ޞާލިޙް މޯލްޑިވްސް ބްރޯޑްކާސްޓިން ކޮމިޝަންގެ ހުސްވެފައިވާ މެންބަރުގެ މަގާމަށް ޒަމްޢަތު އަހުމަދު ވަޙީދު އައްޔަން ކުރެއްވުމަށް ރައްޔިތުންގެ މަޖިލީހުން ފާސްކޮށްފިއެވެ.
މަޖިލީހުން މިގޮތަށް ފާސްކޮށްފައިވަނީ ބްރޯޑްކޮމްގެ ހުސްވެފައިވާ މަގާމަށް ބޭފުޅަކު އައްޔަން ކުރެއްވުމަށް ރައީސުލްޖުމްހޫރިއްޔާ މަޖިލީހަށް ފޮނުއްވާފައިވާ ނަންތައް ދިރާސާކުރެއްވުމަށްފަހުއެވެ.
މިއަދު ރައްޔިތުންގެ މަޖިލީހުގައި ބޭއްވި ޖަލްސާގައި ބްރޯޑްކޮމްއަށް އައްޔަންކުރުމަށް ޒަމްއަތަށް ރުހުން ދީފައިވަނީ 56 މެންބަރުންގެ ވޯޓާއި އެކުގައެވެ. ނުފެންނަ ކަމަށް އެއްވެސް މެންބަރަކު ވޯޓު ނުދެއްވައެވެ. ޒަމްއަތަކީ ދިވެހިރާއްރާއްޖޭގެ އަޑުގެ އިތުރުން ޕަބްލިކް ސަރވިސް މީޑިއާ އަދި ވީޓީވީގައި ގިނަ ދުވަހު މަސައްކަތް ކޮށްފައިވާ ނޫސްވެރިއެކެވެ.
ބްރޯޑްކާސްޓިން ކޮމިޝަންގެ ހުސްވެފައިވާ މެންބަރުގެ މަގާމަށް ޒަމްޢަތު އަހުމަދު ވަޙީދު އައްޔަން ކުރެއްވުމަށް ރައްޔިތުންގެ މަޖިލީހުން ފާސްކޮށްފައިވަނީ ބްރޯޑްކާސްޓިން ކޮމިޝަނުގެ މެންބަރު އައިމިނަތު އަމީނާގެ މަގާމުގެ މުއްދަތު ހަމަވެފައިވާތީއެވެ. އޭނާ މަގާމުގެ މުއްދަތު ހަމަވެފައިވަނީ މި މަހުގެ 14ވަނަ ދުވަހުއެވެ. ބްރޯޑްކާސްޓިން ކޮމިޝަންގެ މަގާމަށް ބޭފުޅަކު އައްޔަން ކުރެއްވުމަށް އާންމުކޮށް ހުޅުވާލުމުން ކުރިމަތިލެއްވި ފަރާތްތަކުގެ ތެރެއިން ޝަރުތު ހަމަވާ 6 ބޭފުޅެއްގެ ނަން ރައީސުލްޖުމްހޫރިއްޔާ ވަނީ މަޖިލީހަށް ފޮނުއްވާފައެވެ.
މިނިވަން މުއައްސަސާތަކަށް މެންބަރުން އައްޔަން ކުރައްވާނީ އާންމުކޮށް ހުޅުވާލުމުން ކުރިމަތިލާ ފަރާތްތަކުގެ ތެރެއިން ރައީސުލްޖުމްޙޫރިއްޔާ މަޖިލީހަށް ނަންތައް ފޮނުއްވައި މަޖިލީހުން ފާސްކުރުމުންނެވެ.
7މެންބަރުން ތިއްބަވާ ބްރޯޑްކޮމްއަށް މެންބަރުން އައްޔަން ކުރަނީ 5 އަހަރު ދުވަހުގެ ދައުރަކަށެވެ. ބްރޯޑްކޮމްގައި މިހާރު ތިއްބެވީ 6 މެންބަރުންނަކީ ނައިބު ރައީސް ޝިފްލާ އިބްރާހީމާއި، މެންބަރުންކަމަށްވާ، އާމިނަތު ނުޒުހާއާއި، މުޙައްމަދު އަބްދުﷲ އާއި އަހުމަދު ރިޟްވާނުގެ އިތުރުން އާމިނަތު ޞަރާޙަތު ޢިއްޒަތު އަދި ކޮމިޝަނުގެ ރައީސް ޞަފާ ޝަފީޤެވެ.
ޚިޔާލުތައް