ރައީސް ޑރ. މުހައްމަދު މުއިއްޒުގެ އަނބިކަނބަލުން އަދި ފަސްޓްލޭޑީ ސާޖިދާ މުހައްމަދު ރަސްމީ ދަތުރެއްގައި ކުޅުދުއްފުށި ސިޓީއަށް ވަޑައިގެންފިއެވެ.
އެކަމަނާ މިއަދު ކުޅުދުއްފުށި ސިޓީއަށް ވަޑައިގަތުމުން އެ ރަށުގެ ގިނަ ބަޔަކު ހޫނު މަރުހަބާއެއް ދެންނެވިއެވެ. ސާޖިދާ، އެ ސިޓީއަށް ކުރައްވަމުން ގެންދަވާ ދަތުރުފުޅުގައި ފުރަތަމަ ވަޑައިގެންފައިވަނީ ކުޅުދުއްފުށި ރީޖަނަލް ހޮސްޕިޓަލަށެވެ.
ރައީސް އޮފީހުން ވިދާޅުވި ގޮތުގައި ސާޖިދާގެ ޒިޔާރަތުގެ ބޭނުމަކީ ހޮސްޕިޓަލުން ދޭ ހިދުމަތްތަކާއި ކުރިމަތިވާ ގޮންޖެހުންތައް ކައިރިން ބެއްލެވުމެވެ.
މި ޒިޔާރަތުގައި ސާޖިދާ ވަނީ ހޮސްޕިޓަލުގެ ތަފާތު ބައިތަކަށް ޒިޔާރަތްކުރައްވައި، އެތަންތަނުން ދެމުންދާ ހިދުމަތްތައް އޮޅުންފިލުއްވައިފައެވެ. އެގޮތުން، ސިއްހީ ހިދުމަތްދޭ އަދި ހޮސްޕިޓަލުގެ އިސްވެރިންނާ ބައްދަލުކުރައްވައި، ހޮސްޕިޓަލުގެ މަސައްކަތްތައް ހިނގާ ނުހިނގާގޮތާއި، ދިމާވާ ދަތިތަކާ ބެހޭގޮތުން މައުލޫމާތު ސުވާލުކުރައްވައި، ހާލަތު ދެނެގަނެފައިވެއެވެ.
މީގެ އިތުރުން، ފަސްޓުލޭޑީ ވަނީ ހޮސްޕިޓަލުގައި ފަރުވާ ހޯދަމުންދާ ބަލިމީހުންނާ ވެސް ބައްދަލު ކުރައްވައިފައެވެ.
ކުޅުދުއްފުށީ ރީޖަނަލް ހޮސްޕިޓަލުގައި ހާއްސަ ޑޮކްޓަރުންނަށް ދެއްކޭނެ ގޮތް މިދިޔަ އަހަރު ޖުލައި މަހު ދެ ދަންފަޅިއަށް ބަދަލުކޮށްފައިވާއިރު، އުނގޫފާރު ރީޖަނަލް ހޮސްޕިޓަލުގެ އިތުރުން ގދ. ތިނަދޫ ގައި ހުންނަ ޑރ. އަބްދުއްޞަމަދު މެމޯރިއަލް ހޮސްޕިޓަލް، އަދި އައްޑޫ ސިޓީ އިކުއެޓޯރިއަލް ހޮސްޕިޓަލުގައިވެސް ވަނީ ދެދަންފަޅީގައި ހާއްސަ ޑޮކްޓަރުންނަށް ދެއްކޭނެ ގޮތަށް ބަދަލުކޮށްފައެވެ.
މި ސަރުކާރުން ވެރިކަމާ ހަވާލުވިއިރު ރާއްޖޭގެ ސިއްހީ ނިޒާމު އޮތީ ވަރަށް ބޮޑަށް ރަނގަޅު ކުރަން ޖެހިފައެވެ. މި ނިޒާމު ރަނގަޅުކޮށް ރާއްޖެއިން ފޯރުކޮށްދޭ ސިއްހީ ހިދުމަތްތަކުގެ ފެންވަރު ރަނގަޅު ކުރުމަށް ސަރުކާރުން ދަނީ ގިނަ މަސައްކަތްތައް ކުރަމުންނެވެ.
ޚިޔާލުތައް