އއ. މާޅޮހުގައި މަރާލި އެރަށު އޯކިޑް މާގެ އަބްދުއް ރަހުމާން 65އ.ގެ ޕޯސްޓްމޯޓަމް ހަދަން އޭނާގެ ހަށިގަނޑު އިންޑިއާއަށް ގެންދަން ނިންމާފައި ވަނީ މި މަހުގެ 21 ވަނަ ދުވަހު ކަމަށް ފުލުހުން މިއަދު ވިދާޅުވެއްޖެއެވެ.
އަބްދުއްރަހްމާން، ގޭގައި ބޮޑެތި ޒަހަމްތަކާއެކުގައި އޮއްވައި އެންމެ ފުރަތަމަ ފެނުނީ އޭނާގެ އަންހެނުން ނާޒިމާ އިބްރާހިމަށެވެ. އޭގެ ފަހުން އެ ރަށުގެ އިތުރު ބަޔަކަށް ވެސް އަބްދުއްރަހްމާންގެ ހަށިގަނޑު ފެނިފައިވެއެވެ. އޭގެ ތެރޭގައި ހޮސްޕިޓަލަށް ގެންދިޔަ މީހުން ވެސް ހިމެނެއެވެ.
ހޮނިހިރު ދުވަހުގެރޭ ދަންވަރު އަބްދުއްރަހްމާނަށް ދިން ވަރުގަދަ ހަމަލާގައި އޭނާ ނިޔާވިއިރު، ތަހުގީގާ ގުޅޭ އެއްވެސް މައުލޫމާތެއް ފުލުހުން އަދި ނުދެއެވެ. އަދި މި މައްސަލައިގައި މީހަކު ވެސް ހައްޔަރުކޮށްފައެއް ނުވެއެވެ.
ފުލުހުން ވަނީ އޭނާގެ ހަށިގަނޑު ސީދާ އެ ދުވަހު މާލެ ގެނެސްފައެވެ. އަދި ޕޯސްޓްމޯޓަމް ހެދުމަށް ނިންމާފައިވާ ކަމަށްވެސް ފުލުހުން އެ ދުަވަހު ވިދާޅުވެފައި ވެއެވެ.
ފުލުހުންގެ މީޑިއާ އޮފިޝަލ މިއަދު ވިދާޅުވީ، އޮޓޮޕްސީ ހެދުމަށްޓަކައި އަބްދުއްރަހުމާން އާދަމްގެ ހަށިގަނޑު ޖުލައި 21 ވަނަ ދުވަހު އިންޑިއާގެ ޓްރިވިންޑްރަމަށް ފޮނުވާލުމަށް ހަމަޖެހިފައިވާ ކަމަށެވެ.
މި ހާދިސާ ހިނގި ގޮތެއް އަދި ސީދާ ނޭނގެއެވެ. އަދި މި ހާދިސާ ހިނގަން މެދުވެރިވި ސަބަބެއްވެސް އަދި ނޭނގެއެވެ. އޭގެ އިތުރުން މި މައްސަލައާ ގުޅިގެން އަދިވެސް މީހަކު ހައްޔަރުކޮށްފައެއް ނުވެއެވެ.
ނާޒިމާ އާއި އަބްދުއްރަހުމާނު ނިދަނީ ދެ ކޮޓަރީގައެވެ. އާއިލާގެ މެމްބަރަކު ބުނި ގޮތުގައި ހަވީރު 5:30 ވާން އުޅެނިކޮށް ރޭގަނޑުގެ ކެއުމަށް އިންސާފުކުރުމަށްފަހު، އަބްދުއްރަހުމާނު ނިދަން ވަނީ ރޭގަނޑު ނުވައެއް ޖަހަން އުޅެނިކޮށެވެ. ނާޒިމާވެސް ވަރަށް އަވަހަށް ނިދާފައިވާ ކަމަށްވެއެވެ. އެރޭގެ ދަންވަރު ނިދާފައި އޮއްވާ، ގޭތެރެއިން ނާޒިމާއަށް އަޑެއް އިވިގެން ހޭލެވުނެވެ. އަޑުއިވުމާއެކު އޭނާ ކޮޓަރިން ބޭރަށް ނުކުމެ ސިޓިންރޫމުތެރެޔަށް ބަލާލިއެވެ. އެއްވެސް މީހަކު ފެންނަން ނެތްކަމުގައިވިޔަސް، ގޭގެ ބޮޑު ދޮރު އެވަގުތު ހުރީ ހުޅުވާފައި ކަމަށް އާއިލާގެ މެމްބަރު ބުންޏެވެ.
ޚިޔާލުތައް