ސްކޭމް ލިންކެއް މެދުވެރިކޮށް އެކައުންޓްތައް ހެކް ކުރުން އިތުރުވަމުންދާތީ ސަމާޅުވުމަށް ފުލުހުންގެ ސައިބާ ކްރައިމް ސެންޓަރުން އެދިއްޖެއެވެ.
ސައިބާ ކްރައިމް ސެންޓަރުން ބުނެފައިވާ ގޮތުގައި، ގެދޮރުވެރިޔާ ޕޯޓަލްއަށް ލޮގިން ކުރުމަށް ކަމަށް ބުނެ ފޮނުވާ ސްކޭމް ލިންކަށް ފިތުމުން ގޫގުލް އެކައުންޓަށް ލޮގިންވާން ބުނާ ކަމަށާއި ނަމަވެސް ލޮގިންކޮށްފި ނަމަ ލޮގިންވާ މީހާގެ ޕާސްވޯޑް ސްކޭމް ކުރާ ފަރާތަަށް ލިބޭނެ ކަމަށެވެ.
އެގޮތުން މިފަދަ ސްކޭމްތަކުން ސަލާމަތް ވުމަށް ގޫގްލް އެކްއުންޓްގެ ޓޫ ފެކްޓާ އޮތެންޓިކޭޝަން ހެދުމަށް ސައިބާ ކްރައިމް ސެންޓަރުން ވަނީ އެދިފައެވެ.
އެ ސެންޓަރުން ބުނެފައި ވަނީ ގެދޮރުވެރިޔާ ޕޯޓަލުން ލިންކެއް ނުފޮނުވާނެ ކަމަށާއި، އެއީ އީފާސް މެދުވެރިކޮށް ލޮގިންވާގޮތަށް ފަރުމާ ކުރުވިފައިވާ ޕޯޓަލެއް ކަމަށެވެ.
އަދި މިފަދަ ލިންކެއް އެއްވެސް ފަރާތަކަށް ލިބިއްޖެނަމަ ލަސްނުކޮށް، 911 އަަށް ރިޕޯޓް ކުރެއްވުމަށްވެސް ސައިބާ ކްރައިމް ސެންޓަރުން ވަނީ އެދިފައެވެ.
ރާޢްޖޭގައި މިހާރަކަށް އައިސް ސްކޭމްތައް މައްސަލަތައް ދަނީ އިތުރުވަމުންނެވެ. މިކަމުގެ ސަބަބުން ރައްޔިތުންނަށް ވަރަށް ބޮޑެތި ގެއްލުންތަކާއި ވެސް ދަނީ ކުރިމަތި ލާން ޖެހެމުންނެވެ. އެގޮތުން އެފަދަ މައްސަލަތައް ބަލަން ހާއްސަ އެންޓި ސްކޭމް ސެންޓަރެއް މިހާރު ފުލުހުން ވަނީ އުފައްދައިފައެވެ.
ޚިޔާލުތައް