މާލެ ސަރަހައްދުގެ ސްކޫލްތަކަށް އަލަށް ވަންނަން އެދޭ ދަރިވަރުންނަށް، ސެޕްޓެމްބަރު މަހުގެ ނިޔަލަށް ޖާގަތައް ދީ ނިންމާނެ ކަމަށް ތައުލީމީ ވުޒާރާއިން މިއަދު ހާމަކުރައްވައިފިއެވެ.
ތައުލީމީ ވުޒާރާއިން މިދިޔަ އަންގާރަ ދުވަހު ވަނީ 2026 ވަނަ އަހަރުގެ ދިރާސީ އައު އަހަރު ސަރުކާރުގެ ސްކޫލްތަކުގެ އެލްކޭޖީ އަދި ގްރޭޑް 1 އަށް ދަރިވަރުން ވެއްދުމަށް ހުޅުވާލައިފައެވެ.
މިއީ އަހަރުތަކަކަށްފަހު، ޖެނުއަރީ މަހުގައި ދިރާސީ އައު އަހަރުގެ ކިޔެވުން ފެށޭނެ އަހަރެކެވެ.
މިހާރު ހިނގަމުންދާ ދިރާސީ އަހަރުގައި މާލެ ސަރަހައްދުގެ ސްކޫލްތަކުގެ ގްރޭޑް 1 އަށް 2000 އަށްވުރެ ގިނަ ދަރިވަރުން ވަނީ އަލަށް ވައްދާފައެވެ. އަދި މިހާރު ކުރިއަށްދާ ދިރާސީ އަހަރުގައި ސަރުކާރުގެ 217 ސްކޫލެއްގައި 84،000 އެއްހާ ދަރިވަރުން އަންނަނީ ތައުލީމު ހާސިލް ކުރަމުންނެވެ.
ޓީވީއެމްގެ ޕްރޮގްރާމެއްގައި އެޑިއުކޭޝަން ޑިވެލޮޕްމަންޓް ޕްރޮފެޝަނަލް އަބްދުލް ވަލިއްޔު އަލީ ވިދާޅުވީ، މާލެ ސަރަހައްދުގެ ސްކޫލްތަކަށް އަލަށް ވަންނަ ދަރިވަރުންނާއި، އަތޮޅު ތެރެއިން މާލެއަށް ބަދަލުވާ ދަރިވަރުންގެ އަދަދު ކޮންމެ އަހަރަކުވެސް އިތުރުވަމުންދާ ކަމަށެވެ.
“ބެލެނެވެރިން ވީހާވެސް އަވަހަކަށް އަޅުގަނޑުމެންނަށް އެޕްލިކޭޝަންތައް ފުރިހަމަ ކުރެއްވުމަށް. އަދި ހަމައެއާއެކު އަތޮޅު ތެރޭގައިވެސް ކުދިން ސްކޫލަށް ވައްދަން ބޭނުންފުޅުވާ ބެލެނެވެރިން ސްކޭލްތަކާއި ގުޅިގެން ދަރިވަރުން ވެއްދުމުގެ މަސައްކަތް ކުރިއަށް ގެންދިއުން. 31 އޮގަސްޓަކީ އަޅުގަނޑުމެންގެ މަސައްކަތް، މި ދެންނެވީ އެޑްމިޝަން ހުޅުވާލާފައި އިން ޕީރިއެޑް ނިންމުމަކަށް އަންނާނެ ތާރީހް.”، އަބްދުލް ވަލިއްޔު އަލީ ވިދާޅުވިއެވެ.
އަބްދުލް ވަލިއްޔު އަލީ ހާމަކުރެއްވި ގޮތުގައި، އަންނަ އަހަރުގެ ދިރާސީ އަހަރަށް މާލެ ސަރަހައްދުގެ ސްކޫލްތަކަށް އަތޮޅުތަކުން 700 އަށްވުރެ ގިނަ ދަރިވަރުން ބަދަލުވާނެ ކަމަށް އަންދާޒާ ކުރެވެއެވެ. މީގެ އިތުރުން، ގްރޭޑް އެކަކަށް 2،000 އަށްވުރެ ގިނަ ދަރިވަރުން އަދި އެލްކޭޖީއަށް 1،800 އަށްވުރެ ގިނަ ދަރިވަރުން ވަންނާނެ ކަމަށް ލަފާ ކުރެވޭ ކަމަށް އޭނާ ވިދާޅުވިއެވެ.
އެ ވުޒާރާއިން ވިދާޅުވީ، މާލެ ސަރަހައްދުގެ ސްކޫލްތަކަށް ވަންނަން އެދޭ ހުރިހާ ދަރިވަރުންނަށް އެ ފުރުސަތު ލިބޭނެ ކަމަށާއި، އެއްވެސް ދަރިވަރަކު ބާކީނުކޮށް ދަރިވަރުން ދިިރިއުޅޭ ސަރަޙައްދުގެ ސްކޫލްތަކަށް އުސޫލްގެ ތެރެއިން ޖާގަ ލިބޭނެ ކަމަށެވެ. ސްކޫލްތަކުން ޖާގަ ކަށަވަރުކުރުމަށްޓަކައި ތައުލީމީ ވުޒާރާއިން މިހާރުވެސް ދުރާލާ މަސައްކަތް ކުރަމުންދާ ކަމަށް ވަނީ ފާހަގަކުރެއްވާފައެވެ.
“”މިނިސްޓަރުގެ ވަރަށް ބޮޑު އިސްނެންގެވުމާއެކު ނިންމެވި ނިންމެވުމެއް މިއީ، މިދިޔަ އަހަރުވެސް މިކަންތައްތައް ތަންފީޒުވެގެން ދިޔަ. އެކަމަކީ އިސްކޫލްތަކަށް ހާއްސަކޮށް ގްރޭޑް 1 އަށާއި ޕްރީ ސްކޫލަށް ވައްދާ ކުދިން އަހަރުގެ ފަހުކޮޅުގައި އެކުދިން ވެއްދުމުގެ ކަންތައް ކުރިޔަށް ނުގެންގޮސް، އަހަރުގެ މެދެއްހާތާނގައި އެކުދިން ސްކޫލަށް ވައްދާ ނިންމުން. އަހަރުގެ ފަހުކޮޅަށް ދިޔައިމަ ޕޭރެންޓުންނަށް އެކުދިން ދާންވީ ސްކޫލެއް ނޭގި ޔުނީފޯމް ފެއްސެވުމާއި ވަރަށް ގިނަ ބުރަތައް ބެލެނެވެރިން އުފުއްލަން ޖެހިވަޑައިގަންނަވާ. އެހެންވީމާ މިކަންތައްތަކަށް ރިޔާއަތްކޮށް ވިސްނުމަށްފަހުގައި މިދިޔަ އަހަރުގައިވެސް މެދުތެރޭގައި އެކަކަށް އަދި ޕްރީސްކޫލަށް ވައްދަން ނިންމާފައިތިބި ވައްދާ ނިންމި.” ސްޓޭޓް މިނިސްޓަަރު ހުސައިން ސައީދު ވިދާޅުވިއެވެ.
ދަރިވަރުން ސްކޫލްތަކަށް ވެއްދުމުގެ ފޯމު ހުށައެޅުމުގެ މުއްދަތު 31 އޮގަސްޓްގެ ނިޔަލަށް ހުޅުވާލާފައިވާއިރު، އެއް ސްކޫލުން އަނެއް ސްކޫލަށް ކުދިން ބަދަލުކުރުމުގެ ފުރުސަތުވެސް މި މުއްދަތުގެ ތެރޭގައި ހިމެނެއެވެ.
ޚިޔާލުތައް