދާއިރާގެ މެންބަރު އިބްރާހިމް ޝުޖާއު މިއަދު ގަރާރެއް ހުށަހަޅުއްވައިފިއެވެ.
ޝުޖާއު ހުށައެޅުއްވި ގަރާރުގައި ވިދާޅުވެފައިވަނީ ދިވެހި ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ހިނގައިދިޔަ 15 އަހަރުގެ ތެރޭގައި ޖުމްލަ 15 ފަހަރަށް އިސްލާހު ކުރެވިފައިވާއިރު އަދި ދިވެހި ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުން ކަށަވަރު ކުރުމުގެ ހާއްސަ ގާނޫނު 2020 ގެ ނަމުގައި ގާނޫނެއް 19 ވަނަ މަޖިލީހުން 2020 ވަނަ އަހަރު އެކުލަވާލައި އެ ގާނޫނަށް ވެސް ހަމަ އެ އަހަރު އަލުން އިސްލާހު ގެނެސްފައިވާ ކަމަށެވެ.
ފާއިތުވި 15 އަހަރު ލޯކަލް ކައުންސިލްގެ ހަތަރު އިންތިހާބެއް ބޭއްވި އެތަކެއް ހާސް ކައުންސިލަރުންނެއް އިންތިހާބުކޮށް، އެތަކެއް ބިލިއަން ރުފިޔާ ދައުލަތުގެ ބަޖެޓުން ހަރަދުކޮށްފައިވާކަމަށް ގަރާރުގައި ވިދާޅުވެފައިވެއެވެ. ނަމަވެސް އެ ނިޒާމުގެ ސަބަބުން ހިންގުމަށް އައި އިތުރު ބަދަލަކާއި ފަސޭހައެއް ނުވަތަ ރަށްތަކުގެ ތަރައްގީއަށް އައިި ބަދަލެއް ވެސް ފެންނަން ނެތްކަމަށް ކަމަށް ވިދާޅުވެއެވެ.
“މި ނިޒާމުގެ ސަބަބުން މިހާތަނަށް ފާހަގަވެފައިވަނީ ރާއްޖޭގެ އެކި ކަންކޮޅުތަކުގައި އެކި ސިޔާސީ ޕާޓީތަކުގެ އިސް ހަރަކާތްތެރީން ރަށްތަކުގެ އިދާރީ ހިންގުމުގެ އެންމެ އިސްވެރީންގެ ގޮތުގައި އިންތިހާބުކުރާ ނިޒާމަކަށް ބަދަލުވެގެން ގޮސްފައި އޮތުން. އިދިކޮޅު ޕާޓީއިން ނެރޭ ކެންޑިޑޭޓުން ގިނަ ފަހަރަށް ސަރުކާރަށް އެއްބާރުލުން ނުދޭކަމުގެ ޝަކުވާ އާންމުވެފައި އޮންނައިރު ސަރުކާރުން ހިންގާ ތަރައްގީގެ މަޝްރޫއުތަކަށް ވެސް ސީދާ ގޮތެއްގައޮ ހުރަސްއަޅާފައި އެބަހުރި.” ގަރާރުގައި ޝުޖާއު ވިދާޅުވިއެވެ.
ގަރާރުގައި ވިދާޅުވެފައިވަނީ މިހާތަނަށް ކުރެވުނު ދިރާސާތަކުން ވެސް، ރައްޔިތުންގެ އެންމެ ބޮޑު ކަންބޮޑުވުމެއް އޮތީ ކައުންސިރަލުންގެ އަދަދާމެދުގައި ކަމަށެވެ. ކުދިކުދި ރަށްތަކުގައި ވެސް ފަސް ކައުންސިލަރުން ތިބެންޖެހުމަކީ ހުރިހާ ގޮތަކުން ބެލިނަމަވެސް އިސްލާހުތައް ބެނުންވާ ކަންކަންކަމުގައި ވިދާޅުވެފައިވެއެވެ.
އިދާރީ ދާއިރާތައް ލާމަރުކަޒީ ނިޒާމުން ހިންގުމަށް ކުރަމުން އަންނަ ހޭދައަކީ ވެސް ފުންކޮށް ވިސްނާލަންޖެހޭ ކަމެއް ކަމަށް ގަރާރުގައި ވިދާޅުވެފައިވެއެވެ. އަދި އެންމެ ކަންބޮޑުވާންޖެހެނީ އެކަށީގެންވާ ނަތީޖާއެއް ނުނެރެވޭތީ ކަމަށެވެ.
“ކޮންމެ ރަށަކަށް، މަދުވެގެން ފަސް ކައުންސިލަރުން އިންތިހާބުކޮށް މުސާރައަށް ބޮޑު ހޭދައެއް ކުރާއިރު މިއީ މިކަން އޮންނަންޖެހޭ ގޮތްތޯ ސުވާލު އުފެދޭކަމެއް. މި ނިޒާމުގައި ދެކޮޅުނުޖެހޭ އެތައް ކަމެއް ވެސް ހިނގަމުންދޭ. އާބާދީ ކިތަންމެ ކުޑަނަމަވެސް ފަސް ކައުންސިލަރުން ތިބޭކަމަށާއި، ޒިންމާތަކާއި އާބާދީތައް ބޮޑު ރަށްތަކާއި، މީހުން މަދު އަދި ކުރާނެ މަސައްކަތްތައް ވެސް މަދު ކުޑަ ރަށުގެ ކައުންސިލަރުންގެ މުސާރައާއި އިނާޔަތްތައް އެއްވަރު.” ގަރާރުގައި ވިދާޅުވިއެވެ.
ގަރާރުގައި ވަނީ ކައުންސިލަރުގެ މުސާރައާއި އިނާޔަތްތަކަށް ބޮޑު ހޭދައެއް ކުރަންޖޭއިރު މިއީ ހަމަ ކުރަންޖެހޭ ހަރަދުތަކެއްތޯ ސުވާލުކުރައްވާފައެވެ. އެހެންކަމުން މިކަންކާމެދު ފުންކޮށް ވިސްނާލަންޖެހޭ ކަމެއް ކަމަށް ވިދާޅުވެފައިވެއެވެ. ގަރާރު ހުށައެޅުއްވީ، މިފަދަ ކަންކަން ހައްލުކުރުމަށް ޓަކައި މަޖިލީހުގެ މެންބަރުން ދެކެވަޑައިގަންނަވާ ގޮތެއް ބެއްލެވުމަށް ކަމަށް ވިދާޅުވެފައިވެއެވެ.
ޚިޔާލުތައް